ನವದೆಹಲಿ: ಕರಾಚಿಯ ಬಂದರಿಗೆ ಹೊರಟಿದ್ದ, ಹಾಂಗ್ಕಾಂಗ್ ಧ್ವಜವನ್ನು ಹೊಂದಿದ್ದ ಹಡಗನ್ನು ಗುಜರಾತ್ನ ಕಂಡ್ಲಾ ಬಂದರಿನಲ್ಲಿ ರಕ್ಷಣಾ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ. ಫೆ.3ರಂದೇ ಹಡಗನ್ನು ವಶ ಪಡಿಸಿಕೊಳ್ಳಲಾಗಿದ್ದು ಅದನ್ನು ಪರಿಶೀಲನೆ ನಡೆಸಲಾಗುತ್ತಿದೆ.
ಹಡಗಿನಲ್ಲಿ ಖಂಡಾಂತರ (ಬ್ಯಾಲಿಸ್ಟಿಕ್) ಕ್ಷಿಪಣಿಗಳ ಉಡ್ಡಯನಕ್ಕೆ ಬಳಸುವ ಅಟೋಕ್ಲೇವ್ ಇತ್ತು. ಈ ಅಟೋಕ್ಲೇವ್ನ್ನು ಕೈಗಾರಿಕೆಗಳಲ್ಲಿ ಡ್ರೈಯರ್ನ್ನಾಗಿ ಕೂಡ ಉಪಯೋಗಿಸಲಾಗುತ್ತಿದೆ. ಅನುಮಾನ ಬಂದ ಹಿನ್ನೆಲೆಯಲ್ಲಿ ಭಾರತೀಯ ಅಧಿಕಾರಿಗಳು ಹಡಗನ್ನು ವಶಕ್ಕೆ ಪಡೆದಿದ್ದಾರೆ.
ತಡೆಹಿಡಿದ ಹಡಗಿನಲ್ಲಿರುವ ಅಟೋಕ್ಲೇವ್ನ್ನು ಈಗಾಗಲೇ ಸ್ಥಳೀಯ ಅಧಿಕಾರಿಗಳು ಪರಿಶೀಲಿಸಿದ್ದಾರೆ. ಆದರೆ ಹೆಚ್ಚಿನ ತನಿಖೆ ನಡೆಸಲು ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ಡಿಒ) ಮತ್ತೊಂದು ತಂಡವನ್ನು ಗುಜರಾತ್ ಬಂದರಿಗೆ ಕಳಿಸಿದೆ ಎಂದು ಮೂಲಗಳು ತಿಳಿಸಿವೆ.
ಜಿಯಾಂಗ್ಸು ಪ್ರಾಂತ್ಯದಲ್ಲಿನ ಯಾಂಗಟ್ಜೆ ನದಿ ತೀರದಿಂದ ಹೊರಟಿದ್ದ ಡಾ ಕುಯಿ ಯಾನ್ ಎಂಬ ಹೆಸರಿನ ಈ ಹಡಗು ಪಾಕಿಸ್ತಾನದ ಕರಾಚಿಯಲ್ಲಿರುವ ಖಾಸಿಮ್ ಬಂದರಿಗೆ ಹೊರಟಿತ್ತು.
ಇದರಲ್ಲಿ ಅನುಮಾನಾಸ್ಪದ ಅಟೋಕ್ಲೇವ್ ಇರುವ ಬಗ್ಗೆ ಗುಪ್ತಚರ ಇಲಾಖೆ ಮಾಹಿತಿ ನೀಡಿತ್ತು. ಅದರ ಅನ್ವಯ ಹಡಗನ್ನು ತಡೆ ಹಿಡಿದು ಪರಿಶೀಲನೆ ನಡೆಸಿದಾಗ ಅದರಲ್ಲಿರುವ ಅಟೋಕ್ಲೇವ್ ಸೈನ್ಯ ಮತ್ತು ನಾಗರಿಕ ಉದ್ದೇಶಗಳಿಗೆ ಬಳಸಬಹುದಾಗಿರುವಂಥದ್ದು ಎಂಬುದು ಗೊತ್ತಾಗಿದೆ.
ಡಿಆರ್ಡಿಒದ ಎರಡನೇ ತಂಡ ಕೂಡ ಮತ್ತೊಮ್ಮೆ ಸೂಕ್ಷ್ಮವಾಗಿ ಹಡಗು ಹಾಗೂ ಅಟೋಕ್ಲೇವ್ ಯಂತ್ರವನ್ನು ಪರಿಶೀಲನೆ ನಡೆಸಲಿದೆ.(ಏಜೆನ್ಸೀಸ್)