ಭೋಪಾಲ್: ಆತನಿಗೆ ಕೇವಲ 10 ವರ್ಷ ವಯಸ್ಸು. ನೋಡಲು ಕುಳ್ಳು. ಇಂಥ ಬಾಲಕ ಬ್ಯಾಂಕ್ನ ಕ್ಯಾಷಿಯರ್ ಕೌಂಟರ್ಗೆ ನುಗ್ಗಿ ಕೇವಲ 30 ಸೆಕೆಂಡ್ಗಳಲ್ಲಿ 10 ಲಕ್ಷ ರೂಪಾಯಿ ಎಗರಿಸಿ ಪರಾರಿಯಾಗಿದ್ದಾನೆ.
ಮಧ್ಯಪ್ರದೇಶದ ನೀಮುಚ್ ಜಿಲ್ಲೆಯ ಜಾವಾದ್ ಪ್ರದೇಶದಲ್ಲಿರುವ ಸಹಕಾರಿ ಬ್ಯಾಂಕ್ನಲ್ಲಿ ಈ ಕಳ್ಳತನ ನಡೆದಿದೆ. ಬ್ಯಾಂಕ್ನಲ್ಲಿ ಗ್ರಾಹಕರು ಇರುವಾಗಲೇ, ಅವರ ಅರಿವಿಗೂ ಬಾರದಂತೆ ಬಾಲಕ ಹಣ ಎಗರಿಸಿಕೊಂಡು ಪರಾರಿಯಾಗಿದ್ದಾನೆ. ಆತನ ಈ ಚಾಕಚಕ್ಯತೆ ಬ್ಯಾಂಕ್ನಲ್ಲಿ ಅಳವಡಿಸಿದ್ದ ಸಿಸಿ ಕ್ಯಾಮರಾದಲ್ಲಿ ದಾಖಲಾಗಿದೆ.
ಮಾಸಲು ಬಟ್ಟೆ ಧರಿಸಿ ಬೆಳಗ್ಗೆ 10.30ಕ್ಕೆ ಬ್ಯಾಂಕ್ ಪ್ರವೇಶಿಸಿದ ಬಾಲಕ ಕಳ್ಳತನಕ್ಕೆ ಸೂಕ್ತ ಅವಕಾಶಕ್ಕಾಗಿ ಕಾಯುತ್ತಾ ಬ್ಯಾಂಕ್ ತುಂಬಾ ಓಡಾಡಿದ್ದಾನೆ. ಈ ಸಂದರ್ಭದಲ್ಲಿ ಬ್ಯಾಂಕ್ ತುಂಬಾ ಗ್ರಾಹಕರಿದ್ದರೂ ಕುಳ್ಳುಗಿರುವ ಈತನನ್ನು ಯಾರೂ ಗಮನಿಸಿಲ್ಲ.
11 ಗಂಟೆಗೆ ಬ್ಯಾಂಕ್ನ ಕ್ಯಾಷಿಯರ್ ತಮ್ಮ ಚೇಂಬರ್ ಅನ್ನು ಬಿಟ್ಟು ಹೊರಹೋಗುತ್ತಿದ್ದಂತೆ ಬ್ಯಾಂಕ್ನ ಇತರೆ ಸಿಬ್ಬಂದಿ ಮತ್ತು ಗ್ರಾಹಕರ ಉಪಸ್ಥಿತಿಯಲ್ಲೇ ಆತ ರಾಜಾರೋಷವಾಗಿ ಚೇಂಬರ್ ಅನ್ನು ಪ್ರವೇಶಿಸಿದ್ದಾನೆ. ಬಳಿಕ 500 ರೂ.ಗಳ 10 ಕಟ್ಟುಗಳುಳ್ಳ ಎರಡು ಕಟ್ಟುಗಳನ್ನು ತಾನು ತಂದಿದ್ದ ಹರಕಲು ಬ್ಯಾಗ್ನಲ್ಲಿ ಹಾಕಿಕೊಂಡು ಕ್ಷಣಾರ್ಧದಲ್ಲಿ ಮಾಯವಾಗಿದ್ದಾನೆ. ಆತ ಇಷ್ಟೆಲ್ಲ ಮಾಡಲು ಕೇವಲ 30 ಸೆಕೆಂಡ್ ಸಮಯ ತೆಗೆದುಕೊಂಡಿದ್ದಾನೆ.
