ನವದೆಹಲಿ: ಆಫ್ರಿಕಾ ಕಂಡದ ಬೋಟ್ಸ್ವಾನಾ ರಾಷ್ಟ್ರದ ಕಾಡೊಂದರಲ್ಲಿ ಎರಡು ತಿಂಗಳ ಅವಧಿಯಲ್ಲಿ 350 ಆನೆಗಳು ನಿಗೂಢ ರೀತಿಯಲ್ಲಿ ಸಾವನಪ್ಪಿವೆ. ಆ ಪ್ರದೇಶದಲ್ಲಿ ಬರ ಪರಿಸ್ಥಿತಿ ಇಲ್ಲದಿದ್ದಾಗ್ಯೂ ಇಷ್ಟೊಂದು ಆನೆಗಳು ಸಾಯಲು ಕಾರಣ ಏನೆಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಮೇ ಆರಂಭದಲ್ಲಿ ಒಕವಾಂಗೊ ಪ್ರಸ್ಥಭೂಮಿಯಲ್ಲಿ ಆನೆಗಳ ಸಾಲು ಸಾಲು ಶವಗಳು ಆನೆ ಸಂರಕ್ಷಕರ ಕಣ್ಣಿಗೆ ಬಿದ್ದಿದ್ದವು. ಆನೆಗಳ ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ. ಆದರೆ, ಆ ವರದಿ ಬರಲು ಹಲವು ವಾರಗಳೇ ಬೇಕಾಗುತ್ತವೆ ಎಂದು ಬೋಟ್ಸ್ವಾನಾ ಸರ್ಕಾರದ ಅಧಿಕಾರಿಗಳು ತಿಳಿಸಿದ್ದಾರೆ.
ಆಫ್ರಿಕಾ ಖಂಡದ ದಕ್ಷಿಣ ಭಾಗದಲ್ಲಿರುವ ಬೋಟ್ಸ್ವಾನಾದಲ್ಲಿ ಆಫ್ರಿಕಾ ಖಂಡದ ಒಟ್ಟು ಆನೆಗಳ ಪೈಕಿ ಮೂರನೇ ಒಂದು ಭಾಗದಷ್ಟು ಆನೆಗಳಿವೆ.
ಬ್ರಿಟನ್ ಮೂಲದ ನ್ಯಾಷನಲ್ ಪಾರ್ಕ್ ರೆಸ್ಕ್ಯೂ ಎಂಬ ಸಂಘಟನೆಯ ಡಾ. ಮೆಕ್ಕ್ಯಾನ್ ಪ್ರಕಾರ, ಮೇನಲ್ಲಿ ವಿಮಾನದಲ್ಲಿ ಪ್ರಸ್ಥಭೂಮಿಯನ್ನು ಹಾದು ಹೋಗುವಾಗ ಆನೆಗಳ ಶವಗಳು ಕಂಡುಬಂದವು. ಅಂದಾಜು ಮೂರು ಗಂಟೆ ಈ ಪ್ರದೇಶದೆಲ್ಲೆಡೆ ವೈಮಾನಿಕ ಸಮೀಕ್ಷೆ ನಡೆಸಿದಾಗ 169 ಆನೆಗಳ ಶವಗಳು ಪತ್ತೆಯಾದವು ಎಂದು ಮಾಹಿತಿ ನೀಡಿದ್ದಾರೆ.
ಒಂದು ತಿಂಗಳ ಬಳಿಕ ಹೆಚ್ಚಿನ ತನಿಖೆ ನಡೆಸಿದಾಗ ಈ ಪ್ರದೇಶದಲ್ಲಿ 350ಕ್ಕೂ ಹೆಚ್ದು ಆನೆಗಳು ನಿಗೂಢವಾಗಿ ಮೃತಪಟ್ಟಿರುವ ಸಂಗತಿ ತಿಳಿಯಿತು ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ಮಾನವೀಯತೆಯನ್ನೇ ಮರೆಸುತ್ತಿದೆ ಕರೊನಾ; ತಂದೆಯ ಶವವಿಡಲು ಐಸ್ಕ್ರೀಮ್ ಫ್ರೀಜರ್ ಖರೀದಿಸಿದರು
ಇಷ್ಟೊಂದು ಆನೆಗಳು ಒಮ್ಮೆಲೇ ಸಾಯಲು ಕಳ್ಳಬೇಟೆಗಾರರ ಹಾವಳಿ ಕಾರಣ ಎಂಬ ಆರೋಪವನ್ನು ಬೋಟ್ಸ್ವಾನಾ ಸರ್ಕಾರ ತಳ್ಳಿಹಾಕಿದೆ. ಆನೆಗಳ ಶವಗಳ ಎಲ್ಲಾ ಭಾಗಗಳು ಹಾಗೆಯೇ ಇರುವುದು ಇದಕ್ಕೆ ಕಾರಣವಾಗಿದೆ.
ಆನೆಗಳು ಮಾತ್ರ ಸಾಯುತ್ತಿರುವುದರಿಂದ, ಅವುಗಳನ್ನು ಸಾಯಿಸಲು ಕಳ್ಳಬೇಟೆಗಾರರು ಸೈನೆಡ್ ಅನ್ನು ಬಳಸಿರುವ ಅನುಮಾನ ವ್ಯಕ್ತವಾಗಿದೆ. ಆದರೆ, ಅವರು ಹಾಗೇನಾದರೂ ಮಾಡಿದ್ದರೆ, ಇತರೆ ಪ್ರಾಣಿಗಳೂ ಸಾಯಬೇಕಿತ್ತು. ಆದರೆ ಆನೆಗಳು ಮಾತ್ರವೇ ಸತ್ತಿವೆ. ಆದ್ದರಿಂದ ಸೈನೆಡ್ ಬಳಕೆಯಾಗಿಲ್ಲ ಎಂಬುದು ಖಚಿತವಾಗುತ್ತದೆ ಎಂದು ಡಾ. ಮೆಕ್ಕ್ಯಾನ್ ಹೇಳಿದ್ದಾರೆ.
2019ರಲ್ಲಿ ಆ್ಯಂಥ್ರಾಕ್ಸ್ ವಿಷವುಣಿಸಿದ್ದರಿಂದ ಬೊಟ್ಸ್ವಾನಾದಲ್ಲಿ 100ಕ್ಕೂ ಹೆಚ್ಚು ಆನೆಗಳು ಸತ್ತಿದ್ದವು. ಆದರೆ ಈ ಬಾರಿ ಅಂಥ ಸಾಧ್ಯತೆಯನ್ನೂ ಅವರು ತಳ್ಳಿಹಾಕಿದ್ದಾರೆ.
13.4 ಕೋಟಿ ಯುಪಿಐ ಪಾವತಿ ವಹಿವಾಟು: ಜೂನ್ ತಿಂಗಳಲ್ಲಿ ಸಾರ್ವಕಾಲಿಕ ದಾಖಲೆ