ನವದೆಹಲಿ: ಈ ಕಾಲದಲ್ಲಿ ಫ್ಯಾಷನ್ ಎಂಬುದು ದಿನೇದಿನೆ ಬದಲಾಗುತ್ತಿದೆ. ಫ್ಯಾಷನ್ ಲೋಕ ಅಕ್ಷರಶಃ ಬಣ್ಣಬಣ್ಣದ ಮಾಯಾಲೋಕವಾಗಿದೆ.
ಫ್ಯಾಷನ್ ಎಂಬುದು ಕೇವಲ ಮಹಿಳೆಯರಿಗೆ ಸೀಮಿತವಲ್ಲ, ಪುರುಷರಿಗೆ ಹೊಂದುವ ವಿವಿಧ ವೇಷಭೂಷಣಗಳೂ ಈಗೀಗ ಪ್ರಸಿದ್ಧಿಯಾಗುತ್ತಿವೆ. ಒಮ್ಮೊಮ್ಮೆ ಅತಿ ಎನ್ನುವ, ವಿಚಿತ್ರ ಎನ್ನಿಸುವ ಉಡುಪುಗಳೂ ಫ್ಯಾಷನ್ ಎಂದೇ ಪರಿಗಣಿಸಲ್ಪಟ್ಟಿವೆ. ಈಗ ಇಂತದ್ದೇ ಒಂದು ವಿಚಿತ್ರ ಉಡುಪು, ಫ್ಯಾಷನ್ ಎಂಬ ಹೆಸರು ಪಡೆದುಕೊಂಡು ಇಂಟರ್ನೆಟ್ನಲ್ಲಿ ಸಂಚಲನ ಮೂಡಿಸುತ್ತಿದೆ. ನೆಟ್ಟಿಗರು ನಗುತ್ತಿದ್ದಾರೆ. ಸಿಕ್ಕಾಪಟೆ ಮೀಮ್ಸ್ಗಳ ಮೂಲಕ ಕಾಲೆಳೆಯುತ್ತಿದ್ದಾರೆ.
ಅಷ್ಟಕ್ಕೂ ಇದು ಪುರುಷರ ಪ್ಯಾಂಟ್ಗೆ ಸಂಬಂಧಪಟ್ಟ ವಿಷಯ. ಈ ಹೊಸ ವಿನ್ಯಾಸದ ಲ್ಯಾಟೆಕ್ಸ್ ಪ್ಯಾಂಟ್ ಬಗ್ಗೆ ಇಂಟರ್ನೆಟ್ನಲ್ಲಿ ಸಿಕ್ಕಾಪಟೆ ಚರ್ಚೆಯಾಗುತ್ತಿದೆ. ಅದನ್ನು ಟೀಕಿಸುವ ಮೀಮ್ಸ್ಗಳನ್ನು ನೆಟ್ಟಿಗರು ಸಾಲುಸಾಲಾಗಿ ಹರಿಬಿಡುತ್ತಿದ್ದಾರೆ.
ವಸ್ತ್ರ ವಿನ್ಯಾಸಕಾರ ಹರಿಕೃಷ್ಣ ಎಂಬುವರು ಪುರುಷರ ಲ್ಯಾಟೆಕ್ಸ್ ಪ್ಯಾಂಟನ್ನು ಪರಿಚಯಿಸಿದ್ದಾರೆ. ಆದರೆ ಇದು ನಾರ್ಮಲ್ ಆಗಿ ಇಲ್ಲ. ಬದಲಾಗಿ ಗಾಳಿ ತುಂಬಿದ ಲ್ಯಾಟೆಕ್ಸ್ ಪ್ಯಾಂಟ್ಗಳು. ಪುರುಷ ರೂಪದರ್ಶಿಗಳು ಈ ಉಬ್ಬಿದ ಪ್ಯಾಂಟ್ಗಳನ್ನು ಧರಿಸಿ, ಮುಖದಲ್ಲಿ ಕಿಂಚಿತ್ತೂ ಭಾವವಿಲ್ಲದೆ ಕ್ಯಾಟ್ವಾಕ್ ಮಾಡುತ್ತಿರುವ ಫೋಟೋಗಳು ವೈರಲ್ ಆಗಿವೆ. ಗಾಳಿ ತುಂಬಬಹುದಾದದ ಈ ಲ್ಯಾಟೆಕ್ಸ್ ಪ್ಯಾಂಟ್ಗಳು ಉಬ್ಬಿಕೊಂಡಿರುವ ಪ್ಯಾರಾಚೂಟ್ನಂತೆ, ಬಲೂನುಗಳಂತೆ ಕಾಣುತ್ತವೆ. ಆಯಾ ಪ್ಯಾಂಟ್ಗಳಿಗೆ ತಕ್ಕಂತೆ, ಅದಕ್ಕೆ ಹೊಂದಿಕೊಳ್ಳುವ ಬ್ಲೇಜರ್ಗಳನ್ನು, ಜಾಕೆಟ್ಗಳನ್ನೂ ವಿನ್ಯಾಸ ಮಾಡಲಾಗಿದೆ. ಲ್ಯಾಟೆಕ್ಸ್ ಪ್ಯಾಂಟ್ಗಳಿಗೆ 3-D ಸ್ಪರ್ಶವನ್ನೂ ಕೊಡಲಾಗಿದೆ.
