ನವದೆಹಲಿ: ಪೌರತ್ವ ತಿದ್ದುಪಡಿ ಕಾಯ್ದೆಯನ್ನು ವಿರೋಧಿಸಿ ದೆಹಲಿಯ ಶಾಹೀನ್ ಬಾಗ್ನಲ್ಲಿ ಕಳೆದ ಎರಡು ತಿಂಗಳಿಂದಲೂ ಪ್ರತಿಭಟನೆ ನಡೆಯುತ್ತಲೇ ಇದೆ.
ಈ ಮಧ್ಯೆ ಫೆ.18ರಿಂದ ಮೋರಿ ಬಳಿ ರಾಶಿಗಟ್ಟಲೆ ಬಿದ್ದಿರುವ ಕಾಂಡೊಮ್ಗಳ ಫೋಟೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಪ್ರತಿಭಟನೆಗಳೂ…ಈ ಕಾಂಡೊಮ್ ಫೋಟೋಕ್ಕೂ ಏನು ಸಂಬಂಧ ಎಂದು ಕೇಳಬಹುದು. ಆದರೆ ಇದೆರಡೂ ವಿಷಯಗಳನ್ನೊಳಗೊಂಡ ಸುಳ್ಳು ಸುದ್ದಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವಿಪರೀತ ವೈರಲ್ ಆಗುತ್ತಿದೆ.
ಪೌರತ್ವ ತಿದ್ದುಪಡಿ ಕಾಯ್ದೆ ವಿರೋಧಿ ಪ್ರತಿಭಟನೆ ನಡೆಯುತ್ತಿರುವ ಶಾಹೀನ್ ಬಾಗ್ನ ಹಿಂಭಾಗದಲ್ಲಿರುವ ಚರಂಡಿ ಸ್ವಚ್ಛಗೊಳಿಸಲು ಹೋದಾಗ ಪುರಸಭೆ ಕಾರ್ಮಿಕರಿಗೆ ಹೀಗೆ ನೆಲದ ಮೇಲೆ ಕಾಂಡೊಮ್ಗಳು ಬಿದ್ದಿರುವುದು ಕಾಣಿಸಿದೆ ಎಂಬ ಕ್ಯಾಪ್ಷನ್ನೊಂದಿಗೆ ವಾಟ್ಸ್ಆ್ಯಪ್ ಫೇಸ್ಬುಕ್ ನಲ್ಲಿ ಹರಿಬಿಡಲಾಗಿತ್ತು. ಪ್ರಭು ಸಾಗರ್ ಎಂಬುವರು ಪೋಸ್ಟ್ ಮಾಡಿದ್ದ ಫೋಟೋ 1600ಕ್ಕೂ ಅಧಿಕ ಬಾರಿ ಶೇರ್ ಕೂಡ ಆಗಿದೆ. ಟ್ವಿಟರ್ಗಳಲ್ಲಿ ಕೂಡ ವೈರಲ್ ಆಗಿದೆ.
ಆದರೆ ಅದು ಸತ್ಯವಲ್ಲ ಎಂಬುದು ಬೂಮ್ ತಂಡದ ಫ್ಯಾಕ್ಟ್ಚೆಕ್ನಲ್ಲಿ ಬಯಲಾಗಿದೆ. ಫೋಟೋವನ್ನು ರಿವರ್ಸ್ ಇಮೇಜ್ ಸರ್ಚ್ಗೆ ಒಳಪಡಿಸಿದಾಗ ಇದೊಂದು ಹಳೇ ಫೋಟೋ ಮತ್ತು ಶಾಹೀನ್ ಬಾಗ್ನದ್ದಲ್ಲ ಎಂಬ ಸತ್ಯ ಬೆಳಕಿಗೆ ಬಂದಿದೆ.
2016ರಲ್ಲಿ ವಿಯೆಟ್ನಾಂಮೀಸ್ ವೆಬ್ಸೈಟ್ವೊಂದರಲ್ಲಿ ಪ್ರಕಟವಾಗಿದ್ದ ಲೇಖನಕ್ಕೆ ಬಳಸಲಾಗಿದ್ದ ಫೋಟೋ. ಅದರ ಮೇಲೆ ವಾಟರ್ ಮಾರ್ಕ್ ಕೂಡ ಇದೆ. ಅಲ್ಲಿನ ಯಾವುದೋ ವಸತಿ ನಿಲಯದಲ್ಲಿ ವಾಸಿಸುವ ಪುರುಷ ವಿದ್ಯಾರ್ಥಿಗಳ ಬಗ್ಗೆ ಬರೆದ ಲೇಖನ ಎಂಬುದು ರಿವರ್ಸ್ ಇಮೇಜ್ ಸರ್ಚ್ ವೇಳೆ ಗೊತ್ತಾಗಿದೆ. (ಏಜೆನ್ಸೀಸ್)