ತೆಲಂಗಾಣ: ರೇವಂತ್ ರೆಡ್ಡಿ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಇವರಲ್ಲದೆ 11 ಸಚಿವರು ಪ್ರಮಾಣ ವಚನ ಸ್ವೀಕರಿಸಿದ್ದು, ಇವರಲ್ಲಿ ಶಾಸಕಿ ಡಿ.ಅನಸೂಯಾ ಸೀತಕ್ಕ ಅವರು ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ಸೀತಕ್ಕ ಅವರು ನಕ್ಸಲೈಟ್‌ನಿಂದ ವಕೀಲಿ, ಆ ನಂತರ ಶಾಸಕಿ ಮತ್ತು ಈಗ ತೆಲಂಗಾಣದ ಸಚಿವೆಯಾಗಿದ್ದಾರೆ. ಸೀತಕ್ಕ ಮುಲುಗ್ ಕ್ಷೇತ್ರದಲ್ಲಿ ಗೆದ್ದರು. ಅವರಿಗೆ ರಾಜ್ಯಪಾಲ ತಮಿಳಿಸೈ ಸೌಂದರರಾಜನ್ ಅವರ ಸಮ್ಮುಖದಲ್ಲಿ ಪ್ರಮಾಣ ವಚನ ಸ್ವೀಕರಿಸುವ ಮುನ್ನ ಎಲ್ ಬಿ ಸ್ಟೇಡಿಯಂನಲ್ಲಿ ವೇದಿಕೆಯಲ್ಲಿ ಅದ್ಧೂರಿ ಸ್ವಾಗತ ಕೋರಲಾಯಿತು.
ಮಂತ್ರಿಗಿರಿಯ ಪ್ರಯಾಣ ಸುಲಭವಾಗಿರಲಿಲ್ಲ
ತೆಲಂಗಾಣದಲ್ಲಿ ಸಚಿವೆಯಾದ ಡಿ.ಅನಸೂಯಾ ಸೀತಕ್ಕ ಅವರ ಜೀವನ ಅಷ್ಟು ಸಲೀಸಾಗಿರಲಿಲ್ಲ. ಕೋಯಾ ಬುಡಕಟ್ಟಿನಿಂದ ಬಂದ ಅನಸೂಯಾ ಸೀತಕ್ಕ ಚಿಕ್ಕ ವಯಸ್ಸಿನಲ್ಲೇ ಮಾವೋವಾದಿ ಚಳವಳಿಗೆ ಸೇರಿದರು. ಅದೇ ಬುಡಕಟ್ಟು ಪ್ರದೇಶದಲ್ಲಿ ಸಕ್ರಿಯ ಸಶಸ್ತ್ರ ಗುಂಪನ್ನು ಮುನ್ನಡೆಸಲು ಪ್ರಾರಂಭಿಸಿದರು. ಹಲವು ಬಾರಿ ಪೊಲೀಸರೊಂದಿಗೆ ಎನ್ಕೌಂಟರ್ ಕೂಡ ನಡೆಸಿದ್ದರು. ತದನಂತರ ಸೀತಕ್ಕ ತನ್ನ ಪತಿ ಮತ್ತು ಸಹೋದರನನ್ನು ಎನ್ಕೌಂಟರ್ನಲ್ಲಿ ಕಳೆದುಕೊಂಡರು. 1980 ರ ದಶಕ ಮತ್ತು 1990 ರ ದಶಕದ ಆರಂಭದಲ್ಲಿ, ಸೀತಕ್ಕ ಕಾಡಿನಲ್ಲಿ ಬಂದೂಕು ಹಿಡಿದ ಮಾವೋವಾದಿ ದಂಗೆಕೋರರಾಗಿ ಕೆಲಸ ಮಾಡಿದ್ದರು ಎನ್ನಲಾಗಿದೆ.
