ಆದರೆ ವಿಷಾದವೆಂದರೆ ಇವರೆಲ್ಲಾ ಈಗ್ಗೆ ಕನಿಷ್ಠ ಹದಿನೈದರಿಂದ ಮೂವತ್ತು ವರ್ಷ ಮುಂಚೆಯೇ ತೆರೆಯ ಮೇಲೆ ರಾರಾಜಿಸಿ ಹೊಸ ನೀರಿಗೆ ಅನುವು ಮಾಡಿಕೊಟ್ಟು ಮರೆಯಾದ ಪಾತ್ರಗಳು. ಅಂಥಾ ಪಾತ್ರಗಳು ಬಿಟ್ಟು ಹೋದ ಜಾಗವನ್ನು ಆಕ್ರಮಿಸಿರುವ ಇಂದಿನ ಧಾರಾವಾಹಿಗಳ ಹೆಣ್ಣು ಮಕ್ಕಳು ಏನು ಮಾಡುತ್ತಿದ್ದಾರೆ? ಛೀ ಎಂದು ತಿರಸ್ಕರಿಸಿದ ಗಂಡನ ಒಂದು ನೋಟಕ್ಕಾಗಿ ದೈನ್ಯದಿಂದ ಕಾಯುತ್ತಿದ್ದಾರೆ. ಹೆಂಡತಿ ಎಂಬ ಸ್ಥಾನವಿರಲಿ, ಮನುಷ್ಯಳು ಎಂಬ ಸ್ಥಾನವೂ ಇರದ ಜಾಗಗಳಲ್ಲಿ ಮನೆಗೆಲಸ ಮಾಡಿಕೊಂಡು, ಆತ್ಮಾಭಿಮಾನದ ಕೊರತೆಗೆ ತ್ಯಾಗ, ಶಾಂತಿ, ಸಹನೆಗಳ ಹೆಸರು ಕೊಟ್ಟುಕೊಂಡು ನೆಲೆಯಿಲ್ಲದೇ ನಿಂತಿದ್ದಾರೆ. ಅಥವಾ ಗಂಡನ ಪ್ರೇಮ ಸಿಕ್ಕ ಸೌಭಾಗ್ಯವತಿಯಾದರೆ, ಮನೆಯಲ್ಲಿ ಅತ್ತಿಗೆ ನಾದಿನಿ ಜಗಳಗಳನ್ನು ಬಿಡಿಸುತ್ತಾ, ಬೈಯುವ ಅತ್ತೆ ಮಾವಂದಿರನ್ನು ಸಂಭಾಳಿಸುತ್ತಾ, ದುಷ್ಟ ಅತ್ತಿಗೆಯ ಮೋಸಗಳಿಗೆ ಬಲಿಯಾಗುತ್ತಾ ನಿಂತಿರುತ್ತಾರೆ.
