ಬೆಂಗಳೂರು: ಇತ್ತೀಚೆಗಷ್ಟೇ ಕೊವಿಡ್-19 ಸೋಂಕಿತರಾಗಿರುವ ಐಪಿಎಸ್ ಅಧಿಕಾರಿಯೋರ್ವರ ವಿರುದ್ಧ ಮಹಿಳೆಯೋರ್ವರು ಗಂಭೀರ ಆರೋಪ ಮಾಡಿದ್ದಾರೆ. ಐಪಿಎಸ್ ಅಧಿಕಾರಿ ಹಾಗೂ ಅವರ ಕುಟುಂಬದಿಂದ ನಾನು ದೌರ್ಜನ್ಯಕ್ಕೆ ಒಳಗಾಗಿದ್ದೇನೆ ಎಂದು ಫೇಸ್ಬುಕ್ನಲ್ಲಿ ಬರೆದುಕೊಂಡಿದ್ದಾರೆ.
ಐ-ಮಾನಿಟರಿ ಅಡ್ವೈಸರಿ (ಐಎಂಎ) ಹಗರಣದಲ್ಲಿ ಕೂಡ ಈ ಐಪಿಎಸ್ ಅಧಿಕಾರಿಯ ಹೆಸರು ಕೇಳಿಬಂದಿದೆ. ಇದೀಗ ಮಹಿಳೆಯೋರ್ವರು ದೌರ್ಜನ್ಯದ ಆರೋಪವನ್ನೂ ಮಾಡಿದ್ದಾರೆ. ಅವರ ಮನೆಯ ಅಕ್ಕಪಕ್ಕದ ಮನೆಗಳಲ್ಲಿರುವವರ ಮೇಲೆ ದಬ್ಬಾಳಿಕೆ ಮಾಡುತ್ತಾರೆ ಎಂದು ಪೋಸ್ಟ್ ಮಾಡಿರುವ ಅವರು, ತಮಗಾದ ಕೆಟ್ಟ ಅನುಭವವನ್ನು ಹೇಳಿಕೊಂಡಿದ್ದಾರೆ.
ನಮ್ಮ ಮನೆಯ ಎರಡು ಅಂತಸ್ತಿನ ಕೆಳಗೆ ಈ ಐಪಿಎಸ್ ಅಧಿಕಾರಿಯ ಮನೆ ಇದೆ. ಅವರ ಎಂಟು ವರ್ಷದ ಮಗ ಆಟವಾಡುವಾಗ ಜೋರಾಗಿ ಅರಚುತ್ತಿದ್ದ. ನಾನು ಪೊಲೀಸ್ ಅಧಿಕಾರಿಯ ಪತ್ನಿಗೆ ವಿನಯದಿಂದಲೇ ಅದನ್ನು ಹೇಳಿದ್ದ. ಮಗ ತುಂಬ ಗಲಾಟೆ ಮಾಡುತ್ತಾನೆ. ಅದನ್ನು ತಪ್ಪಿಸಿ ಎಂದಿದ್ದೆ. ಅದಾದ ಮೇಲೆ 8 ಜನ ಪೊಲೀಸ್ ಸಿಬ್ಬಂದಿ ನಮ್ಮ ಮನೆಗೆ ಬಂದರು. ನಮಗೆ ಬಾಯಿಗೆ ಬಂದಂತೆ ಬೈದರು. ಅಷ್ಟೇ ಅಲ್ಲ, ಮಕ್ಕಳ ಮೇಲೆ ದೌರ್ಜನ್ಯ ಮಾಡಿದ್ದೀರಿ ಎಂದು ಕೂಗಾಡಿದರು. ಇದನ್ನೂ ಓದಿ: ಸಿಂಧೂರ ಇಡಲು ಒಪ್ಪದ ಪತ್ನಿಗೆ ಡಿವೋರ್ಸ್ ನೀಡಿದ ಪತಿ; ಆತನ ಸಹಾಯಕ್ಕೆ ಬಂದಿದ್ದು ಹೈಕೋರ್ಟ್ !
ಆಗ ನಾನು ಅವರ ಮನೆಗೇ ಹೋದೆ. ಪೊಲೀಸರನ್ನು ಕಳಿಸಿ ಬೆದರಿಸುವ ತಂತ್ರವನ್ನೆಲ್ಲ ಮಾಡಬೇಡಿ ಎಂದು ಹೇಳಿದೆ. ಆಗ ಅಧಿಕಾರಿಯ ಪತ್ನಿ ನನ್ನನ್ನು ಕೆಟ್ಟದಾಗಿ ನಿಂದಿಸಿದರು. ಹೇಳಬಾರದ ಶಬ್ದಗಳನ್ನೆಲ್ಲ ಹೇಳಿದರು. ಅಷ್ಟೇ ಅಲ್ಲ ಆಕೆ ನನ್ನ ಮುಖದ ಮೇಲೆ ಉಗುಳಿದ್ದಾಳೆ. ಆಕೆಯ ಪತಿಗೆ ಕೊವಿಡ್-19 ಪಾಸಿಟಿವ್ ಸೋಂಕು ಇದೆ. ಈಕೆಗೂ ಇರಬಹುದು. ಇದು ಮೊದಲಲ್ಲ..ಅನೇಕ ಬಾರಿ ಇಂಥದ್ದೇ ದೌರ್ಜನ್ಯವನ್ನು ಎಸಗಿದ್ದಾರೆ. ಅಕ್ಕಪಕ್ಕದಲ್ಲಿರುವ ನಮ್ಮೆಲ್ಲರ ಮೇಲೆ ದಬ್ಬಾಳಿಕೆ ಮಾಡುತ್ತಾರೆ ಎಂದು ಬರೆದಿದ್ದಾರೆ.
ಹಾಗೇ ಫೇಸ್ಬುಕ್ನಲ್ಲಿ ಬೆಂಗಳೂರು ಸಿಟಿ ಪೊಲೀಸ್, ಬೆಂಗಳೂರು ಸಿಟಿ ಪೊಲೀಸ್ ಡಿವಿಷನ್ ಫೇಸ್ಬುಕ್ಗಳನ್ನು ಟ್ಯಾಗ್ ಮಾಡಿದ್ದಾರೆ. (ಏಜೆನ್ಸೀಸ್)
ಸರಣಿ ಅನಿಲ ದುರಂತಕ್ಕೆ ಸಾಕ್ಷಿಯಾಗುತ್ತಿದೆ ವಿಶಾಖಪಟ್ಟಣ; ಮತ್ತಿಬ್ಬರ ಸಾವು, ಒಬ್ಬ ಗಂಭೀರ