ಹಾಸನ ಜಿಲ್ಲೆಯ ಶ್ರವಣಬೆಳಗೊಳ ಮತ್ತು ಗದಗ ಜಿಲ್ಲೆಯ ಲಕ್ಕುಂಡಿಯಲ್ಲಿರುವ ಸ್ಮಾರಕಗಳನ್ನು ಯುನೆಸ್ಕೋ ವಿಶ್ವ ಪರಂಪರೆಯ ತಾಣಗಳ ತಾತ್ಕಾಲಿಕ ಪಟ್ಟಿಗೆ ಸೇರಿಸಲು ರಾಜ್ಯ ಪುರಾತತ್ವ ವಸ್ತುಸಂಗ್ರಹಾಲಯಗಳು ಮತ್ತು ಪರಂಪರೆಯ (DAMH) ಇಲಾಖೆ ಪ್ರಸ್ತಾಪಿಸಿದೆ.
ವಿಶ್ವ ಪರಂಪರೆಯ ತಾಣಗಳ ಪಟ್ಟಿಗೆ ಸೇರ್ಪಡೆಗೊಳಿಸುವ ಪ್ರಕ್ರಿಯೆಯು ದೀರ್ಘವಾದುದು. ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾಗಿ ಅಂತಿಮ ಘೋಷಣೆಗೆ ಪರಿಗಣಿಸುವ ಮುಂಚಿತವಾಗಿ ತಾತ್ಕಾಲಿಕ ಪಟ್ಟಿಗೆ ಸೇರ್ಪಡೆಗೊಳ್ಳಲು ಮೊದಲು ಸ್ಮಾರಕವನ್ನು ನಾಮನಿರ್ದೇಶನ ಮಾಡಬೇಕು. ಅಲ್ಲದೆ, ಈ ಸ್ಮಾರಕಗಳು ಕನಿಷ್ಠ ಒಂದು ವರ್ಷದವರೆಗೆ ತಾತ್ಕಾಲಿಕ ಪಟ್ಟಿಯಲ್ಲಿರಬೇಕು.
ಯುನೆಸ್ಕೋ ತಾತ್ಕಾಲಿಕ ಪಟ್ಟಿಯು ಪ್ರಸ್ತುತ ಭಾರತದ 50 ಸ್ಮಾರಕಗಳನ್ನು ಒಳಗೊಂಡಿದೆ, ಇವುಗಳಲ್ಲಿ ಕೆಲವು ಎರಡು ದಶಕಗಳಿಗಿಂತಲೂ ಹೆಚ್ಚು ಕಾಲ ಪಟ್ಟಿಯಲ್ಲಿವೆ. ಪ್ರತಿ ವರ್ಷ ಕೇಂದ್ರ ಮತ್ತು ಭಾರತೀಯ ಪುರಾತತ್ವ ಸಮೀಕ್ಷೆಯು (ASI) ಯಾವ ಸ್ಮಾರಕಗಳನ್ನು ನಾಮನಿರ್ದೇಶನ ಮಾಡಬೇಕೆಂದು ನಿರ್ಧರಿಸುತ್ತದೆ. ತಾತ್ಕಾಲಿಕ ಪಟ್ಟಿಯ ಅಡಿಯಲ್ಲಿ ಒಂಬತ್ತು ವರ್ಷಗಳ ಕಾಯುವಿಕೆಯ ನಂತರ, ಬೇಲೂರು, ಹಳೇಬೀಡು ಮತ್ತು ಸೋಮನಾಥಪುರದ ಹೊಯ್ಸಳ ದೇವಾಲಯಗಳನ್ನು ವಿಶ್ವ ಪರಂಪರೆಯ ತಾಣಗಳಾಗಿ ಅಂತಿಮ ಪಟ್ಟಿಯಲ್ಲಿ ಮಾನ್ಯತೆ ನೀಡಲಾಗಿದೆ.
ಶ್ರವಣಬೆಳಗೊಳವು ಕರ್ನಾಟಕದ ಪ್ರಮುಖ ಜೈನ ಯಾತ್ರಾಸ್ಥಳವಾಗಿದೆ. ಇದು ಗೋಮಟೇಶ್ವರನ ಪ್ರತಿಮೆಗೆ ಹೆಸರುವಾಸಿಯಾಗಿದೆ, ಇದನ್ನು ವಿಶ್ವದ ಅತಿ ಎತ್ತರದ ಸ್ವತಂತ್ರ ಏಕಶಿಲೆಯ ಪ್ರತಿಮೆಗಳಲ್ಲಿ ಒಂದೆಂದು ಪರಿಗಣಿಸಲಾಗಿದೆ. ಇದನ್ನು ಒಂದೇ ಕಲ್ಲಿನಿಂದ ಕೆತ್ತಲಾಗಿದೆ. ಕ್ರಿಸ್ತ ಶಕೆ 981ರಲ್ಲಿ ಪವಿತ್ರಗೊಳಿಸಲಾಯಿತು. ಬೃಹತ್ ಪ್ರತಿಮೆಯನ್ನು 30 ಕಿಲೋಮೀಟರ್ ದೂರದಿಂದ ನೋಡಬಹುದಾಗಿದೆ. ಹತ್ತಿರದ ನೋಟವನ್ನು ಪಡೆಯಲು, ಬಂಡೆಯ ಮೇಲೆ 700 ಮೆಟ್ಟಿಲುಗಳನ್ನು ಏರಬೇಕು. ಬೆಂಗಳೂರಿನ ವಾಯವ್ಯಕ್ಕೆ ಅಂದಾಜು 150 ಕಿಲೋಮೀಟರ್ ದೂರದಲ್ಲಿರುವ ಶ್ರವಣಬೆಳಗೊಳದಲ್ಲಿ ಮೌರ್ಯ ಚಕ್ರವರ್ತಿ ಚಂದ್ರಗುಪ್ತ ಮೌರ್ಯನು ತನ್ನ ಅಂತಿಮ ದಿನಗಳನ್ನು ಕಳೆದ ಎಂಬುದು ಇತಿಹಾಸದಿಂದ ತಿಳಿದುಬರುತ್ತದೆ.
