ಗೊಂಡಾ: ಸ್ಯಾನಿಟೈಸರ್ ಮತ್ತು ಮಾಸ್ಕ್ಗಳನ್ನು ವಿತರಿಸುವ ಆರೋಗ್ಯ ಕಾರ್ಯಕರ್ತರ ಸೋಗಿನಲ್ಲಿ ಬಂದ ಇಬ್ಬರು ವ್ಯಕ್ತಿಗಳು 8 ವರ್ಷದ ಬಾಲಕನನ್ನು ಅಪಹರಿಸಿಕೊಂಡು ಪರಾರಿಯಾಗಿದ್ದಾರೆ. ಅಪಹರಣಕಾರರರು ಅಪಹೃತನ ಬಿಡುಗಡೆಗಾಗಿ ಒತ್ತೆಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ ಎನ್ನಲಾಗಿದೆ.
ಉತ್ತರ ಪ್ರದೇಶದ ಗೊಂಡಾದಲ್ಲಿ ಶುಕ್ರವಾರದಂದು ಆರೋಗ್ಯ ಕಾರ್ಯಕರ್ತರ ಸೋಗಿನಲ್ಲಿ ಸ್ಯಾನಿಟೈಸರ್ ಮತ್ತು ಮಾಸ್ಕ್ಗಳನ್ನು ವಿತರಿಸಿಕೊಂಡು ಆ ಪ್ರದೇಶಕ್ಕೆ ಬಂದಿದ್ದರು. ಅದುವರೆಗೆ ಎಲ್ಲರಿಗೂ ಕೊಟ್ಟಂತೆ ಬಾಲಕನ ಮನೆಯವರಿಗೂ ಕೊಟ್ಟಿದ್ದರು. ಬಾಲಕ ಚೂಟಿಯಾಗಿದ್ದನ್ನು ಗಮನಿಸಿದ ಅಪಹರಣಕಾರರು, ನಿಮ್ಮ ಕುಟುಂಬಕ್ಕೆ ಹೆಚ್ಚುವರಿಯಾಗಿ ಸ್ಯಾನಿಟೈಸರ್ ಮತ್ತು ಮಾಸ್ಕ್ಗಳನ್ನು ಕೊಡುತ್ತೇವೆ. ದೂರದಲ್ಲಿ ತಮ್ಮ ವಾಹನವಿದ್ದು, ಅಲ್ಲಿಗೆ ಮಗುವನ್ನು ಕಳುಹಿಸಿಕೊಡುಂತೆ ಬಾಲಕನ ಪಾಲಕರಲ್ಲಿ ಮನವಿ ಮಾಡಿಕೊಂಡಿದ್ದರು.
ಇದನ್ನೂ ಓದಿ: ಪಿಪಿಇ ಕಿಟ್ ಧರಿಸಿ ಊಟ ಬಡಿಸಿದ ಅಡುಗೆಯವರು, ಆಂಧ್ರದಲ್ಲಿ ವಿಶಿಷ್ಟ ಪ್ರಯೋಗ
ಇವರ ಮಾತನ್ನು ನಂಬಿದ ಪಾಲಕರು 8 ವರ್ಷದ ಬಾಲಕನನ್ನು ಆರೋಗ್ಯ ಕಾರ್ಯಕರ್ತರ ಸೋಗಿನವರ ಜತೆ ಕಳುಹಿಸಿದ್ದರು. ಆದರೆ, ಎಷ್ಟೊತ್ತಾದರೂ ಬಾಲಕ ಮರಳದ್ದರಿಂದ ಅನುಮಾನಗೊಂಡ ಪಾಲಕರು ಹೋಗಿ ನೋಡಿದಾಗ ಯಾವುದೇ ವಾಹನವಾಗಲಿ ಅಥವಾ ಆರೋಗ್ಯ ಕಾರ್ಯಕರ್ತರಾಗಲಿ ಇರಲಿಲ್ಲ. ಈ ಹಿನ್ನೆಲೆಯಲ್ಲಿ ಪೊಲೀಸರಿಗೆ ದೂರು ನೀಡಲು ನಿರ್ಧರಿಸಿದ್ದರು. ಅಷ್ಟರಲ್ಲೇ ದೂರವಾಣಿ ಕರೆ ಮಾಡಿದ ಅಪಹರಣಕಾರರು ಬಾಲಕನ ಸುರಕ್ಷಿತ ಬಿಡುಗಡೆಗಾಗಿ ಒತ್ತೆಹಣಕ್ಕಾಗಿ ಬೇಡಿಕೆ ಇಟ್ಟಿದ್ದರು ಎನ್ನಲಾಗಿದೆ.
ಅಪಹರಣಕಾರರು ಎಷ್ಟು ಮೊತ್ತದ ಒತ್ತೆಹಣಕ್ಕೆ ಬೇಡಿಕೆ ಇಟ್ಟಿದ್ದಾರೆ ಎಂಬುದನ್ನು ಪಾಲಕರು ಪೊಲೀಸರಿಗೂ ಬಹಿರಂಗಪಡಿಸಿಲ್ಲ ಎನ್ನಲಾಗಿದೆ. ಈ ಬಗ್ಗೆ ಪ್ರತಿಕ್ರಿಯಿಸಿರುವ ಉತ್ತರಪ್ರದೇಶ ಡಿಜಿಪಿ ಎಚ್.ಸಿ. ಆವಸ್ತಿ, ಪ್ರಕರಣದ ತನಿಖೆ ಆರಂಭವಾಗಿದೆ. ಅಪಹೃತನನ್ನು ಪತ್ತೆ ಮಾಡಲು ಎಲ್ಲ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ. ಇದಕ್ಕಾಗಿ ವಿಶೇಷ ಕಾರ್ಯಪಡೆ ರಚಿಸಿದ್ದು, ಅದು ಕೂಡ ಕಾರ್ಯೋನ್ಮುಖವಾಗಿದೆ ಎಂದು ಹೇಳಿದ್ದಾರೆ.