ಗುರುರಾಜ್ ಬಿ.ಎಸ್. ಬೆಂಗಳೂರು
ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸಿಕ್ಸರ್-ಬೌಂಡರಿಗಳ ಸುರಿಮಳೆ ಹರಿಸಿ ಐಪಿಎಲ್ ಇತಿಹಾಸದಲ್ಲಿ ಸರ್ವಾಧಿಕ ಮೊತ್ತ ದಾಖಲಿಸಿದ ಪ್ರವಾಸಿ ಸನ್ರೈಸರ್ಸ್ ಹೈದರಾಬಾದ್ ತಂಡದ ಎದುರು ಆತಿಥೇಯ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ದಿಟ್ಟ ತಿರುಗೇಟು ನೀಡಲು ಪ್ರಯತ್ನಿಸಿ 25 ರನ್ಗಳಿಂದ ವೀರೋಚಿತ ಸೋಲು ಕಂಡಿದೆ. ಎಡಗೈ ಆರಂಭಿಕ ಟ್ರಾವಿಸ್ ಹೆಡ್ (102 ರನ್, 41 ಎಸೆತ, 9 ಬೌಂಡರಿ, 8 ಸಿಕ್ಸರ್) ಶತಕದ ಆರ್ಭಟ ಹಾಗೂ ವಿಕೆಟ್ ಕೀಪರ್&ಬ್ಯಾಟರ್ ಹೆನ್ರಿಕ್ ಕ್ಲಾಸೆನ್ (67 ರನ್, 31 ಎಸೆತ, 2 ಬೌಂಡರಿ, 7 ಸಿಕ್ಸರ್) ಅಬ್ಬರದ ಬ್ಯಾಟಿಂಗ್ ನೆರವಿನಿಂದ ರನ್ಪ್ರವಾಹ ಹರಿಸಿದ ಸನ್ರೈಸರ್ಸ್ ತಂಡ ಐಪಿಎಲ್-17ರಲ್ಲಿ 4ನೇ ಜಯ ಸಾಧಿಸಿ ಅಂಕಪಟ್ಟಿಯಲ್ಲಿ 4ನೇ ಸ್ಥಾನ ಕಾಯ್ದುಕೊಂಡಿತು. ಸತತ 5ನೇ ಸೋಲಿನೊಂದಿಗೆ ಫಾಫ್ ಡು ಪ್ಲೆಸಿಸ್ ಪಡೆ ಕೊನೇ ಸ್ಥಾನದಲ್ಲಿ ಉಳಿದಿದ್ದು, ಪ್ಲೇಆ್ಗೇರಲು ಉಳಿದ ಏಳೂ ಪಂದ್ಯ ಗೆಲ್ಲಲೇಬೇಕಾದ ಒತ್ತಡಕ್ಕೆ ಸಿಲುಕಿದೆ.
ಸೋಮವಾರ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಸನರೈಸರ್ಸ್, ಟ್ರಾವಿಸ್ ಹೆಡ್&ಅಭಿಷೇಕ್ ಶರ್ಮ (34) ಹಾಕಿಕೊಟ್ಟ ಭದ್ರ ಅಡಿಪಾಯ ಹಾಗೂ ಹೆನ್ರಿಕ್ ಕ್ಲಾಸೆನ್ ಅರ್ಧಶತಕದ ಬಲದಿಂದ 3 ವಿಕೆಟ್ಗೆ 287 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಪ್ರತಿಯಾಗಿ ನಾಯಕ ಫಾಫ್ ಡು ಪ್ಲೆಸಿಸ್ (62 ರನ್, 28 ಎಸೆತ, 7 ಬೌಂಡರಿ, 4 ಸಿಕ್ಸರ್) ಹಾಗೂ ವಿರಾಟ್ ಕೊಹ್ಲಿ (42 ರನ್, 20 ಎಸೆತ, 6 ಬೌಂಡರಿ, 2 ಸಿಕ್ಸರ್) ಒದಗಿಸಿದ ಬಿರುಸಿನ ಆರಂಭ ಹಾಗೂ ಅನುಭವಿ ಬ್ಯಾಟರ್ ದಿನೇಶ್ ಕಾರ್ತಿಕ್ (83 ರನ್,35 ಎಸೆತ, 5 ಬೌಂಡರಿ, 7 ಸಿಕ್ಸರ್) ಪ್ರತಿರೋಧದ ಹೊರತಾಗಿಯೂ ಆರ್ಸಿಬಿ ತಂಡ 7 ವಿಕೆಟ್ಗೆ 262 ರನ್ಗಳಿಸಲಷ್ಟೇ ಶಕ್ತವಾಯಿತು. ಇದು ಐಪಿಎಲ್ನಲ್ಲಿ ಚೇಸಿಂಗ್ ವೇಳೆ ತಂಡವೊಂದು ಪೇರಿಸಿದ ಸರ್ವಾಧಿಕ ಮೊತ್ತದ ದಾಖಲೆಯಾಗಿದೆ.