ಹೋಗುವುದು ಹೇಗೆ?:
ಶ್ರವಣಬೆಳಗೊಳಕ್ಕೆ ಹತ್ತಿರದ ವಿಮಾನ ನಿಲ್ದಾಣವು 85 ಕಿಲೋಮೀಟರ್ ದೂರದಲ್ಲಿರುವ ಮೈಸೂರಿನಲ್ಲಿದೆ. ಶ್ರವಣಬೆಳಗೊಳದಲ್ಲಿಯೇ ರೈಲು ನಿಲ್ದಾಣ ಇದೆ, ಇದು ಬೆಂಗಳೂರಿಗೆ ಸಂಪರ್ಕ ಕಲ್ಪಿಸುವ ದೈನಂದಿನ ರೈಲು ಸೇವೆಗಳನ್ನು ಒದಗಿಸುತ್ತದೆ.
ಹೊಯ್ಸಳ ಸಾಮ್ರಾಜ್ಯದ ರಾಜಧಾನಿ ಲಕ್ಕುಂಡಿ:
ಹಂಪಿಗೆ ಹೋಗುವ ಮಾರ್ಗದಲ್ಲಿರುವ ಲಕ್ಕುಂಡಿಯನ್ನು ‘ಲೊಕ್ಕಿಗುಂಡಿ’ ಎಂದೂ ಕರೆಯಲಾಗುತ್ತಿದ್ದು, ಇದು ಸಾವಿರ ವರ್ಷಗಳ ಹಿಂದೆ ಮಹತ್ವದ ನಗರವಾಗಿತ್ತು. ಇದು ಹೊಯ್ಸಳ ಸಾಮ್ರಾಜ್ಯದ ರಾಜಧಾನಿಗಳಲ್ಲಿ ಒಂದಾಗಿತ್ತು. ಚಾಲುಕ್ಯರು, ಕಲಚುರಿಗಳು ಮತ್ತು ಸುಯೆನರ ಕಾಲದ 50ಕ್ಕೂ ಹೆಚ್ಚು ಪ್ರಾಚೀನ ದೇವಾಲಯಗಳ ಅವಶೇಷಗಳು ಗ್ರಾಮದಾದ್ಯಂತ ಹರಡಿಕೊಂಡಿವೆ. ಈ ಪ್ರದೇಶವು 100ಕ್ಕೂ ಹೆಚ್ಚು ಮೆಟ್ಟಿಲುಬಾವಿಗಳನ್ನು ಹೊಂದಿದೆ, ಇದನ್ನು ‘ಕಲ್ಯಾಣಿ’ ಎಂದೂ ಕರೆಯುತ್ತಾರೆ, ಪ್ರತಿಯೊಂದೂ ಅದ್ಭುತವಾದ ವಾಸ್ತುಶಿಲ್ಪದ ಸೌಂದರ್ಯವನ್ನು ಪ್ರದರ್ಶಿಸುತ್ತದೆ. ಕೆಲವು ದೇವಾಲಯಗಳು ಮತ್ತು ಮೆಟ್ಟಿಲುಬಾವಿಗಳನ್ನು ಪುನಃಸ್ಥಾಪಿಸಲಾಗಿದೆ ಮತ್ತು ASI ರಕ್ಷಿಸಿದೆ.
ಹೋಗುವುದು ಹೇಗೆ?:
ಲಕ್ಕುಂಡಿ ಬೆಂಗಳೂರಿನಿಂದ 375 ಕಿಮೀ ದೂರದಲ್ಲಿದೆ. ಹತ್ತಿರದ ವಿಮಾನ ನಿಲ್ದಾಣವು ಹುಬ್ಬಳ್ಳಿಯಲ್ಲಿದೆ (ಅಂದಾಜು 70 ಕಿಮೀ). ಇನ್ನೊಂದು ಬೆಳಗಾವಿಯ ಸಾಂಬ್ರಾ ವಿಮಾನ ನಿಲ್ದಾಣ (128 ಕಿಮೀ ದೂರ). ಹತ್ತಿರದ ರೈಲು ನಿಲ್ದಾಣವೆಂದರೆ ಗದಗ ಜಂಕ್ಷನ್ (ಅಂದಾಜು 13 ಕಿಮೀ). ಪ್ರತಿ ವರ್ಷ ಫೆಬ್ರವರಿ/ಮಾರ್ಚ್‌ನಲ್ಲಿ ನಡೆಯುವ ಲಕ್ಕುಂಡಿ ಉತ್ಸವದ ಸಮಯದಲ್ಲಿ ಭೇಟಿ ನೀಡಿ, ಜಾನಪದ ನೃತ್ಯಗಳು ಮತ್ತು ಇತರ ಸಂಗೀತ ಪ್ರದರ್ಶನಗಳನ್ನು ವೀಕ್ಷಿಸಬಹುದು.
ಚೀನಾದಲ್ಲಿ ನ್ಯೂಮೋನಿಯಾ, ಇನ್ಫ್ಲುಯೆಂಜಾ ಉಲ್ಬಣ; ಮುನ್ನೆಚ್ಚರಿಕೆ ವಹಿಸಲು ರಾಜ್ಯಗಳಿಗೆ ಕೇಂದ್ರ ಸೂಚನೆ