ಹೊಸ ವಿನ್ಯಾಸದ ಲ್ಯಾಟೆಕ್ಸ್ ಪ್ಯಾಂಟ್ಗಳು ಸೊಂಟದ ಬಳಿ ಫಿಟ್ ಆಗಿರುತ್ತವೆ. ಅದೆ ಕೆಳಗೆ ಬರುತ್ತಲೇ ಉಬ್ಬಿಕೊಂಡಿರುತ್ತವೆ. ಹಾಗೇ ಪಾದದ ಬಳಿ ಪ್ಯಾಂಟ್ನ ತುದಿ ಬಿಗಿಯಾಗಿರುತ್ತದೆ. ಇದು ನೋಡಲು ಥೇಟ್ ಬಲೂನ್ಗಳಂತೆ ಕಾಣುತ್ತವೆ.
ಈ ಪ್ಯಾಂಟ್ಗಳನ್ನು ಪರಿಚಯಿಸಿರುವ ಹರಿಕೃಷ್ಣ ಅವರು ಲಂಡನ್ನ ಕಾಲೇಜೊಂದರಲ್ಲಿ ಫ್ಯಾಷನ್ ಪದವಿ ಪಡೆಯುತ್ತಿದ್ದಾರೆ.
ಇಂಥ ಬಲೂನ್ ಮಾದರಿಯ ಪ್ಯಾಂಟ್ಗಳು ತುಂಬ ಕಡಿಮೆ ಸಮಯದಲ್ಲಿ ನೆಟ್ಟಿಗರ ಗಮನ ಸೆಳೆದಿವೆ. ಕೆಲವರು ಡಿಸೈನರ್ ಹರಿಕೃಷ್ಣ ಅವರ ಕ್ರಿಯಾಶೀಲತೆಯನ್ನು ಸಿಕ್ಕಾಪಟ್ಟೆ ಹೊಗಳುತ್ತಿದ್ದಾರೆ. ಇವು ಭವಿಷ್ಯದ ಪ್ಯಾಂಟ್ಗಳು ಎನ್ನುತ್ತಿದ್ದಾರೆ.
ಇನ್ನು ಈ ಬಗ್ಗೆ ಡಿಸೈನರ್ ಹರಿಕೃಷ್ಣ ಮಾತನಾಡಿದ್ದು, ನನಗೆ ಈ ಪ್ಯಾಂಟ್ ವಿನ್ಯಾಸ ತಲೆಯಲ್ಲಿ ಬಂದಿದ್ದು ನನ್ನ ನಾಯಿಯ ಜತೆ ಆಡುವಾಗ. ಆ ನಾಯಿಯ ಮೊಲೆಗಳು ಅಷ್ಟು ಚಿಕ್ಕದಾಗಿ ಇರುತ್ತದೆ. ಆದರೆ ಮರಿಗಳು ಹುಟ್ಟಿದಾಗ ಅವು ಜೋತುಬಿದ್ದಂತಾಗುತ್ತವೆ. ಅದನ್ನು ನೋಡಿಯೇ ನಾನು ಪ್ಯಾಂಟ್ಗಳನ್ನು ವಿನ್ಯಾಸಗೊಳಿಸಿದ್ದೇನೆ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)