ಪ್ಲೆಸಿಸ್-ಕಾರ್ತಿಕ್ ಪ್ರತಿರೋಧ
ದಾಖಲೆ ಮೊತ್ತ ಚೇಸಿಂಗ್ಗೆ ಇಳಿದ ಡು ಪ್ಲೆಸಿಸ್ ಹಾಗೂ ವಿರಾಟ್ ಕೊಹ್ಲಿ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಪವರ್ಪ್ಲೇಯಲ್ಲಿ ಆರ್ಸಿಬಿಯ ಗರಿಷ್ಠ ಮೊತ್ತಗಳಿಸಿದ ಇವರಿಬ್ಬರು ಮೊದಲ ವಿಕೆಟ್ಗೆ 38 ಎಸೆತಗಳಲ್ಲಿ 80 ರನ್ ಕಸಿದರು. ಆಗ ದಾಳಿಗಿಳಿದ ಇಂಪ್ಯಾಕ್ಟ್ ಪ್ಲೇಯರ್ ಮಯಾಂಕ್ ಮಾರ್ಕಂಡೆ ಈ ಜೋಡಿಯನ್ನು ಬೇರ್ಪಡಿಸಿದರು. ನಂತರ ವಿಲ್ ಜ್ಯಾಕ್ಸ್ (7), ರಜತ್ ಪಾಟೀದಾರ್ (9) ಹಾಗೂ ಸೌರವ್ ಚೌವ್ಹಾಣ್ (0) ವೈಫಲ್ಯ ಕಂಡರು. 23 ಎಸೆತಗಳಲ್ಲಿ ಅರ್ಧಶತಕಗಳಿಸಿ ಹೋರಾಟ ಜೀವಂತವಿರಿಸಿದ ಪ್ಲೆಸಿಸ್ ವಿಕೆಟ್ ಪಡೆದ ಪ್ಯಾಟ್ ಕಮ್ಮಿನ್ಸ್ (43ಕ್ಕೆ 3) ಆರ್ಸಿಬಿಗೆ ಕಡಿವಾಣ ಹೇರಿದರು. ನಂತರ ದಿನೇಶ್ ಕಾರ್ತಿಕ್, ಮಹಿಪಾಲ್ ಲೋಮ್ರೊರ್ (19) ಜತೆಯಾಗಿ 6ನೇ ವಿಕೆಟ್ಗೆ 25 ಎಸೆತಗಳಲ್ಲಿ 59 ರನ್ ಪೇರಿಸಿದರು. 23 ಎಸೆತಗಳಲ್ಲಿ ಅರ್ಧಶತಕ ಸಿಡಿಸಿದ ಕಾರ್ತಿಕ್ ಏಕಾಂಗಿ ಹೋರಾಟ ನಡೆಸಿದರು. ಅನುಜ್ ರಾವತ್ (25*) ಜತೆಗೆ 28 ಎಸೆತಗಳಲ್ಲಿ 63 ರನ್ ಕಸಿದ ಕಾರ್ತಿಕ್ ಸೋಲಿನ ಅಂತರ ತಗ್ಗಿಸಿ ಆರ್ಸಿಬಿ ಮಾನ ಉಳಿಸಿದರು.
RCB vs SRH: ಐಪಿಎಲ್ ಇತಿಹಾಸದಲ್ಲೇ ವೇಗದ ಶತಕ ಸಿಡಿಸಿದ ಹೆಡ್! ಆರ್ಸಿಬಿಗೆ 287 ರನ್ ಸವಾಲು