ಬೆಂಗಳೂರು: ದೇಶದ ನೇರ ಮಾರಾಟ ವಲಯದಲ್ಲಿ 78 ಸಾವಿರ ಮಂದಿ ಸ್ವ-ಉದ್ಯೋಗದಲ್ಲಿ ತೊಡಗಿಸಿಕೊಂಡಿದ್ದಾರೆ. ಈ ಪೈಕಿ ರಾಜ್ಯದಲ್ಲಿ 34 ಸಾವಿರ ಮಹಿಳೆಯರು ರೂ. 1128 ಕೋಟಿ ವ್ಯವಹಾರ ನಡೆಸಿದ್ದು, ಶೇ.9.09ಕ್ಕೂ ಹೆಚ್ಚು ಪ್ರಗತಿ ಸಾಧಿಸಿದ್ದಾರೆ. ಇದರಿಂದ ದಕ್ಷಿಣ ವಲಯದಲ್ಲಿ ಕರ್ನಾಟಕ ಮೊದಲ ಸ್ಥಾನ ಪಡೆದುಕೊಂಡಿದೆ ಎಂದು ಭಾರತೀಯ ನೇರ ಮಾರಾಟ ಒಕ್ಕೂಟ (ಐಡಿಎಸ್ಎ) ತಿಳಿಸಿದೆ.
ಮಂಗಳವಾರ ನಡೆದ ವಾರ್ಷಿಕ ಸಮಾವೇಶದಲ್ಲಿ ಐಡಿಎಸ್ಎ ಅಧ್ಯಕ್ಷ ರಜತ್ ಬ್ಯಾನರ್ಜಿ ಸಮೀಕ್ಷಾ ವರದಿ ಬಿಡುಗಡೆ ಮಾಡಿದರು. ಬಳಿಕ ಮಾತನಾಡಿ, ನೇರ ಮಾರಾಟ ವಲಯದಲ್ಲಿ ಕರ್ನಾಟಕ ಪ್ರಮುಖ ಮಾರುಕಟ್ಟೆಯಾಗಿದೆ. ದೇಶದ 84 ಲಕ್ಷ ಜನರಿಗೆ ನೇರ ಮಾರಾಟ ವಲಯ ಸ್ವಯಂ ಉದ್ಯೋಗ ಕಲ್ಪಿಸಿಕೊಟ್ಟಿದೆ. ಐಡಿಎಸ್ಎಯ 19 ಸದಸ್ಯ ಕಂಪೆನಿಗಳು ಗ್ರಾಹಕರ ಮತ್ತು ರಾಜ್ಯದ 78 ಸಾವಿರ ನೇರ ಮಾರಾಟಗಾರರ ಹಿತಾಸಕ್ತಿಗಳನ್ನು ರಕ್ಷಿಸುತ್ತಿದೆ ಎಂದು ತಿಳಿಸಿದರು.
ಇದನ್ನೂ ಓದಿ: ರಶ್ಮಿಕಾ ಮಂದಣ್ಣ ಅವರನ್ನು ಅನ್ಯ ಭಾಷೆಯ ಚಿತ್ರಗಳಲ್ಲಿ ನೋಡಿದಾಗ….: ನಟಿ ಚೈತ್ರಾ ಜೆ.ಆಚಾರ್
ಸ್ವ-ಉದ್ಯೋಗ ಮುಖಾಂತರ ನಿರುದ್ಯೋಗ ಸಮಸ್ಯೆ ನಿವಾರಣೆ ಮಾಡಲು ಸಾಧ್ಯವಿದೆ. ಎಲ್ಲ ದೇಶಗಳಲ್ಲಿ ನೇರ ಮಾರಾಟ ಉದ್ಯಮವಿದ್ದು, ಇದಿರಿಂದ ಗುಣಮಟ್ಟದ ವಸ್ತುಗಳು ಸಿಗುತ್ತಿವೆ. ಸುಮಾರು 50 ಲಕ್ಷದಷ್ಟು ಮಹಿಳೆಯರು ಈ ವಲಯದಲ್ಲಿ ಸ್ವಾವಲಂಬಿಗಳಾಗಿ ಬದುಕು ಕಟ್ಟಿಕೊಂಡಿದ್ದಾರೆ ಎಂದು ನಿವೃತ್ತ ಪೊಲೀಸ್ ಆಯುಕ್ತ ಶಂಕರ್ ಬಿದರಿ ಹೇಳಿದರು.
ಈ ಸಂದರ್ಭದಲ್ಲಿ ಆಹಾರ ಸರಬರಾಜು ಮತ್ತು ಗ್ರಾಹಕ ವ್ಯವಹಾರಗಳ ಉಪ ನಿರ್ದೇಶಕಿ ಪ್ರೀತಿ ಚಂದ್ರಶೇಖರ್, ಐಡಿಎಸ್ಎ ಉಪಾಧ್ಯಕ್ಷ ವಿವೇಕ್ ಕಟೋಚಿ, ಕಾರ್ಯದರ್ಶಿ ಅಪ್ರಜಿತ ಸರ್ಕಾರ್, ಪ್ರಧಾನ ವ್ಯವಸ್ಥಾಪಕ ಚೇತನ್ ಭಾರಧ್ವಾಜ್ ಮತ್ತಿತರರಿದ್ದರು.