ಮುಂಬೈ: ದೇಶಾದ್ಯಂತ ಸಂಚಲನ ಮೂಡಿಸಿದ್ದ 1993ರ ಮುಂಬೈ ಸರಣಿ ಸ್ಪೋಟದ ಅಪರಾಧಿ ಯೂಸುಫ್ ಮೆಮೋನ್ ಜೈಲಿನಲ್ಲೇ ಮೃತಪಟ್ಟಿದ್ದಾನೆ. ಮಹಾರಾಷ್ಟ್ರದ ನಾಶಿಕ್ ಜಿಲ್ಲೆಯ ನಾಶಿಕ್ ರೋಡ್ ಪ್ರಿಸನ್ನಲ್ಲಿ ಸೆರೆಮನೆ ವಾಸ ಅನುಭವಿಸುತ್ತಿದ್ದ ಯೂಸುಫ್ ಶುಕ್ರವಾರ ಮೃತಪಟ್ಟದ್ದಾಗಿ ಪೊಲೀಸ್ ಆಯುಕ್ತ ವಿಶ್ವಾಸ್ ನಗ್ರೆ ಪಾಟೀಲ್ ಹೇಳಿದ್ದಾರೆ.
ಇದೇ ಪ್ರಕರಣದಲ್ಲಿ ತಲೆಮರೆಸಿಕೊಂಡಿರುವ ಕುಖ್ಯಾತ ಪಾತಕಿ ಟೈಗರ್ ಮೆಮೊನ್ನ ಸಹೋದರ ಈ ಯೂಸುಫ್ ಮೆಮೋನ್. ಮರಣ ಹೇಗೆ ಸಂಭವಿಸಿತು ಎಂಬ ಅಂಶ ಬಹಿರಂಗವಾಗಿಲ್ಲ. ಮೃತದೇಹವನ್ನು ಮಹಜರಿಗಾಗಿ ಧುಲೆಗೆ ಕಳುಹಿಸಲಾಗಿದೆ ಎಂದು ಜೈಲಿನ ಅಧಿಕಾರಿಗಳು ತಿಳಿಸಿದ್ದಾಗಿ ವರದಿಯಾಗಿದೆ.
ಇದನ್ನೂ ಓದಿ: ಬೆಳಗ್ಗೆ ನಡೆಯಬೇಕಿದ್ದ ಮದುವೆ ರಾತ್ರೋರಾತ್ರಿ ರದ್ದು, ವಧು-ವರ ಒಂದಾಗುವ ಕ್ಷಣಕ್ಕೆ ಭಂಗ ತಂದಿದ್ದೇನು?
ಸರಣಿ ಬಾಂಬ್ ಸ್ಫೋಟದ ಪಿತೂರಿಯನ್ನು ದಾವೂದ್ ಇಬ್ರಾಹಿಂ ಜತೆಗೂಡಿ ನಡೆಸಿದ ಟೈಗರ್ಮೆಮೋನ್ ಈ ಕೃತ್ಯದ ಮಾಸ್ಟರ್ ಮೈಂಡ್ ಎಂದು ಆರೋಪಿಸಲಾಗುತ್ತಿದೆ. ಈ ಭಯೋತ್ಪಾದನಾ ಕೃತ್ಯಗಳಿಗೆ ಮುಂಬೈನಲ್ಲಿರುವ ಅಲ್ ಹುಸೇನಿ ಬಿಲ್ಡಿಂಗ್ನ ಗ್ಯಾರೇಜ್ ಮತ್ತು ತನ್ನ ಫ್ಲ್ಯಾಟ್ ಅನ್ನು ಬಿಟ್ಟುಕೊಟ್ಟ ಆರೋಪದಂತೆ ಯೂಸುಫ್ ಬಂಧನವಾಗಿತ್ತು. ಕೃತ್ಯಗಳಲ್ಲಿ ಆತ ಭಾಗಿಯಾಗಿರುವುದು ಖಚಿತವಾಗಿ ಸಜೆ ಆಗಿತ್ತು. ವಿಶೇಷ ಟಾಡಾ ಕೋರ್ಟ್ ಯೂಸುಫ್ಗೆ ಜೀವಾವಧಿ ಶಿಕ್ಷೆ ವಿಧಿಸಿತ್ತು.
ಟೈಗರ್ ಮೆಮೋನ್ನ ಇನ್ನೊಬ್ಬ ಸಹೋದರ ಯಾಕುಬ್ ಮೆಮೋನ್ ನ್ನು ಇದೇ ಕೇಸ್ನಲ್ಲಿ ಬಂಧಿಸಲಾಗಿತ್ತು. ಅಪರಾಧ ಸಾಬೀತಾದ ಕಾರಣ 2015ರಲ್ಲಿ ಈತನನ್ನು ಮರಣದಂಡನೆ ಶಿಕ್ಷೆಗೆ ಒಳಪಡಿಲಸಾಗಿತ್ತು. 1993ರ ಮಾರ್ಚ್ 12ರಂದು ನಡೆದ ಸರಣಿ ಬಾಂಬ್ ಸ್ಫೋಟದಲ್ಲಿ 12 ಬಾಂಬ್ಗಳು ಬೇರೆ ಬೇರೆ ಸ್ಥಳಗಳಲ್ಲಿ ಸ್ಫೋಟಿಸಿದ್ದು ಕನಿಷ್ಠ 250 ಜನ ಮೃತಪಟ್ಟು ನೂರಾರು ಜನ ಗಾಯಗೊಂಡಿದ್ದರು. (ಏಜೆನ್ಸೀಸ್)