ಶಿವಮೊಗ್ಗ: ಜಿಲ್ಲೆಯಲ್ಲಿ ಕರೊನಾ ವೈರಸ್ ಹಾವಳಿ ಮುಂದುವರಿದಿದ್ದು ಭಾನುವಾರವೂ ಮತ್ತೆರಡು ಪ್ರಕರಣ ದೃಢಪಟ್ಟಿವೆ. ಇದರೊಂದಿಗೆ ಸೋಂಕಿತರ ಸಂಖ್ಯೆ 111ಕ್ಕೆ ಏರಿಕೆ ಆಗಿದೆ. ನಗರದ ಸ್ವಾಮಿ ವಿವೇಕಾನಂದ ಬಡಾವಣೆ ‘ಎ’ ಬ್ಲಾಕ್ನ 35 ವರ್ಷದ ವ್ಯಕ್ತಿ ಹಾಗೂ ಸಾಗರ ತಾಲೂಕಿನ 25 ವರ್ಷದ ಯುವಕನಿಗೆ ಸೋಂಕು ತಗುಲಿದೆ.
ಮಹಾರಾಷ್ಟ್ರದಿಂದ ಬಂದು ಉತ್ತರ ಕನ್ನಡ ಜಿಲ್ಲೆ ಭಟ್ಕಳದಲ್ಲಿ ಸ್ವಾಬ್ ಟೆಸ್ಟ್ಗೆ ಒಳಗಾಗಿದ್ದ 25 ವರ್ಷದ ಯುವಕ ಸಾಗರ ತಾಲೂಕಿನ ಬಿಳಿಗಾರು ಗ್ರಾಮದ ಮನೆಯಲ್ಲಿ ಕ್ವಾರಂಟೈನ್ನಲ್ಲಿದ್ದ. 35 ವರ್ಷದ ವ್ಯಕ್ತಿ ಹೊರಗಡೆ ಎಲ್ಲೂ ಪ್ರಯಾಣ ಮಾಡಲ್ಲಿದ ಕಾರಣ ಐಎಲ್ಐ(ಇನ್ಫ್ಲುಯೆಂಜಾ ಲೈಕ್ ಇಲ್ನೆಸ್) ಲಕ್ಷಣ ಹೊಂದಿದ್ದರು ಎಂದು ಹೇಳಲಾಗುತ್ತಿದೆ. ಇಬ್ಬರನ್ನೂ ಮೆಗ್ಗಾನ್ ಆಸ್ಪತ್ರೆಗೆ ರವಾನಿಸಿದ್ದು ಪ್ರಾಥಮಿಕ ಸಂಪರ್ಕಕ್ಕೆ ಬಂದವರನ್ನು ಕ್ವಾರಟೈನ್ಗೆ ಸ್ಥಳಾಂತರಿಸಲಾಗಿದೆ.
ವಿವೇಕಾನಂದ ಬಡಾವಣೆ ಸೀಲ್ಡೌನ್: ಶಿವಮೊಗ್ಗದ ಸ್ವಾಮಿ ವಿವೇಕಾನಂದ ಬಡಾವಣೆಯ ‘ಎ’ ಬ್ಲಾಕ್ನ 6ನೇ ತಿರುವಿನಲ್ಲಿ 100 ಮೀಟರ್ ಸುತ್ತಮುತ್ತ ಕಂಟೇನ್ಮೆಂಟ್ ಜೋನ್ ಆಗಿ ಪರಿವರ್ತಿಸಲಾಯಿತು. ಶೀತ ಕೆಮ್ಮಿಗಾಗಿ ಕಳೆದ ಮೂರು ದಿನಗಳ ಹಿಂದೆ ಮೆಗ್ಗಾನ್ಗೆ ತೆರಳಿದ್ದ ವ್ಯಕ್ತಿಗೆ ಸ್ವಾ್ಯಬ್ ಪರೀಕ್ಷೆ ಮಾಡಿಸಲಾಗಿತ್ತು. ಆದರೆ ಶನಿವಾರ ಭಾನುವಾರ ಬೆಳಗ್ಗೆ ಕರೊನಾ ಪಾಸಿಟಿವ್ ಬಂದ ಹಿನ್ನೆಲೆಯಲ್ಲಿ ಆತನನ್ನು