ಶಿವಮೊಗ್ಗ: ನಗರ ಹೊರವಲಯದ ಸೋಮಿನಕೊಪ್ಪ-ಗೆಜ್ಜೇನಹಳ್ಳಿ ರಸ್ತೆಯ ಬಾರ್ ಆಂಡ್ ರೆಸ್ಟೋರೆಂಟ್ ಹಾಗೂ ಸ್ಥಳೀಯ ಆಟೋ ಕಾಲನಿ ಕೆಲ ಮನೆಗಳಿಗೆ ಗಾಂಜಾ ಮತ್ತಿನಲ್ಲಿ ನುಗ್ಗಿದ ಕಿಡಿಗೇಡಿಗಳು ಕಲ್ಲು ತೂರಿ ದಾಂಧಲೆ ನಡೆಸಿದ್ದಾರೆ.
ಸೋಮಿನಕೊಪ್ಪದ ಮುರ್ನಾಲ್ಕು ಯುವಕರ ಗುಂಪೊಂದು ಶನಿವಾರ ಬೆಳ್ಳಂಬೆಳ್ಳಗೆ ಗಾಂಜಾ ಮತ್ತಿನಲ್ಲಿ ಬಂದು ಬಾರ್ನಲ್ಲಿ ಗಲಾಟೆ ಮಾಡಿದೆ. ಬಾರ್ ಮಾಲೀಕರು ಯುವಕರನ್ನು ಹೊರಗೆ ಕಳಿಸಲು ಯತ್ನಿಸಿದ್ದು ಹೊರ ಹೋಗದೇ ಬಾರ್ನ ಬ್ಯಾನರ್ ಕಿತ್ತುಹಾಕಿದ್ದಾರೆ. ಅಲ್ಲದೆ, ಬಾರ್ ಹಾಗೂ ಪಕ್ಕದ ಮನೆಗಳ ಮೇಲೆ ಕಲ್ಲು ತೂರಿ ಗಲಾಟೆ ಮಾಡಿದ್ದಾರೆ.
ಘಟನೆ ವಿವರ: ಜು.27ರ ಸಂಜೆ 7ಕ್ಕೆ ಬಾರ್ ಆಂಡ್ ರೆಸ್ಟೋರೆಂಟ್ಗೆ ಬಂದಿದ್ದ ಕಿಡಿಗೇಡಿಗಳು ಅಲ್ಲಿನ ಸಿಬ್ಬಂದಿಯನ್ನು ನಿಂದಿಸಿ ಮದ್ಯ ಕೊಡುವಂತೆ ಒತ್ತಾಯಿಸಿದ್ದರು. ನಿರಾಕರಿಸಿದ ಸಿಬ್ಬಂದಿಗೆ ಮಾರಣಾಂತಿಕ ಹಲ್ಲೆ ನಡೆಸಿ ಬೆದರಿಕೆ ಹಾಕಿದ್ದರು. ಈ ಸಂಬಂಧ ಬಾರ್ ಮಾಲೀಕ ವಿನೋಬನಗರ ಪೊಲೀಸರಿಗೆ ದೂರು ನೀಡಿದ್ದರು. ಇದರಿಂದ ರೊಚ್ಚಿಗೆದ್ದ ಕಿಡಿಗೇಡಿಗಳು ಶನಿವಾರ ಬೆಳಗ್ಗೆ ಮತ್ತೆ ಬಾರ್ಗೆ ಬಂದು ದಾಂಧಲೆ ಮಾಡಿದ್ದಾರೆ.
ಆಟೋ ಕಾಲನಿಯಲ್ಲಿ ಮನೆಗಳ ಬಳಿ ಗಲಾಟೆ ಮಾಡಿದ್ದಾರೆ. ಘಟನೆಯಿಂದ ಜನ ಭಯಭೀತರಾಗಿದ್ದು, ಪೊಲೀಸರು ಕ್ರಮ ಕೈಗೊಳ್ಳಬೇಕಿದೆ. ಮಚ್ಚು, ಲಾಂಗು ಹಿಡಿದು ಅಸಭ್ಯವಾಗಿ ವರ್ತಿಸುತ್ತಿರುವ ಕಿಡಿಗೇಡಿಗಳನ್ನು ಮಟ್ಟಹಾಕಬೇಕಿದೆ ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.