ಕುಮಟಾ: ಪಟ್ಟಣದ ಹಳೇ ಹೆರವಟ್ಟಾದ ವಾಕರಸಾ ಡಿಪೋ ಪಕ್ಕದ ರಸ್ತೆ ಸರಿಪಡಿಸಬೇಕು ಎಂದು ಆಗ್ರಹಿಸಿ ಸ್ಥಳೀಯರು ಶಾಸಕ ದಿನಕರ ಶೆಟ್ಟಿ ಅವರಿಗೆ ಸೋಮವಾರ ಮನವಿ ಸಲ್ಲಿಸಿದರು.
ಸಿದ್ದಾಪುರ ರಸ್ತೆಯಿಂದ ಹಳೇ ಹೆರವಟ್ಟಾ ಮೂಲಕ ಸಾಗುವ ಡಿಪೋ ಪಕ್ಕದ ರಸ್ತೆ ತೀರಾ ಹಾಳಾಗಿದೆ. 2018-19ರಲ್ಲಿ ಒಳಚರಂಡಿ ಯೋಜನೆಗಾಗಿ ಈ ರಸ್ತೆಯನ್ನು ಆಳವಾಗಿ ಅಗೆದು ಕಾಲುವೆ ತೋಡಿದ ಜಾಗಕ್ಕೆ ಮಾತ್ರ ತೇಪೆ ಹಾಕಿದ್ದರು. ಈಗ ಎಲ್ಲೆಡೆ ಕಿತ್ತುಹೋಗಿ ಮ್ಯಾನ್ಹೋಲ್ ಮುಚ್ಚಳವೂ ಮೇಲೆದ್ದು ವಾಹನಗಳಿಗೆ ಅಪ್ಪಳಿಸುತ್ತಿದೆ. ಹೀಗಾಗಿ ಸಂಚಾರ ಕಷ್ಟವಾಗಿದೆ.
ಹಿಂದೆ ಈ ರಸ್ತೆಯನ್ನು ಡಾಂಬರೀಕರಣ ಮಾಡುವಾಗ ಹೆರವಟ್ಟಾದ ಸಿದ್ದಾಪುರ ರಸ್ತೆ ಕ್ರಾಸ್ನಿಂದ ರಾ.ಹೆ. 66ರ ಡಿಪೋ ಕ್ರಾಸ್ವರೆಗೆ ಪೂರ್ಣ ಪ್ರಮಾಣದಲ್ಲಿ ಮಾಡುತ್ತಿದ್ದರು. ಈ ವರ್ಷ ಅರ್ಧ ಕಾಮಗಾರಿ ಮಾತ್ರ ಮಾಡಲಾಗಿದೆ. ರಸ್ತೆ ತೀರಾ ಹದಗೆಟ್ಟ ಭಾಗವನ್ನು ಹಾಗೇ ಬಿಡಲಾಗಿದೆ. ರಸ್ತೆ ಕೆಲವು ಕಡೆ ತೀರಾ ಹದಗೆಟ್ಟಿದ್ದು ಇಕ್ಕಟ್ಟಾಗಿಯೂ ಇದೆ. ನಿತ್ಯ ಸಾವಿರಾರು ವಾಹನಗಳು ಓಡಾಡುವ ಈ ರಸ್ತೆಯನ್ನು ಕೂಡಲೆ ದುರಸ್ತಿ ಮಾಡಬೇಕು ಎಂದು ಮನವಿ ಪತ್ರದ ಮೂಲಕ ಸಾರ್ವಜನಿಕರು ಶಾಸಕರನ್ನು ಒತ್ತಾಯಿಸಿದರು.
ಶೀಘ್ರ ರಸ್ತೆ ದುರಸ್ತಿ ಮಾಡಿಸುವುದಾಗಿ ಶಾಸಕ ದಿನಕರ ಶೆಟ್ಟಿ ಭರವಸೆ ನೀಡಿದರು. ಈ ವೇಳೆ ಪುರಸಭೆ ಸದಸ್ಯರಾದ ಮೋಹಿನಿ ಗೌಡ, ಸೂರ್ಯಕಾಂತ ಗೌಡ, ಸ್ಥಳೀಯರಾದ ಸಿ.ಆರ್.ನಾಯ್ಕ, ಸುರೇಶ ನಾಯ್ಕ, ಅಮಿತಾ ನಾಯ್ಕ, ಮಾರುತಿ ಶೇಟ್, ಗೋಪಾಲ ಶೇಟ್, ಉಮಾ ನಾಯಕ, ಮೋಹನ ಗೌಡ, ವಿನಾಯಕ ಗೌಡ, ಅನಿಲ, ಸತೀಶ, ಮಹೇಶ ಇನ್ನಿತರರು ಇದ್ದರು.