ಜೆರುಸಲೇಮ್: ಮಹಾಮಾರಿ ಕರೊನಾ ವೈರಸ್ ಬಂದಾಗಿನಿಂದ ಫೇಸ್ ಮಾಸ್ಕ್ ಜೀವನದ ಭಾಗವಾಗಿದೆ. ಇದರಲ್ಲೂ ಅನೇಕ ರೀತಿಯ ವಿಭಿನ್ನತೆಯನ್ನು ನಾವು ಕಂಡಿದ್ದೇವೆ. ಅದರಲ್ಲೂ ಕೆಲವರು ಚಿನ್ನ ಅಥವಾ ಡೈಮಂಡ್ನಲ್ಲಿ ಮಾಸ್ಕ್ ಮಾಡಿಸಿಕೊಂಡು ತಮ್ಮ ಸ್ಟೇಟಸ್ ಪ್ರದರ್ಶನ ಮಾಡಿದವರು ಇದ್ದಾರೆ.
ಇದೀಗ ಇಸ್ರೇಲ್ನ ಜ್ಯುವೆಲ್ಲರಿ ಕಂಪನಿಯೊಂದು ತಾನು ದುಬಾರಿ ಮಾಸ್ಕ್ ಅನ್ನು ತಯಾರಿಸುವುದರಲ್ಲಿ ನಿರತರಾಗಿರುವುದಾಗಿ ಘೋಷಿಸಿದೆ. ಚಿನ್ನ ಮತ್ತು ವಜ್ರದಿಂದ ಸುತ್ತುವರಿದ ಈ ಮಾಸ್ಕ್ ವಿಶ್ವದಲ್ಲೇ ದುಬಾರಿ ಮಾಸ್ಕ್ ಆಗಿರಲಿದೆ ಎಂದಿದ್ದಾರೆ.
ಇನ್ನು ಈ ಮಾಸ್ಕ್ ಅನ್ನು ಅಮೆರಿಕದಲ್ಲಿ ವಾಸವಿರುವ ಚೀನಾದ ಶಾಂಗೈ ನಗರದ ಅನಾಮಿಕ ಬಿಲಿಯನೇರ್ಗಾಗಿ ತಯಾರಿಸಲಾಗುತ್ತಿದೆ. ಮಾಸ್ಕ್ ತಯಾರಿಸಿ ಆತನಿಗೆ ನೀಡಲು ಡಿಸೆಂಬರ್ 31ರ ಗಡವು ನೀಡಲಾಗಿದೆ.
18 ಕ್ಯಾರೆಟ್ ವೈಟ್ ಗೋಲ್ಡ್ ಮಾಸ್ಕ್ ಅನ್ನು 3,600 ಕಪ್ಪು ವಜ್ರದಿಂದ ಅಲಂಕರಿಸಲಾಗಿದೆ. ಅದಕ್ಕೆ ಉನ್ನತ ಮಟ್ಟದ ಎನ್99 ಫಿಲ್ಟರ್ ಅಳವಡಿಸಲಾಗಿದೆ. ಇದನ್ನು ಒರ್ನಾ ಆ್ಯಂಡ್ ಇಸಾಕ್ ಲೆವಿ ಎಂಬುವರು ಡಿಸೈನ್ ಮಾಡಿದ್ದಾರೆ. ಇದರ ಬೆಲೆ 1.5 ಮಿಲಿಯನ್ ಡಾಲರ್. ಭಾರತೀಯ ಕರೆನ್ಸಿ ಪ್ರಕಾರ ಬರೋಬ್ಬರಿ 11 ಕೋಟಿ ರೂ. ಆಗಿದೆ.
ಇನ್ನು ಈ ಬಗ್ಗೆ ಮಾತನಾಡಿರುವ ವಿನ್ಯಾಸಗಾರ ಲೆವಿ, ಬಹುಶಃ ಹಣ ಎಲ್ಲವನ್ನು ಕೊಳ್ಳಲು ಸಾಧ್ಯವಿಲ್ಲ. ಆದರೆ, ಈ ದುಬಾರಿ ಮಾಸ್ಕ್ ಧರಿಸಿ ತಿರುಗಾಡುವುದರಿಂದ ಆತ ಎಲ್ಲರ ಗಮನ ಸೆಳೆಯುತ್ತಾನೆ. ಅದರಲ್ಲೇ ಆತ ಸಂತೋಷ ಕಾಣುತ್ತಾನೆ ಎಂದಿದ್ದಾರೆ.
ದುಬಾರಿ ಮಾಸ್ಕ್ ಸುಮಾರು 270 ಗ್ರಾಂ ತೂಗುತ್ತದೆ. ಇದು ಧರಿಸಲು ಆರಾಮದಾಯಕವಾಗಿರುವುದಿಲ್ಲ ಎನ್ನುತ್ತಾರೆ ತಯಾರಕರು. ಆದರೂ, ಸ್ಟೇಟಸ್ ಪ್ರದರ್ಶನಕ್ಕಾಗಿ ಈ ಮಾಸ್ಕ್ ಪಡೆಯಲಿದ್ದಾರೆ ಎಂದು ತಿಳಿದುಬಂದಿದೆ. (ಏಜೆನ್ಸೀಸ್)
ಉದ್ಯಮಿ ಮಗಳ ದಾರುಣ ಅಂತ್ಯ: ಐಶಾರಾಮಿ ಜೀವನವಿದ್ರೂ ಆತ್ಮಹತ್ಯೆಗೆ ಶರಣಾಗಿದ್ದೇಕೆ ಈ ಸುಂದರಿ?