ದಾವಣಗೆರೆ: ಕಿಸಾನ್ ಕಾರ್ಡ್ ಹೆಸರಲ್ಲಿ ರೈತರಿಗೆ ವಂಚನೆ ಮಾಡುತ್ತಿದ್ದ ಎನ್ಜಿಓ ಸಿಬ್ಬಂದಿಯನ್ನ ಕೂಡಿ ಹಾಕಿ ಗ್ರಾಮಸ್ಥರು ಥಳಿಸಿದ ಪ್ರಕರಣ ದಾವಣಗೆರೆ ತಾಲೂಕಿನ ಎಲೆಬೇತೂರು ಗ್ರಾಮದಲ್ಲಿ ನಡೆದಿದೆ.
ಈ ಎನ್ಜಿಒ ಸಿಬ್ಬಂದಿ, ಇ ಕಾರ್ಡ್ ಇದ್ದರೆ ರೈತರು ಸುಲಭವಾಗಿ ಸೌಲಭ್ಯಗಳನ್ನು ಪಡೆಯಬಹುದು ಎಂದು ನಂಬಿಸಿದ್ದರು. ಇವರು ಎಷ್ಟು ಚಾಲಾಕಿಗಳು ಎಂದರೆ ಎಲೆಬೇತೂರು ಗ್ರಾಮ ಪಂಚಾಯಿತಿಯಲ್ಲಿಯೇ ಕಾರ್ಡ್ ಮಾಡಿಕೊಡುತ್ತಿದ್ದರು. ಅಷ್ಟೇ ಅಲ್ಲದೇ ಡಿಸಿ, ತೋಟಗಾರಿಕೆ ಹಾಗೂ ಕೃಷಿ ಇಲಾಖೆ ಅನುಮತಿ ಪಡೆದಿದ್ದಾಗಿ ಸುಳ್ಳು ಹೇಳಿದ್ದರು.
ಈ ಎನ್ಜಿಓ ಸಿಬ್ಬಂದಿ ಮಾತು ನಂಬಿ 200 ರೂ. ನೀಡಿ 300 ಕ್ಕೂ ಅಧಿಕ ಜನ ಕಾರ್ಡ್ ಮಾಡಿಸಿದ್ದರು. ಆದರೆ ಕಾರ್ಡ್ ನಂಬರ್ ಮತ್ತು ಬಾರ್ ಕೋರ್ಡ್ ಕೆಲಸ ಮಾಡುತ್ತಿರಲಿಲ್ಲ. ಈ ಬಗ್ಗೆ ಸಿಬ್ಬಂದಿ ಬಳಿ ಕೇಳಿದರೆ ರೈತರಿಗೆ ಎನ್ಜಿಓ ಸಿಬ್ಬಂದಿ ಧಮಕಿ ಹಾಕಿದ್ದರು.
ಆಗ ಗ್ರಾಮಸ್ಥರು ಕೃಷಿ ಹಾಗೂ ತೋಟಗಾರಿಕೆ ಇಲಾಖೆ ಹಾಗೂ ತಾಪಂ ಇಓ ಬಳಿ ಕೇಳಿದಾಗ ಸತ್ಯಾಂಶ ಬಯಲಾಗಿದೆ. ಇವರು ಇಲಾಖೆಯ ಅನುಮತಿ ಪಡೆಯದೆ ಎನ್ಜಿಓ ಹೆಸರಲ್ಲಿ ರೈತರಿಗೆ ಕಾರ್ಡ್ ನೀಡುತ್ತಿದ್ದರು. ವಂಚನೆ ಸಂಶಯದ ಹಿನ್ನೆಲೆ ಸಿಬ್ಬಂದಿಯನ್ನು ಗ್ರಾಮಸ್ಥರು ಕೂಡಿ ಹಾಕಿದ್ದರು. ಬಳಿಕ ಸಿಬ್ಬಂದಿಯ ಜೊತೆಗೆ ಗ್ರಾಮಸ್ಥರ ವಾಗ್ವಾದ ನಡೆದಿದ್ದು ಆಗ ಸಿಬ್ಬಂದಿಯನ್ನ ಎಳೆದಾಡಿದ ಗ್ರಾಮಸ್ಥರು ಥಳಿಸಿದ್ದಾರೆ.
ಈ ಪ್ರಕರಣ ನಡೆದ ಕೂಡಲೆ ಸ್ಥಳಕ್ಕಾಗಮಿಸಿದ ಪೊಲೀಸರಿಗೆ ಗ್ರಾಮಸ್ಥರು ಎನ್ಜಿಓ ಸಿಬ್ಬಂದಿಯನ್ನು ಒಪ್ಪಿಸಿದ್ದಾರೆ.