ಮೆಗ್ಗಾನ್ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಶೋರೂಂವೊಂದರಲ್ಲಿ ಕೆಲಸ ಮಾಡುತ್ತಿದ್ದ ಆತನ ಪ್ರಾಥಮಿಕ ಸಂಪರ್ಕಕ್ಕೆ ಬಂದವರನ್ನು ಪತ್ತೆ ಹಚ್ಚಲಾಗಿದ್ದು ಅವರನ್ನು ಹೋಮ್ ಕ್ವಾರಂಟೈನ್ಗೆ ಸೂಚಿಸಲಾಗುತ್ತಿದೆ. ಮಧ್ಯಾಹ್ನ ಸ್ವಾಮಿ ವಿವೇಕಾನಂದ ಬಡಾವಣೆಯಲ್ಲಿ ಆಟೋ ಮೂಲಕ ಕಂಟೇನ್ಮೆಂಟ್ ಜೋನ್ ಬಗ್ಗೆ ಪ್ರಚುರಪಡಿಸಲಾಯಿತು. ‘ಎ‘ ಬ್ಲಾಕ್ನ ಕೆಲವೆಡೆ ಸ್ಯಾನಿಟೈಸ್ ಕೂಡ ಮಾಡಲಾಯಿತು. ಕಂಟೇನ್ಮೆಂಟ್ ಜೋನ್ ಮಾಡಲಾಗುತ್ತಿರುವ ಪ್ರದೇಶದಲ್ಲಿ ಮಹಾನಗರ ಪಾಲಿಕೆಯಿಂದಲೇ ಆಹಾರ ಮತ್ತು ದಿನಸಿ ವಿತರಿಸಲು ನಿರ್ಧರಿಸಲಾಗಿದೆ.
ಮೊಬೈಲ್ ಸ್ವಿಚ್ಆಫ್ ಮಾಡಿ ಆತಂಕ ಸೃಷ್ಟಿ: ಮೂರು ದಿನಗಳ ಹಿಂದೆ ಸ್ವಾ್ಯಬ್ ಪರೀಕ್ಷೆಗೆ ಸ್ಯಾಂಪಲ್ಸ್ ನೀಡಿ ಹೋಗಿದ್ದ ಆತನ ಮೊಬೈಲ್ ಸ್ವಿಚ್ಆಫ್ ಆಗಿದ್ದು ಶನಿವಾರ ರಾತ್ರಿಯಿಂದ ಅಧಿಕಾರಿಗಳು ಹಾಗೂ ವೈದ್ಯರಲ್ಲಿ ಆತಂಕಕ್ಕೆ ಕಾರಣವಾಗಿತ್ತು. ಆದರೆ ಸ್ವಿಚ್ಆಫ್ ಮಾಡಿಕೊಂಡು ಮನೆಯಲ್ಲಿಯೇ ಇದ್ದ ಕಾರಣ ಆತನನ್ನು ಪತ್ತೆ ಮಾಡಿರುವ ಆರೋಗ್ಯ ಇಲಾಖೆ ಅಧಿಕಾರಿಗಳು ಮೆಗ್ಗಾನ್ಗೆ ಕರೆತಂದಿದ್ದಾರೆ.
ಈ ನಡುವೆ ಕರೊನಾ ಸೋಂಕಿತ ಮೆಗ್ಗಾನ್ ಆಸ್ಪತ್ರೆಯಿಂದ ಪರಾರಿಯಾಗಿದ್ದಾನೆ ಎಂಬ ಗಾಳಿ ಸುದ್ದಿ ಎಲ್ಲೆಡೆ ಹರಡಿತ್ತು. ಈ ಬಗ್ಗೆ ಡಿಸಿ ಕೆ.ವಿ.ಶಿವಕುಮಾರ್ ಅವರೇ ಸ್ಪಷ್ಟನೆ ನೀಡಿದ್ದು, ಆತ ಎಲ್ಲೂ ಪರಾರಿಯಾಗಿಲ್ಲ. ಮನೆಯಲ್ಲಿದ್ದ ಸೋಂಕಿತನನ್ನು ಪತ್ತೆ ಮಾಡಿ ಮೆಗ್ಗಾನ್ ಆಸ್ಪತ್ರೆಗೆ ಕರೆತಂದಿರುವುದು ತಿಳಿಸಿದ್ದಾರೆ.