ICCWC 2023, IND VS SA: ಸತತ 8ನೇ ಗೆಲುವು ದಾಖಲಿಸಿದ ಟೀಮ್​ ಇಂಡಿಯಾ!

ಕೋಲ್ಕತಾ: ಏಕದಿನ ವಿಶ್ವಕಪ್ 2023ರ ಪ್ರತಿಯೊಂದು ಪಂದ್ಯಗಳು ಇದೀಗ ಸಿಕ್ಕಾಪಟ್ಟೆ ರೋಚಕವಾಗಿದ್ದು, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಭಾರತ ಕ್ರಿಕೆಟ್​ ಅಭಿಮಾನಿಗಳನ್ನು ನಿರಾಸೆಗೊಳಿಸದೆ ಸತತ ಗೆಲುವಿನ ಮುಖೇನ ಎದುರಾಳಿ ತಂಡಗಳನ್ನು ಹಿಂದಿಕ್ಕಿ ಸದ್ಯ ಟ್ರೋಫಿಯತ್ತ ದಾಪುಗಾಲು ಇಡುತ್ತಿರುವುದು ಭಾರೀ ಸಂತಸ ತಂದಿದೆ. ಇಂದು ಕೋಲ್ಕತ್ತಾದಲ್ಲಿ ದಕ್ಷಿಣ ಆಫ್ರಿಕಾದ ವಿರುದ್ಧ ನಡುವೆ ನಡೆದ ಪಂದ್ಯದಲ್ಲಿ ಸತತ 8ನೇ ಬಾರಿಗೆ ಭಾರತ ಜಯಭೇರಿಯಾಗಿದೆ.

ಇದನ್ನೂ ಓದಿ: ಸಿಎಂ ಸ್ಥಾನ ಕುರಿತು ಹೇಳಿಕೆ ನೀಡದಂತೆ ಸೂಚನೆ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಸ್ಪಷ್ಟನೆ

ಮೊದಲು ಟಾಸ್‌ ಗೆದ್ದು ಬ್ಯಾಟಿಂಗ್​ ಆರಂಭಿಸಿದ ಟೀಮ್ ಇಂಡಿಯಾ, 327 ರನ್‌ಗಳ ಬೃಹತ್​ ಗುರಿ ನೀಡಿತು. ಈ ದೊಡ್ಡ ಗುರಿಯನ್ನು ಬೆನ್ನಟ್ಟಿದ ಸೌತ್​ ಆಫ್ರಿಕಾ, ಹಂತ ಹಂತವಾಗಿ ವಿಫಲಗೊಂಡಿತು. ಬೌಲಿಂಗ್‌ನಲ್ಲೂ ಆಕ್ರಮಣಕಾರಿ ದಾಳಿ ನಡೆಸಿದ ಭಾರತ ಎದುರಾಳಿ ತಂಡಕ್ಕೆ ಗುರಿಯನ್ನು ತಲುಪಲು ಬಿಡದೆ ಕೇವಲ 83 ರನ್​ಗಳಿಗೆ ಆಲ್​ಔಟ್​ ಮಾಡಿತು. ಈ ಮೂಲಕ 243 ರನ್‌ಗಳ ಭರ್ಜರಿ ಜಯವನ್ನು ದಾಖಲಿಸಿತು.

ಬ್ಯಾಟಿಂಗ್​ನಲ್ಲಿ ಎಂದಿನಂತೆ ಅಬ್ಬರಿಸಿದ ರನ್​ ಮಷಿನ್​ ವಿರಾಟ್​ ಕೊಹ್ಲಿ ಅಜೇಯ 101 ರನ್​ ದಾಖಲಿಸುವ ಮುಖೇನ ಮತ್ತೊಂದು ಶತಕವನ್ನು ಸಿಡಿಸಿದರು. 77 ರನ್​ಗಳನ್ನು ಗಳಿಸಿದ ಶ್ರೇಯಸ್​ ಐಯ್ಯರ್​ ವಿರಾಟ್​ಗೆ ಸಾಥ್​ ನೀಡಿ ಪೆವಿಲಿಯನ್​ ಸೇರಿದರು. ಬೌಲಿಂಗ್​ನಲ್ಲಿ ಆಕರ್ಷಕ ಪ್ರದರ್ಶನ ನೀಡಿದ ಸ್ಪಿನ್​ ಬೌಲರ್​ ರವೀಂದ್ರ ಜಡೇಜಾ, 9 ಓವರ್‌ಗಳಲ್ಲಿ 33 ರನ್‌ ನೀಡಿ 5 ವಿಕೆಟ್‌ ಪಡೆದರು. ಅವರೊಂದಿಗೆ ಕೈಜೋಡಿಸಿದ ಮೊಹಮ್ಮದ್‌ ಶಮಿ ಮತ್ತು ಕುಲ್ದೀಪ್‌ ಯಾದವ್‌ ತಲಾ ಎರಡು ವಿಕೆಟ್‌ ಕಬಳಿಸಿದರು.

ಇದನ್ನೂ ಓದಿ:  ಮೈಸೂರು ಜಿಲ್ಲೆ ಅಭಿವೃದ್ಧಿಗೆ ನೀಲಿನಕ್ಷೆ ಸಿದ್ಧಗೊಳ್ಳಲಿ: ಸಿಎಂ ಸೂಚನೆ

ಇನ್ನು ವೇಗಿ ಮೊಹಮ್ಮದ್‌ ಸಿರಾಜ್‌ ಕೂಡ ಒಂದು ವಿಕೆಟ್‌ ಪಡೆದು ಭಾರತಕ್ಕೆ ಆರಂಭಿಕ ಯಶಸ್ಸು ತಂದುಕೊಟ್ಟರು. ಈ ಮೂಲಕ ಕ್ರಿಕೆಟ್​ ಅಖಾಡದಲ್ಲಿ ಅದ್ದೂರಿ ಗೆಲುವು ದಾಖಲಿಸಿದ ಭಾರತ, ಇದೀಗ ಸೆಮಿಫೈನಲ್​ನತ್ತ ಕಣ್ಣೀಟ್ಟಿದೆ. ಮುಂದಿನ ಲೆಕ್ಕಾಚಾರಗಳು ಹೇಗಿರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

https://www.vijayavani.net/hi-nanna-character-is-best-of-my-career-says-actress-mrunal