ನವದೆಹಲಿ: ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮಾ ಜಿಲ್ಲೆಯಲ್ಲಿ 2019ರ ಫೆ.14ರಂದು ನಡೆದಿದ್ದ ದಾಳಿಯ ರೀತಿಯ ಮತ್ತೊಂದು ದಾಳಿಗೆ ಉಗ್ರರು ರೂಪಿಸಿದ್ದ ಸಂಚು ವಿಫಲವಾಗಿದೆ. ಬುಧವಾರ ರಾತ್ರಿ ಚೆಕ್ಪೋಸ್ಟ್ ಒಂದರಲ್ಲಿ ಕಾರನ್ನು ತಡೆದು ಪರಿಶೀಲಿಸಿದಾಗ ಅದರಲ್ಲಿ 60 ಕೆ.ಜಿ. ಸುಧಾರಿತ ಸ್ಫೋಟಕ ಇತ್ತು ಎನ್ನಲಾಗಿದೆ.
ಇದಕ್ಕೂ ಮುನ್ನ ಆ ಕಾರಿನ ಹಿಂಬದಿಯಲ್ಲಿ ಇರಿಸಿದ್ದ ಡ್ರಂನಲ್ಲಿ 20 ಕೆ.ಜಿ. ಸ್ಫೋಟಕ ಇತ್ತು ಎಂದು ಹೇಳಲಾಗಿತ್ತು. ಆದರೆ, ಬಾಂಬ್ ನಿಷ್ಕ್ರಿಯ ದಳದ ಸಿಬ್ಬಂದಿ ಪರಿಶೀಲಿಸಿದ ಬಳಿಕ ಅದರಲ್ಲಿ ಇದ್ದದ್ದು 20 ಅಲ್ಲ, 60 ಕೆ.ಜಿ. ಸ್ಫೋಟಕ ಎಂಬುದು ಸ್ಪಷ್ಟವಾಯಿತು ಎನ್ನಲಾಗಿದೆ.
ಇದನ್ನೂ ಓದಿ: ಪುಲ್ವಾಮಾ ದಾಳಿ ರೀತಿಯ ಉಗ್ರರ ದಾಳಿ ವಿಫಲಗೊಳಿಸಿದ ಭದ್ರತಾ ಪಡೆ
ಇಷ್ಟು ಪ್ರಮಾಣದ ಸ್ಫೋಟಕವನ್ನು ನಿಷ್ಕ್ರಿಯಗೊಳಿಸುವುದು ಅಪಾಯಕಾರಿ ಎಂದು ಬಾಂಬ್ ನಿಷ್ಕ್ರಿಯ ದಳದವರು ಹೇಳಿದ್ದರು. ಈ ಹಿನ್ನೆಲೆಯಲ್ಲಿ ಕಾರನ್ನು ನಿರ್ಜನ ಪ್ರದೇಶಕ್ಕೆ ಕೊಂಡೊಯ್ದ ಭದ್ರತಾಪಡೆ ಸಿಬ್ಬಂದಿ ಕಾರಿನ ಸಮೇತ ಅದನ್ನು ಸ್ಫೋಟಿಸಿದರು.
ಇದು ನಿಜಕ್ಕೂ ಸಾಹಸಮಯ ಕಾರ್ಯಾಚರಣೆ. ಒಂದು ವೇಳೆ ಜನರು ಹೆಚ್ಚಾಗಿರುವ ಪ್ರದೇಶದಲ್ಲಿ ಈ ಬಾಂಬ್ ಸ್ಫೋಟಿಸಿದ್ದರೆ ಅದೆಷ್ಟು ಜನ ಬೂದಿಯಾಗುತ್ತಿದ್ದರು ಎಂಬುದನ್ನು ಊಹಿಸಲೂ ಕಷ್ಟ ಎಂದು ಕಾಶ್ಮೀರ ಪೊಲೀಸ್ ಅಧಿಕಾರಿ ರಾಯಿಸ್ ಮೊಹಮ್ಮದ್ ಬಟ್ ಹೇಳಿದ್ದಾರೆ. ಜತೆಗೆ ಕಾರನ್ನು ಸ್ಫೋಟಿಸುತ್ತಿರುವ 9 ಸೆಕೆಂಡ್ ವಿಡಿಯೋ ತುಣಕನ್ನೂ ಸಾಮಾಜಿಕ ಜಾಲತಾಣ ಟ್ವಿಟರ್ನಲ್ಲಿ ಹರಿಬಿಟ್ಟಿದ್ದಾರೆ.