ಹುಬ್ಬಳ್ಳಿ: ಲಾಕ್ಡೌನ್ ಸಡಿಲಿಕೆ ನಂತರ ಸೋಮವಾರದಿಂದ ಹೋಟೆಲ್ಗಳು ಪ್ರಾರಂಭಗೊಳ್ಳಲಿವೆ. ಹೋಟೆಲ್ಗಳ ಪ್ರಾರಂಭಕ್ಕಾಗಿ ನಗರದಾದ್ಯಂತ ಭಾನುವಾರ ಮಾಲೀಕರು ಹಾಗೂ ಸಿಬ್ಬಂದಿ ಪೂರ್ವ ಸಿದ್ಧತೆ ನಡೆಸಿದರು. ಇಡಿ ಹೋಟೆಲ್ಗೆ ದ್ರಾವಣ ಸಿಂಪಡಿಸಿ, ಟೇಬಲ್, ಕುರ್ಚಿಗಳನ್ನು ಸ್ಯಾನಿಟೈಸರ್ ಹಾಕಿ ಸ್ವಚ್ಛಗೊಳಿಸಿದರು.
ಸೋಮವಾರದಿಂದ ಪ್ರತಿ ಹೋಟೆಲ್ ಪ್ರವೇಶ ದ್ವಾರದ ಬಳಿ ಸ್ಯಾನಿಟೈಸರ್ ಇಡಲಾಗುತ್ತಿದ್ದು, ಹೋಟೆಲ್ ಪ್ರವೇಶಿಸುವ ಮುನ್ನ ಗ್ರಾಹಕರ ಥರ್ಮಲ್ ಸ್ಕ್ರೀನಿಂಗ್ ನಡೆಸಲಾಗುವುದು. ಈ ಸಂದರ್ಭದಲ್ಲಿ ದೇಹದ ತಾಪಮಾನ ಹೆಚ್ಚಾಗಿದ್ದರೆ ಹೋಟೆಲ್ ಪ್ರವೇಶಕ್ಕೆ ಅನುಮತಿ ನೀಡಲಾಗದು.
ಹೋಟೆಲ್ಗೆ ಬರುವವರು ಕಡ್ಡಾಯವಾಗಿ ಮಾಸ್ಕ್ ಧರಿಸಿರಬೇಕು. ಗ್ರಾಹಕರಿಗೆ ಕುಡಿಯಲು ಬಿಸಿನೀರು ಕೊಡಲಾಗುವುದು. ಒಂದು ಟೇಬಲ್ಗೆ ಒಬ್ಬರಿಗೆ ಮಾತ್ರ ಕೂರಲು ಅವಕಾಶ. ಕುಟುಂಬ ಸಮೇತರಾಗಿ ಬಂದರೆ ಪರಸ್ಪರ ಅಂತರ ಕಾಯ್ದುಕೊಂಡು ಕುರ್ಚಿಗಳನ್ನು ಇಡಲಾಗುವುದು.
ಹೋಟೆಲ್ನ ಹವಾನಿಯಂತ್ರಿತ ಕೊಠಡಿಗಳನ್ನು ತಾತ್ಕಾಲಿಕವಾಗಿ ಬಂದ್ ಮಾಡಲಾಗಿದೆ. ಸರ್ಕಾರದ ಆದೇಶ ಬರುವವರೆಗೆ ಇವುಗಳನ್ನು ಪ್ರಾರಂಭಿಸದಿರಲು ಹೋಟೆಲ್ ಮಾಲೀಕರು ನಿರ್ಧರಿಸಿದ್ದಾರೆ.
ಹುಬ್ಬಳ್ಳಿಯಲ್ಲಿ ಸುಮಾರು 2 ಸಾವಿರ ಹೋಟೆಲ್ಗಳಿದ್ದು, ಇವುಗಳಲ್ಲಿ ಸುಮಾರು 400 ಹೋಟೆಲ್ಗಳು ಸಂಘದಲ್ಲಿ ಹೆಸರು ನೋಂದಾಯಿಸಿವೆ. ಎಲ್ಲರಿಗೂ ಅನುಸರಿಸಬೇಕಾದ ನಿಯಮಗಳ ಬಗ್ಗೆ ಸೂಚಿಸಲಾಗಿದೆ ಎಂದು ಹುಬ್ಬಳ್ಳಿ ಹೋಟೆಲ್ ಮಾಲೀಕರ ಸಂಘದ ಅಧ್ಯಕ್ಷ ಸುಕುಮಾರ ಶೆಟ್ಟಿ ‘ವಿಜಯವಾಣಿ’ಗೆ ತಿಳಿಸಿದರು.