ಟೋಕಿಯೋ: ಜಪಾನ್ನ ಬಂದರಿನಿಂದ ಬೇರ್ಪಟ್ಟು ಸಾಗರದ ಮಧ್ಯ ಯೊಕೊಹಾಮಾ ಎಂಬಲ್ಲಿ ಬೀಡುಬಿಟ್ಟಿರುವ ಕೊರೊನಾ ವೈರಸ್ (COVID-19 )ಪೀಡಿತರು ಇರುವ ಡೈಮಂಡ್ ಪ್ರಿನ್ಸ್ ಐಷಾರಾಮಿ ಹಡಗಿನಲ್ಲಿ ಭಾರತೀಯರು ಸೇರಿ ಹಲವು ದೇಶದವರು ಇದ್ದಾರೆ.
ನಮ್ಮನ್ನು ರಕ್ಷಿಸಿ ಎಂದು ಈಗಾಗಲೇ ಭಾರತೀಯ ಸಿಬ್ಬಂದಿ ಪ್ರಧಾನಿ ನರೇಂದ್ರ ಮೋದಿ ಸರ್ಕಾರಕ್ಕೆ ವಿಡಿಯೋ ಮೂಲಕ ಮನವಿ ಮಾಡಿದ್ದಾರೆ. ಈಗಾಗಲೇ ಇಬ್ಬರು ಭಾರತೀಯರಿಗೆ ವೈರಸ್ ತಗುಲಿದ್ದು ದೃಢಪಟ್ಟಿದೆ.
ಹಡಗಿನಲ್ಲಿರುವ ಭಾರತೀಯರ ಬಗ್ಗೆ ಕಾಳಜಿ ಮಾಡಲಾಗುತ್ತಿದ್ದು, ಅವರ ಆರೋಗ್ಯ ವಿಚಾರಕ್ಕೆ ಸಂಬಂಧಪಟ್ಟಂತೆ ಜಪಾನ್ ಅಧಿಕಾರಿಗಳೊಂದಿಗೆ ನಿರಂತರ ಸಂಪರ್ಕದಲ್ಲಿ ಇರುವುದಾಗಿ ಭಾರತೀಯ ರಾಯಭಾರಿ ಕಚೇರಿ ತಿಳಿಸಿದೆ.
ಈ ಮಧ್ಯೆ ಹಡಗಿನಲ್ಲಿರುವ ಅಮೆರಿಕನ್ನರನ್ನು ರಕ್ಷಿಸಲು ಯುಎಸ್ ಸರ್ಕಾರ ಮುಂದಾಗಿದೆ. ಹಡಗಿನಲ್ಲಿರುವ ಅಮೆರಿಕ ದೇಶದವರನ್ನು ಸ್ಥಳಾಂತರ ಮಾಡಲು ಉದ್ದೇಶಿಸಿರುವುದಾಗಿ ಅಲ್ಲಿನ ಯುಎಸ್ ರಾಯಭಾರಿ ಕಚೇರಿ ಹೇಳಿದೆ.
ಫೆಬ್ರವರಿ ಪ್ರಾರಂಭದಿಂದಲೂ ಜಪಾನ್ ಬಂದರಿನಿಂದ ಬೇರ್ಪಟ್ಟಿರುವ ಹಡಗು ಇರುವ ಜಾಗಕ್ಕೆ ಭಾನುವಾರ ವಿಮಾನವನ್ನು ಕಳಿಸಿ, ಅದರಲ್ಲಿರುವ ಯುಎಸ್ ನಾಗರಿಕರನ್ನು ಸ್ಥಳಾಂತರ ಮಾಡಲಾಗುವುದು. ಆದರೆ ಅವರು ಅಮೆರಿಕಕ್ಕೆ ಮರಳಿದ ನಂತರವೂ ಮತ್ತೂ ಎರಡು ವಾರಗಳ ಕಾಲ ನಿರ್ಬಂಧದಡಿಯಲ್ಲಿಯೇ ಇರಬೇಕಾಗುತ್ತದೆ. ಅವರ ಆರೋಗ್ಯದ ಬಗ್ಗೆಯೂ ಹೆಚ್ಚಿನ ನಿಗಾ ಇಡಲಾಗುವುದು ಎಂದು ಧೂತಾವಾಸ ಕಚೇರಿ ತಿಳಿಸಿದೆ. ಅಲ್ಲದೆ ಈ ಬಗ್ಗೆ ಹಡಗಿನಲ್ಲಿರುವ ಯುಎಸ್ ನಾಗರಿಕರಿಗೆ ಪತ್ರವನ್ನು ಬರೆದು, ಧೈರ್ಯ ತುಂಬಿದೆ.
ಹಡಗಿನಲ್ಲಿರುವ ಅಮೆರಿಕ ಸಿಬ್ಬಂದಿಯನ್ನು ಕರೆದುಕೊಂಡು ವಿಮಾನ ಜಪಾನ್ನಿಂದ ಯಾವಾಗ ಹೊರಡಲಿದೆ ಎಂಬುದು ಸ್ಪಷ್ಟವಾಗಿಲ್ಲ. ಆದರೆ ಜಪಾನ್ನಿಂದ ಹೊರಟು ಕ್ಯಾಲಿಫೋರ್ನಿಯಾದ ಟ್ರಾವಿಸ್ ಏರ್ಫೋರ್ಸ್ ಬೇಸ್ನಲ್ಲಿ ಲ್ಯಾಂಡ್ ಆಗಲಿದೆ ಎಂದು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.
ಒಂದೊಮ್ಮೆ ಈಗ ವ್ಯವಸ್ಥೆ ಮಾಡಿರುವ ವಿಮಾನದಲ್ಲಿ ಅಮೆರಿಕ್ಕೆ ಹಿಂದಿರುಗಲು ಯಾರಾದರೂ ನಿರಾಕರಿಸಿದರೆ, ಅವರು ಇನ್ನೂ ತುಂಬ ಕಾಲದವರೆಗೆ ಮರಳಲು ಸಾಧ್ಯವಾಗುವುದಿಲ್ಲ ಎಂದು ಎಚ್ಚರಿಕೆಯನ್ನೂ ನೀಡಿದ್ದಾರೆ.
ಈ ಹಡಗಿನಲ್ಲಿ ಸುಮಾರು 3700 ಜನರಿದ್ದಾರೆ. 200 ಮಂದಿಗೆ ಕೊರೊನಾ ವೈರಸ್ ತಗುಲಿದೆ. ಇನ್ನೂ ಹಲವರು ಉಳಿದ ಆರೋಗ್ಯ ಸಮಸ್ಯೆಯಿಂದ ಬಳಲುತ್ತಿದ್ದು, ಅವರಿಗೆ ಸೂಕ್ತ ಚಿಕಿತ್ಸೆ ಅಗತ್ಯವಿದೆ ಎಂದು ವರದಿಯಾಗಿದೆ. (ಏಜೆನ್ಸೀಸ್)