ನವದೆಹಲಿ: ಕೋವಿಡ್-19 ಪಾಸಿಟಿವ್ ಬಂದು ಸೋಂಕುಮುಕ್ತರಾದವರು ಮತ್ತೆ ಸೋಂಕಿಗೆ ಒಳಗಾಗುವ ಸಾಧ್ಯತೆ ಇದೆ. ಹಾಗಂತ ಇಂಡಿಯನ್ ಕೌನ್ಸಿಲ್ ಆಫ್ ಮೆಡಿಕಲ್ ರಿಸರ್ಚ್ (ಐಸಿಎಂಆರ್) ಮಾಹಿತಿ ನೀಡಿದೆ. ಮರುಸೋಂಕಿನ ವ್ಯಾಖ್ಯಾನದ ಬಗ್ಗೆ ಗೊಂದಲಗಳಿದ್ದರೂ ಪುನಃ ಸೋಂಕು ತಗುಲುವ ಸಾಧ್ಯತೆ ಇದೆ ಎಂಬುದಾಗಿ ಐಸಿಎಂಆರ್ ಹೇಳಿದೆ.
ಸೆಂಟರ್ ಫಾರ್ ಡಿಸೀಸ್ ಕಂಟ್ರೋಲ್ ಪ್ರಕಾರ, ಸೋಂಕುಮುಕ್ತವಾದ ವ್ಯಕ್ತಿ ಪುನಃ 90 ದಿನಗಳ ಒಳಗೆ ಮತ್ತೆ ಸೋಂಕಿಗೆ ಒಳಗಾದರೆ ಅದನ್ನು ಮರುಸೋಂಕು ಎನ್ನಲಾಗುತ್ತದೆ. ಅದಾಗ್ಯೂ ಮರುಸೋಂಕಿಗೆ ಬೇರೆ ಬೇರೆ ಕಟಾಫ್ ಪೀರಿಯಡ್ಗಳಿದ್ದರೂ ನಾವು ಸದ್ಯ 100 ದಿನಗಳನ್ನು ಕಟಾಫ್ ಆಗಿ ಪರಿಗಣಿಸುತ್ತಿದ್ದೇವೆ. ಈ ಹಿಂದೆ ಒಮ್ಮೆ ಗುಣವಾದವರಲ್ಲಿ ಮತ್ತೆ ಸೋಂಕು ಕಂಡುಬಂದ ಬಗ್ಗೆ ಕೇಂದ್ರ ಆರೋಗ್ಯ ಸಚಿವರೇ ಹೇಳಿದ್ದರೂ ಅದನ್ನು ಮರುಸೋಂಕು ಎಂದು ಪರಿಗಣಿಸದೆ ಮಿಸ್ ಕ್ಲಾಸಿಫೈಡ್ ಎಂದು ಪರಿಗಣಿಸಲಾಗಿದೆ ಎಂಬುದಾಗಿ ಐಸಿಎಂಆರ್ನ ಡೈರೆಕ್ಟರ್ ಜನರಲ್ ಬಲರಾಂ ಭಾರ್ಗವ ತಿಳಿಸಿದ್ದಾರೆ.
ವೈರಸ್ ಇನ್ನೂ ಹೊಸದಾಗಿರುವುದರಿಂದ ಅದರ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲ. ಆದರೆ ಒಮ್ಮೆ ಆ್ಯಂಟಿಬಾಡೀಸ್ ಪ್ರಮಾಣ ದೇಹದಲ್ಲಿ ಕ್ಷೀಣಿಸುತ್ತಿದ್ದಂತೆ ಮತ್ತೆ ಸೋಂಕು ಕಾಣಿಸಿಕೊಳ್ಳುವ ಸಾಧ್ಯತೆಗಳಿವೆ. ಹೀಗಾಗಿ ಸೋಂಕುಮುಕ್ತರಾದ ಮೇಲೂ ಮಾಸ್ಕ್ ಧರಿಸುವುದನ್ನು ನಿಲ್ಲಿಸಬಾರದು. ಜತೆಗೆ ಕರೊನಾ ಹರಡುವಿಕೆ ತಡೆ ಹಿನ್ನೆಲೆಯಲ್ಲಿ ಪಾಲಿಸಬೇಕಾದ ಎಲ್ಲ ಮುನ್ನೆಚ್ಚರಿಕಾ ಕ್ರಮಗಳನ್ನು ಅನುಸರಿಬೇಕು ಎಂಬುದಾಗಿ ಅವರು ಹೇಳಿದ್ದಾರೆ. (ಏಜೆನ್ಸೀಸ್)