ಇದನ್ನೂ ಓದಿ: ಕಾಮೇಗೌಡರ ಕೆರೆ ಕಾಳಜಿ ಕಟ್ಟುಕಥೆ: ಏನೂ ಮಾಡದೇ ದೊಡ್ಡ ಸಾಧನೆಯ ಕಿರೀಟ
ಕಳ್ಳತನದ ಅರಿವು: ಬಾಲಕ ಬ್ಯಾಂಕ್ನ ಹೆಬ್ಬಾಗಿಲನ್ನು ದಾಟುವ ಸಂದರ್ಭದಲ್ಲಿ ಆತ ಕಳ್ಳತನ ಮಾಡಿರುವುದು ಗೊತ್ತಾಗಿದೆ. ಆತನನ್ನು ಹಿಡಿದುಕೊಳ್ಳುವಂತೆ ಬ್ಯಾಂಕ್ ಸಿಬ್ಬಂದಿ ಕೂಗಿದ್ದಾರೆ. ಬಾಗಿಲಲ್ಲಿದ್ದ ಗಾರ್ಡ್ ಆ ಬಾಲಕನ ಬೆನ್ನಟ್ಟಿದರೂ ಆತ ಮಾಯಾ ಜಿಂಕೆಯಂತೆ ಕಾಣೆಯಾದ ಎನ್ನಲಾಗಿದೆ. ಬಾಲಕ ಓಡಿದ ದಿಕ್ಕಿಗೆ ವಿರುದ್ಧವಾಗಿ ಯುವಕ ಓಡಿದ ಎನ್ನಲಾಗಿದೆ. ಕೆಲ ಅನುಮಾನಾಸ್ಪದ ಯುವಕರನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ. ಆದರೂ ನಿಜವಾದ ಕಳ್ಳರು ಪತ್ತೆಯಾಗಿಲ್ಲ ಎನ್ನಲಾಗಿದೆ.
20ರ ಯುವಕನ ನಿರ್ದೇಶನ: ಕಳ್ಳತನ ಮಾಡಿದ ಈ ಬಾಲಕನಿಗೆ 20 ವರ್ಷದ ಯುವಕನೊಬ್ಬ ಬಾಲಕನಿಗೆ ನಿರ್ದೇಶನ ನೀಡುತ್ತಿದ್ದ ಎನ್ನಲಾಗಿದೆ. ಯಾವಾಗ ಎಲ್ಲಿ ಹೋಗಬೇಕು, ಚೇಂಬರ್ ಅನ್ನು ಹೇಗೆ ಪ್ರವೇಶಿಸಬೇಕು, ನೋಟುಗಳ ಕಟ್ಟುಗಳನ್ನು ಬ್ಯಾಗ್ಗೆ ತುಂಬಿಸಿಕೊಂಡು ಯಾರಿಗೂ ಗೊತ್ತಾಗದ ಹಾಗೆ ಅಲ್ಲಿಂದ ಹೇಗೆ ಪರಾರಿಯಾಗಬೇಕು ಎಂಬುವವರೆಗೂ ಆತ ನಿರ್ದೇಶನ ನೀಡಿದ್ದಾನೆ. ಈ ದೃಶ್ಯಗಳು ಕೂಡ ಸಿಸಿ ಕ್ಯಾಮರಾದಲ್ಲಿ ದಾಖಲಾಗಿದೆ ಎನ್ನಲಾಗಿದೆ.
ಹೆಣ್ಣುಮಕ್ಕಳ ಬಳಕೆ: ಮಕ್ಕಳನ್ನು ಬಳಸಿಕೊಮಡು ಬ್ಯಾಂಕ್ಗಳಿಂದ ಹಣ ಕದಿಯುವ ಬೃಹತ್ ಜಾಲವೇ ಇದೆ. 10ರಿಂದ 14 ವರ್ಷದ, ಕುಳ್ಳುಗಿರುವ ಬಾಲಕ-ಬಾಲಕಿಯರನ್ನು ಈ ಗುಂಪು ಬಳಸಿಕೊಂಡು ಕಳ್ಳತನ ಮಾಡುತ್ತದೆ. ಮಕ್ಕಳು ಸಿಕ್ಕಿಬಿದ್ದರೆ ದೊಡ್ಡವರ ಹೆಸರನ್ನು ಹೇಳುವುದಿಲ್ಲ, ಜತೆಗೆ ಬಾಲಮಂದಿರದಲ್ಲಿ ಒಂದಷ್ಟು ಕಾಲ ಇದ್ದು ಶಿಕ್ಷೆ ಅನುಭವಿಸಿ ಬಿಡುಗಡೆಯಾಗುತ್ತಾರೆ ಎಂಬ ಕಾರಣಕ್ಕಾಗಿ ಈ ಜಾಲ ಮಕ್ಕಳನ್ನು ಬಳಸಿಕೊಳ್ಳುತ್ತದೆ ಎನ್ನಲಾಗಿದೆ.