ವಾಷಿಂಗ್ಟನ್: ಆಲ್ಫಬೆಟ್ ಮತ್ತು ಗೂಗಲ್ ಸಂಸ್ಥೆಯ ಮುಖ್ಯಸ್ಥರಾಗಿರುವ ಸುಂದರ್ ಪಿಚೈ ತಮಗೆ ಕರೆ ಮಾಡಿ ಕ್ಷಮೆ ಯಾಚಿಸಿದ್ದಾರೆ ಎಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ. ಆದರೆ ಈ ಕ್ಷಮಾಪಣೆಗೆ ಕಾರಣವೇನು ಎನ್ನುವುದರ ಕುರಿತಾಗಿ ಯಾವುದೇ ನಿಖರ ಮಾಹಿತಿಯನ್ನು ನೀಡಲಾಗಿಲ್ಲ.
ಇಂದು ಶ್ವೇತಭವನದಲ್ಲಿ ಕರೊನಾ ವೈರಸ್ನ ವರದಿಯನ್ನು ನೀಡುವ ಸಂದರ್ಭದಲ್ಲಿ ಟ್ರಂಪ್, ಸುಂದರ್ ಪಿಚೈ ಅವರು ತಮ್ಮ ಬಳಿ ಕ್ಷಮೆ ಯಾಚಿಸಿರುವುದಾಗಿ ತಿಳಿಸಿದ್ದಾರೆ. ಅವರೇ ಸ್ವತಃ ಕರೆ ಮಾಡಿ ಕ್ಷಮಿಸುವಂತೆ ಕೇಳಿದ್ದಾರೆ ಎಂದು ಅವರು ಹೇಳಿದ್ದಾರೆ. ಯಾವ ಕಾರಣಕ್ಕಾಗಿ ಅವರು ಕ್ಷಮೆ ಯಾಚಿಸಿದ್ದಾರೆ ಎನ್ನುವುದನ್ನು ಟ್ರಂಪ್ ಸ್ಪಷ್ಟವಾಗಿ ತಿಳಿಸಿಲ್ಲ. ಆದರೆ ಈ ಕುರಿತಾಗಿ ಗೂಗಲ್ ಸಂಸ್ಥೆ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.
ಕರೊನಾ ವೈರಸ್ ತಡೆಗಟ್ಟುವ ಸಲುವಾಗಿ ಮತ್ತು ಜನರಲ್ಲಿ ವೈರಸ್ ಕುರಿತಾಗಿ ಜಾಗೃತಿ ಮೂಡಿಸುವ ಸಲುವಾಗಿ ಗೂಗಲ್ ಅನೇಕ ರೀತಿಯ ಕ್ರಮಗಳನ್ನು ತೆಗೆದುಕೊಂಡಿದೆ. ಗೂಗಲ್ ತನ್ನ ಬಳಕೆದಾರರಿಗೆ ಮಾಹಿತಿ ನೀಡುತ್ತಿದ್ದರೆ ಸೋದರ ಸಂಸ್ಥೆಯಾಗಿರುವ ವೆರಿಲಿ ಒಂದು ವೆಬ್ಸೈಟ್ ತಯಾರಿಸುತ್ತಿದ್ದು ಅದರಲ್ಲಿ ಜನರು ತಮ್ಮಲ್ಲಿ ಸೋಂಕಿನ ಲಕ್ಷಣ ಇದೆಯೋ ಇಲ್ಲವೋ ಎನ್ನುವುದನ್ನು ಪರೀಕ್ಷಿಸಿಕೊಳ್ಳಬಹುದಾಗಿದೆ. ಟ್ರಂಪ್ ಅವರು ಶುಕ್ರವಾರದಂದು ತಮ್ಮ ಸರ್ಕಾರ ಗೂಗಲ್ನ ಜತೆ ಸೇರಿಕೊಂಡು ವೆಬ್ಸೈಟ್ ತಯಾರಿಸುತ್ತಿರುವುದಾಗಿ ತಿಳಿಸಿದ್ದರು. ಈ ವೆಬ್ಸೈಟ್ ಪ್ರಪಂಚದೆಲ್ಲೆಲೆಡೆ ಲಭ್ಯವಾಗಲಿದ್ದು ಜನರಿಗೆ ಸಹಾಯವಾಗಲಿದೆ ಎಂದು ತಿಳಿಸಿದ್ದರು. ಗೂಗಲ್ನ 1,700 ಸಿಬ್ಬಂದಿ ಇದಕ್ಕೆಂದು ಕೆಲಸ ಮಾಡುತ್ತಿರುವುದಾಗಿಯೂ ತಿಳಿಸಿದ್ದರು. ಇದರ ಬೆನ್ನಲ್ಲೆ ಗೂಗಲ್ ಕೆಲ ಸ್ಪಷ್ಟನೆಯನ್ನು ನೀಡಿತ್ತು. ತಾವು ಎರಡು ರೀತಿಯ ಕೆಲಸ ಮಾಡುತ್ತಿದ್ದು, ಮಾಹಿತಿಯನ್ನು ಗೂಗಲ್ ನೀಡುತ್ತಿದ್ದರೆ, ವೆಬ್ಸೈಟ್ನ್ನು ವೆರಿಲಿ ತಯಾರಿಸುತ್ತಿದೆ ಎಂದು ತಿಳಿಸಿತ್ತು. ಆ ವೆಬ್ಸೈಟ್ ಅಮೆರಿಕದ ಬೇ ಏರಿಯಾಕ್ಕೆ ಮಾತ್ರ ಸೀಮಿತವಾಗಲಿದೆ ಎಂದು ಸಹ ತಿಳಿಸಿತ್ತು. (ಏಜೆನ್ಸೀಸ್)
ಕರೊನಾ ವೈರಸ್ ಹುಟ್ಟಿದ್ದು ಎಲ್ಲಿ? Covid-19 ಹೆಸರು ಹೇಗೆ ಬಂತು ಗೊತ್ತಾ?
ಕಾಮೆಂಟರಿಯನ್ನು ಗೌರವವಾಗಿ ಪರಿಗಣಿಸುತ್ತೇನೆ ಹೊರತು ಅದನ್ನೇ ಅರ್ಹತೆ ಅಂದುಕೊಂಡಿಲ್ಲ: ಸಂಜಯ್ ಮಂಜ್ರೇಕರ್