ಬೆಂಗಳೂರು: ಈಕೆ ಕಳ್ಳತನ ಮಾಡುವುದೇ ಒಂದು ರೋಚಕ ಕಥೆ. ಆದರೆ ತನಿಖೆ ಮಾಡುವ ವೇಳೆ ಪೊಲೀಸರಿಗೆ ಈ ಮಹಿಳೆ ರೋಚಕ ಮಾಹಿತಿ ಹೊರ ಹಾಕಿದ್ದು ಎಲ್ಲರನ್ನೂ ನಿಬ್ಬೆರಗು ಮಾಡಿದೆ. ಈಕೆ ಹೇಳಿದ ಕಥೆ ಕೇಳಿದ ಪೊಲೀಸರೇ ಶಾಕ್ ಆಗಿ ಹೆಚ್ಚಿನ ತನಿಖೆಯಲ್ಲಿ ತೊಡಗಿದ್ದಾರೆ.
ನರ್ಸ್ ರೂಪದಲ್ಲಿ ಈಕೆ ಮಹಿಳೆಯರಿಂದ ಚಿನ್ನಾಭರಣ ಕಳವು ಮಾಡುತ್ತಿದ್ದಳು. ಈಕೆ ರೋಗಿಗಳನ್ನು ಚೆಕ್ ಮಾಡುವ ನೆಪದಲ್ಲಿ ಉಂಗುರ, ಚಿನ್ನದ ಸರ, ಮುಂತಾದ ಆಭರಣಗಳನ್ನು ಕದಿಯುತ್ತಿದ್ದಳು. ಹೀಗೆ ಅಶೋಕ ನಗರದ ಖಾಸಗಿ ಆಸ್ಪತ್ರೆಯಲ್ಲಿ ರೋಗಿಗಳಿಂದ ಚಿನ್ನಾಭರಣ ಕದ್ದು ಈಕೆ ಅಲ್ಲಿಂದ ಕಾಲ್ಕಿತ್ತಿದ್ದಳು. ಸಿಸಿಟಿವಿ ಆಧಾರದ ಮೇಲೆ ಆಕೆಯನ್ನು ಬಂಧಿಸಿದ ಪೊಲೀಸರು ವಿಚಾರಣೆ ನಡೆಸಿದ್ದಾಳೆ. ಈ ಸಂದರ್ಭ ಆಕೆ ತನ್ನ ಅಳಲನ್ನು ತೋಡಿಕೊಂಡಿದ್ದು ಪೊಲೀಸರಿಗೇ ಆಶ್ಚರ್ಯ ಉಂಟುಮಾಡುವ ಕಥೆಯನ್ನು ಹೇಳಿದ್ದಾಳೆ.
ಲಕ್ಷ್ಮಿ ಹೆಸರಿನ ಈಕೆ ಖಾಸಗಿ ಆಸ್ಪತ್ರೆಯೊಂದರಲ್ಲಿ ನರ್ಸ್ ಆಗಿ ಕೆಲಸ ನಿರ್ವಹಿಸುತ್ತಿದ್ದು ಈಕೆಗೆ ಕೆಲಸದ ಸ್ಥಳದಲ್ಲಿ ವ್ಯಕ್ತಿಯೊಬ್ಬನ ಪರಿಚಯವಾಗಿದೆ. ಈ ವೇಳೆ ಮಹಿಳೆಯ ಪೋಟೊಗಳನ್ನು ಇಟ್ಟುಕೊಂಡು ಬ್ಲಾಕ್ ಮೇಲ್ ಮಾಡಲು ಆ ವ್ಯಕ್ತಿ ಮುಂದಾಗಿದ್ದಾನೆ. ನಿತ್ಯವೂ ಹಣ ನೀಡುವಂತೆ ಮಹಿಳೆಗೆ ಬ್ಲಾಕ್ ಮೇಲ್ ಮಾಡುತ್ತಿದ್ದ. ತನ್ನನ್ನು ತಾನು ಬಚಾವ್ ಮಾಡಿಕೊಳ್ಳಲು ಮಹಿಳೆ ಕಳ್ಳತನಕ್ಕೆ ಇಳಿದಿದ್ದಾಳೆ.
ಈಗ ಈಕೆ ನಿಡಿರುವ ಮಾಹಿತಿ ಆಧಾರದ ಮೇಲೆ ಆಕೆಗೆ ಬ್ಲಾಕ್ ಮೇಲ್ ಮಾಡಿದ ಅಸಾಮಿಗೂ ಪೊಲೀಸರು ಶೋಧ ನಡೆಸುತ್ತಿದ್ದಾರೆ. ಸದ್ಯ ಅಶೋಕನಗರ ಪೊಲೀಸರು ತನಿಖೆಯನ್ನು ಮುಂದುವರೆಸುತ್ತಿದ್ದಾರೆ.