ಕಾನೂನು ಪದವಿ
ಇದಾದ ನಂತರ ಸೀತಕ್ಕ ಮಾವೋವಾದಿ ಚಳವಳಿಯಿಂದ ಬೇರ್ಪಟ್ಟು 1994ರಲ್ಲಿ ಕ್ಷಮಾದಾನ ಯೋಜನೆಯಡಿ ಪೊಲೀಸರ ಮುಂದೆ ಶರಣಾದರು. ಅದರ ನಂತರ ಅವರ ಜೀವನವು ಹೊಸ ತಿರುವು ಪಡೆಯಿತು. ಇಷ್ಟೆಲ್ಲ ಆದರೂ ಓದು ಮುಂದುವರೆಸಿ ಕಾನೂನು ಪದವಿ ಪಡೆದರು. ಇದಾದ ನಂತರ ಸೀತಕ್ಕ ವಾರಂಗಲ್‌ನ ನ್ಯಾಯಾಲಯದಲ್ಲಿ ಅಭ್ಯಾಸ ಮಾಡಿದರು.
2017ರಲ್ಲಿ ಕಾಂಗ್ರೆಸ್‌ ಸೇರ್ಪಡೆ
ನಂತರ ಸೀತಕ್ಕ ತೆಲುಗು ದೇಶಂ ಪಕ್ಷ (ಟಿಡಿಪಿ) ಸೇರಿದರು. 2004 ರಲ್ಲಿ, ಅವರು ಮುಲುಗ್ ಕ್ಷೇತ್ರದಿಂದ ಚುನಾವಣೆಗೆ ಸ್ಪರ್ಧಿಸಿದರು, ಆದರೆ ಸೋತರು. ಐದು ವರ್ಷಗಳ ನಂತರ, 2009 ರ ವಿಧಾನಸಭಾ ಚುನಾವಣೆಯಲ್ಲಿ, ಸೀತಕ್ಕ ಮುಲುಗ್ ಸ್ಥಾನವನ್ನು ಗೆದ್ದು ಶಾಸಕರಾದರು. 2014 ರ ವಿಧಾನಸಭಾ ಚುನಾವಣೆಯಲ್ಲಿ ಅವರು ಮೂರನೇ ಸ್ಥಾನದಲ್ಲಿದ್ದರು. ಸೀತಕ್ಕ 2017ರಲ್ಲಿ ಕಾಂಗ್ರೆಸ್‌ ಸೇರಿ 2018ರ ವಿಧಾನಸಭೆ ಚುನಾವಣೆಯಲ್ಲಿ ಬಿಆರ್‌ಎಸ್‌ ಬಿರುಗಾಳಿಯ ನಡುವೆಯೂ ಗೆದ್ದಿದ್ದರು. ಕೋವಿಡ್ -19 ಸಾಂಕ್ರಾಮಿಕ ಸಮಯದಲ್ಲಿ ಅವರ ಕೆಲಸವು ಅವರ ಕ್ಷೇತ್ರದಲ್ಲಿ ಮಾತ್ರವಲ್ಲದೆ ದೂರದವರೆಗೆ ಮೆಚ್ಚುಗೆ ಪಡೆದಿದೆ.
2022 ರಲ್ಲಿ ಪಿಎಚ್‌ಡಿ ಪೂರ್ಣ
ಸೀತಕ್ಕ ಕಳೆದ ವರ್ಷ 2022 ರಲ್ಲಿ ಉಸ್ಮಾನಿಯಾ ವಿಶ್ವವಿದ್ಯಾಲಯದಿಂದ ರಾಜ್ಯಶಾಸ್ತ್ರದಲ್ಲಿ ಪಿಎಚ್‌ಡಿ ಪೂರ್ಣಗೊಳಿಸಿದರು. ಇದನ್ನು ಅವರು X ನಲ್ಲಿ ಪೋಸ್ಟ್ ಮಾಡಿದ್ದರು. ಬಾಲ್ಯದಲ್ಲಿ ನಾನು ನಕ್ಸಲೈಟ್ ಆಗುತ್ತೇನೆ ಎಂದು ಎಂದಿಗೂ ಯೋಚಿಸಿರಲಿಲ್ಲ. ನಕ್ಸಲೀಯಳಾದ ನಂತರ ಲಾಯರ್ ಆದೆ, ಲಾಯರ್ ಆದಾಗ ಎಂಎಲ್ ಎ ಆಗುತ್ತೇನೆ ಎಂದು ಅಂದುಕೊಂಡಿರಲಿಲ್ಲ. ನಾನು ಎಂಎಲ್ಎ ಆದಾಗ ಪಿಎಚ್‌ಡಿ ಮಾಡುತ್ತೇನೆ ಎಂದು ಅಂದುಕೊಂಡಿರಲಿಲ್ಲ ಎಂದು ತಿಳಿಸಿದ್ದಾರೆ.