ನವದೆಹಲಿ: ಎರಡು ದಿನಗಳ ಭಾರತ ಪ್ರವಾಸಕ್ಕೆ ಆಗಮಿಸಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಥಮ ಮಹಿಳೆ ಮೆಲಾನಿಯಾ ಟ್ರಂಪ್ ಅವರನ್ನು ಪ್ರಧಾನಿ ನರೇಂದ್ರ ಮೋದಿ ಅವರಿಂದು ಅಹಮದಾಬಾದ್ನ ಸರ್ದಾರ್ ವಲ್ಲಭಭಾಯಿ ಪಟೇಲ್ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಬರಮಾಡಿಕೊಂಡರು. ಈ ವೇಳೆ ಟ್ರಂಪ್ ದಂಪತಿ ಜತೆಯಲ್ಲೇ ಬರುತ್ತಿದ್ದ ಮಹಿಳೆಯನ್ನು ಫೋಟೋಗ್ರಾಫರ್ ಸೆರೆಹಿಡಿದಿದ್ದರು.
ಆ ಮಹಿಳೆ ವಿಮಾನ ನಿಲ್ದಾಣದಿಂದ ಸಬರಮತಿ ಆಶ್ರಮದವರೆಗೂ ಟ್ರಂಪ್ ದಂಪತಿ ಜತೆಯಲ್ಲೇ ತೆರಳಿದರು. ಹೀಗಾಗಿ ಆ ಮಹಿಳೆ ಯಾರಿರಬಹುದೆಂಬ ಕುತೂಹಲ ಎಲ್ಲರಲ್ಲೂ ಮೂಡಿದ್ದು, ಅದಕ್ಕೆ ಉತ್ತರ ಮುಂದಿದೆ ಒಮ್ಮೆ ನೋಡಿ…
ಅಂದಹಾಗೆ ಮಹಿಳೆಯ ಹೆಸರು ಗುರ್ದೀಪ್ ಚಾವ್ಲಾ. ಈಕೆ ಇಂಡಿಯನ್-ಅಮೆರಿಕನ್ ಮಹಿಳೆ. ಡೊನಾಲ್ಡ್ ಟ್ರಂಪ್ ಭಾರತ ಭೇಟಿ ಹಿನ್ನೆಲೆಯಲ್ಲಿ ದುಭಾಷಿಯಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. 27 ವರ್ಷಗಳಿಂದ ದುಭಾಷಿಯಾಗಿ ಕೆಲಸ ಮಾಡುತ್ತಿದ್ದಾರೆ. 1990ರಲ್ಲಿ 21 ವರ್ಷ ವಯಸ್ಸಾಗಿದ್ದಾಗ ಭಾರತದ ಸಂಸತ್ತಿನಲ್ಲಿ ಮೊದಲು ಕೆಲಸ ಆರಂಭಿಸಿದರು.
ಅಮೆರಿಕ ಮಾಜಿ ಅಧ್ಯಕ್ಷ ಬರಾಕ್ ಒಬಾಮ ಅವರು 2015ರಲ್ಲಿ ಗಣರಾಜ್ಯೋತ್ಸವ ಪರೇಡ್ನಲ್ಲಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದಾಗಲೂ ಇವರು ದುಭಾಷಿಯಾಗಿ ಕಾರ್ಯನಿರ್ವಹಿಸಿದ್ದರು. ಯುಎಸ್/ಕೆನಡಾ ಮತ್ತು ಭಾರತ ನಡುವೆ ಉನ್ನತ ಮಟ್ಟದ ರಾಜಕೀಯ ಸಭೆಗಳು ನಡೆದಾಗಲೆಲ್ಲ ಇವರ ಉಪಸ್ಥಿತಿ ಇದ್ದೇ ಇರುತ್ತದೆ.
ಪ್ರಧಾನಿ ನರೇಂದ್ರ ಮೋದಿ ಅವರು ಮೊಟ್ಟ ಮೊದಲ ಬಾರಿಗೆ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಭಾಷಣ ಮಾಡಿದಾಗ ಗುರ್ದೀಪ್ ಚಾವ್ಲಾ ಅವರು ವ್ಯಾಖ್ಯಾನ ಮಾಡಿದ್ದರು. 2014ರಲ್ಲಿ ಮ್ಯಾಡಿಸನ್ ಸ್ಕ್ವೇರ್ನಲ್ಲಿ ನಡೆದ ಅದ್ಧೂರಿ ಸಮಾರಂಭದಲ್ಲೂ ಪ್ರಧಾನಿ ಮೋದಿ ಜತೆಯಲ್ಲಿದ್ದರು. ಬಳಿಕ ಯುಎಸ್ ಅಧ್ಯಕ್ಷರಾಗಿದ್ದ ಬರಾಕ್ ಒಬಾಮ ಜತೆ ಮಾತನಾಡಲು ಮೋದಿ ವಾಷಿಂಗ್ಟನ್ಗೆ ತೆರಳಿದಾಗಲೂ ಅವರೊಂದಿಗೆ ಗುರ್ದೀಪ್ ಚಾವ್ಲಾ ಕೂಡ ಹೋಗಿದ್ದರು. (ಏಜೆನ್ಸೀಸ್)