ನವದೆಹಲಿ: ಎಲ್ಲ ಸಚಿವಾಲಯಗಳೂ ಈ ವರ್ಷ ಕ್ವಾಲಿಟಿ ಸ್ಟ್ಯಾಂಡರ್ಡ್ ಪ್ರಕಟಿಸಲಿವೆ ಎಂದು ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಶನಿವಾರ ಹೇಳಿದ್ದಾರೆ.
ಅವರು ಸಂಸತ್ತಿನಲ್ಲಿ ಈ ಸಲದ ಬಜೆಟ್ ಮಂಡಿಸಿದ ವೇಳೆ ಈ ವಿಚಾರ ಘೋಷಿಸಿದ್ದು, ಸರ್ಕಾರದ ಈ ನಡೆಯು ಉತ್ತಮ ಗುಣಮಟ್ಟದ ಸರಕು, ಉತ್ಪನ್ನಗಳ ಮಾರಾಟಕ್ಕೆ ಉತ್ತೇಜನ ನೀಡಲಿದೆ. ಅಲ್ಲದೆ, ಕಳಪೆ ಗುಣಮಟ್ಟದ ಸರಕು, ಉತ್ಪನ್ನಗಳ ರಫ್ತನ್ನು ತಡೆಯಲಿದೆ. ಕಳೆದ ವರ್ಷ ಸೆಪ್ಟೆಂಬರ್ನಲ್ಲಿ ಈ ಕ್ಷೇತ್ರದ ಎಲ್ಲ ಪಾಲುದಾರರನ್ನು ಕರೆಯಿಸಿಕೊಂಡು ಸಮಯದ ಮಿತಿಯಲ್ಲಿ ಇದನ್ನು ಅಳವಡಿಸುವಂತೆ ಕೇಳಿಕೊಂಡಿದ್ದೆವು. ಟೆಕ್ನಿಕಲ್ ಸ್ಟ್ಯಾಂಡರ್ಡ್ ಕಡ್ಡಾಯಗೊಳಿಸಿದ್ದು, ಅವುಗಳ ಪರಿಣಾಮಕಾರಿ ಅನುಷ್ಠಾನವನ್ನೂ ಖಾತರಿಗೊಳಿಸಲಾಗಿದೆ. ಎಲ್ಲ ಸಚಿವಾಲಯಗಳು ಈ ವರ್ಷದ ಅವಧಿಯಲ್ಲಿ ಕ್ವಾಲಿಟಿ ಸ್ಟ್ಯಾಂಡರ್ಡ್ ಆದೇಶಗಳನ್ನು ಪ್ರಕಟಿಸಲಿವೆ ಎಂದು ಹೇಳಿದರು.
ಅಂದಾಜು 5,000 ಉತ್ಪನ್ನ, ಸರಕುಗಳ ಟೆಕ್ನಿಕಲ್ ರೆಗುಲೇಷನ್ ಅನ್ನು ಫಾರ್ಮುಲೇಟ್ ಮಾಡುವ ಗುರಿ ನಿಗದಿ ಪಡಿಸಲಾಗಿದ್ದು, ಬ್ಯೂರೋ ಆಫ್ ಇಂಡಿಯನ್ ಸ್ಟ್ಯಾಂಡರ್ಡ್ಸ್(ಬಿಐಎಸ್)ಗೆ ಇದರ ಹೊಣೆಗಾರಿಕೆ ನೀಡಲಾಗಿದೆ. ಪ್ರತಿ ವರ್ಷ ಭಾರತದಿಂದ ಅಂದಾಜು 11,500 ಗೂಡ್ಸ್ ರಫ್ತಾಗುತ್ತಿದೆ. ಇಲೆಕ್ಟ್ರಾನಿಕ್ಸ್ ಗೂಡ್ಸ್, ಕಚ್ಚಾತೈಲ, ಚಿನ್ನ, ರಾಸಾಯನಿಕ ಗೊಬ್ಬರ, ಮಷಿನ್ ಟೂಲ್ಸ್ ಮತ್ತು ಫಾರ್ಮಾಸ್ಯುಟಿಕಲ್ಸ್ ಪ್ರಾಡಕ್ಟ್ಸ್ಗಳನ್ನು ಆಮದು ಮಾಡಿಕೊಳ್ಳಲಾಗುತ್ತದೆ. ಗರಿಷ್ಠ ಆಮದು ರಸೀದಿ ಕಾರಣಕ್ಕೆ ಟ್ರೇಡ್ ಡೆಫಿಸಿಟ್ ಹೆಚ್ಚಾಗುತ್ತಿದ್ದು, ಇದರಿಂದ ಚಾಲ್ತಿ ಖಾತೆ ಕೊರತೆಯೂ ಹೆಚ್ಚಾಗುತ್ತದೆ. (ಏಜೆನ್ಸೀಸ್)