ಬೆಂಗಳೂರು: ರಾಜ್ಯ ಸರ್ಕಾರ ಪದವಿಪೂರ್ವ ಕಾಲೇಜುಗಳ ಉಪನ್ಯಾಸಕರು ಹಾಗೂ ಪ್ರಾಂಶುಪಾಲರ ವರ್ಗಾವಣೆ ನಿಯಮ ಪರಿಷ್ಕರಿಸಿದ್ದು, ಕನಿಷ್ಠ ಮೂರು ವರ್ಷ ಸೇವೆ ಸಲ್ಲಿಸಿದವರನ್ನು ಅರ್ಹರೆಂದು ಪರಿಗಣಿಸಿದೆ. ಪದವಿಪೂರ್ವ ಶಿಕ್ಷಣ ಇಲಾಖೆಯ ನಿರ್ದೇಶಕರನ್ನು ವರ್ಗಾವಣೆ ಪ್ರಕ್ರಿಯೆಯ ನಿಯಂತ್ರಣಾಧಿಕಾರಿಗಳನ್ನಾಗಿ ನೇಮಕ ಮಾಡಿ ಅಂತಿಮ ಅಧಿಸೂಚನೆ ಪ್ರಕಟಿಸಿದೆ. ಪ್ರಾಂಶುಪಾಲರ ಕೋರಿಕೆ ಮೇರೆಗೆ ವರ್ಗಾವಣೆಗೆ (ಸಾಮಾನ್ಯ ವಿಭಾಗ) ಶೇ.10 ಮಿತಿ ನಿಗದಿಪಡಿಸಿದ್ದು, ಉಪನ್ಯಾಸಕರ ವರ್ಗಾವಣೆಗೂ ಇದೇ ಮಿತಿ ಅನ್ವಯಿಸಲಿದೆ. ಆದರೆ, ಆಯಾ ವಿಭಾಗದ ವಿಷಯ ಉಪನ್ಯಾಸಕರ ಸಂಖ್ಯಾಬಲವನ್ನು ಇದು ಆಧರಿಸಿದೆ. ಮರು ನಿಯೋಜನೆ, ಹೆಚ್ಚುವರಿ ವರ್ಗಾವಣೆ ಹಾಗೂ ಪರಸ್ಪರ ಒಪ್ಪಿಗೆ ಮೇರೆಗೆ ನಡೆಯುವ ವರ್ಗಾವಣೆಗಳನ್ನು ಈ ಮಿತಿಯಿಂದ ಹೊರಗಿಡಲಾಗಿದೆ. ವರ್ಗಾವಣೆಗಾಗಿ ಅರ್ಜಿ ಸಲ್ಲಿಕೆ ಹಾಗೂ ಕೌನ್ಸೆಲಿಂಗ್ ಪ್ರಕ್ರಿಯೆಯನ್ನು ಆನ್ಲೈನ್ ಮೂಲಕವೇ ನಡೆಸಬೇಕೆಂದು ಸ್ಪಷ್ಟಪಡಿಸಲಾಗಿದೆ.
