ನವದೆಹಲಿ: ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ಒದಗುವ ಸಾಧ್ಯತೆ ಹಿನ್ನೆಲೆಯಲ್ಲಿ ಅಮೆರಿಕದ ಅಧಿಕಾರಿಗಳು ಚೀನಾ ಮೂಲದ ಟಿಕ್ಟಾಕ್ ಆ್ಯಪ್ ಕುರಿತು ತನಿಖೆ ಆರಂಭಿಸಿದ್ದಾರೆ. ಅಮೆರಿಕದ ವಿತ್ತ ಕಾರ್ಯದರ್ಶಿ ಸ್ಟೀವ್ ಮ್ನುಚಿನ್ ಈ ವಿಷಯ ತಿಳಿಸಿದ್ದಾರೆ.
ಚೀನಾ ಮೂಲದ ವಿಡಿಯೋ ಶೇರಿಂಗ್ ಆ್ಯಪ್ ಕುರಿತು ಈಗಾಗಲೆ ತನಿಖೆ ಆರಂಭವಾಗಿದೆ. ಈ ವಾರದಲ್ಲಿ ಈ ಬಗ್ಗೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ಗೆ ವರದಿ ಸಲ್ಲಿಸಲಾಗುವುದು ಎಂದು ಹೇಳಿದ್ದಾರೆ. ತನ್ಮೂಲಕ ವಿತ್ತ ಸಚಿವಾಲಯದ ನೇತೃತ್ವದಲ್ಲಿ ರಾಷ್ಟ್ರೀಯ ಭದ್ರತೆಗೆ ಧಕ್ಕೆ ಒದಗಿಸುವಂಥ ವಿದೇಶಿ ಹೂಡಿಕೆಗಳ ಕುರಿತು ಪರಿಶೀಲನೆ ನಡೆಸುವ ಅಮೆರಿಕದಲ್ಲಿನ ವಿದೇಶಿ ಹೂಡಿಕೆಯ ಸಮಿತಿ (ಸಿಎಫ್ಐಯುಎಸ್) ಟಿಕ್ಟಾಕ್ ಕುರಿತು ತನಿಖೆ ನಡೆಸುತ್ತಿದೆ ಎಂಬ ಅಂಶವನ್ನು ಅಮೆರಿಕ ಸರ್ಕಾರ ಇದೇ ಮೊದಲ ಬಾರಿಗೆ ಬಹಿರಂಗಪಡಿಸಿದೆ.
ಚೀನಾದ ಟಿಕ್ಟಾಕ್ನ ಮೂಲ ಕಂಪನಿ ಬೀಜಿಂಗ್ ಬೈಟ್ಡಾನ್ಸ್ ಟೆಕ್ನಾಲಜಿ ಕಂಪನಿಯು Musical.ly ಎಂಬ ಅಮೆರಿಕದ ಸಾಮಾಜಿಕ ಜಾಲತಾಣದ ಆ್ಯಪ್ ಅನ್ನು 1 ಶತಕೋಟಿ ಡಾಲರ್ಗೆ ಖರೀದಿಸಿತ್ತು. ಈ ಆ್ಯಪ್ ಬಳಕೆದಾರರ ವೈಯಕ್ತಿಕ ಮಾಹಿತಿಯನ್ನು ಕದಿಯುತ್ತಿದುದ್ದಲ್ಲದೆ, ಸೆನ್ಸಾರ್ ಮಾಡುತ್ತಿತ್ತು. ಈ ಆರೋಪಗಳ ಹಿನ್ನೆಲೆಯಲ್ಲಿ ಸಿಎಫ್ಐಯುಎಸ್ ಈ ವಹಿವಾಟಿನ ಕುರಿತು ತನಿಖೆಗೆ ಮುಂದಾಗಿತ್ತು.
ಇದನ್ನೂ ಓದಿ: ಎತ್ತರದ ಕಟ್ಟಡದಿಂದ ಜಿಗಿದ ಯುವಕ ತಕ್ಷಣವೇ ಎದ್ದು ನಿಂತ: ಆತ್ಮಹತ್ಯೆ ಯತ್ನ ಬೆನ್ನಲ್ಲೆ ನಡೆಯಿತು ಚಮತ್ಕಾರ!
ಈ ಬಗ್ಗೆ ಪ್ರತಿಕ್ರಿಯಿಸಲು ನಿರಾಕರಿಸಿರುವ ಟಿಕ್ಟಾಕ್ನ ಅಧಿಕಾರಿಗಳು, ತಮ್ಮ ಆ್ಯಪ್ನ ಭದ್ರತಾ ಮೂಲಸೌಕರ್ಯವನ್ನು ಹೆಚ್ಚಿಸುವ ಜತೆಗೆ ಸುರಕ್ಷತೆಯ ಅಂಶಗಳಿಗೆ ಒತ್ತು ನೀಡುವ ಸಲುವಾಗಿ ಅದನ್ನು ಉತ್ತಮಪಡಿಸಲು ಶ್ರಮಿಸುತ್ತಿರುವುದಾಗಿ ಹೇಳಿದ್ದಾರೆ.
ಒಂದು ವೇಳೆ ಅಮೆರಿಕದ ರಾಷ್ಟ್ರೀಯ ಭದ್ರತೆ ಧಕ್ಕೆಯನ್ನುಂಟು ಮಾಡುವ ಅಂಶಗಳು ಟಿಕ್ಟಾಕ್ ಆ್ಯಪ್ನಲ್ಲಿ ಇರುವುದು ಸ್ಪಷ್ಟವಾದಲ್ಲಿ, Musical.lyನೊಂದಿಗಿನ ವಹಿವಾಟನ್ನು ರದ್ದುಗೊಳಿಸುವಂತೆ ಬೈಟ್ಡಾನ್ಸ್ ಮೇಲೆ ಸಮಿತಿಯು ಒತ್ತಡ ಹೇರಬಹುದಾಗಿದೆ.