ಸ್ಟಾಕ್ಹೋಮ್: ವಿಶ್ವ ಸಂಸ್ಥೆಯ ಕೋವ್ಯಾಕ್ಸ್ ಯೋಜನೆಯಡಿ ಈಗಾಗಲೇ ಅನೇಕ ರಾಷ್ಟ್ರಗಳಿಗೆ ಉಚಿತವಾಗಿ ಕರೊನಾ ಲಸಿಕೆ ನೀಡಿರುವ ಭಾರತಕ್ಕೆ ಸಹಾಯ ಮಾಡಲು ಇದೀಗ ಸ್ವೀಡನ್ ಮುಂದೆ ಬಂದಿದೆ. ಅದೇ ಯೋಜನೆಯಡಿ ಭಾರತಕ್ಕೆ 1 ಮಿಲಿಯನ್ ಡೋಸ್ ಆಸ್ಟ್ರಾಜೆನೆಕಾ ಲಸಿಕೆಗಳನ್ನು ನೀಡುವುದಾಗಿ ಪ್ರಕಟಿಸಿದೆ.
ಸ್ಕ್ಯಾಂಡಿನೇವಿಯಾದ ಈ ದೇಶದ ಅಂತರರಾಷ್ಟ್ರೀಯ ಅಭಿವೃದ್ದಿ ಸಹಕಾರ ಸಚಿವರಾದ ಪೆರ್ ಓಲ್ಸನ್ ಫ್ರಿದ್ ಅವರು ಸ್ವೀಡಿಶ್ ಸುದ್ದಿ ಸಂಸ್ಥೆ ಎಸ್ವಿಟಿಗೆ ಇಂದು ಈ ಮಾಹಿತಿ ನೀಡಿದ್ದಾರೆ. ಆಸ್ಟ್ರಾಜೆನೆಕಾದ ಲಸಿಕೆಗಳನ್ನೇ ಭಾರತದಲ್ಲಿ ಸೀರಮ್ ಇನ್ಸ್ಟಿಟ್ಯೂಟ್ ಕೋವಿಶೀಲ್ಡ್ ಹೆಸರಲ್ಲಿ ಉತ್ಪಾದನೆ ಮಾಡುತ್ತಿದೆ.
ಇದನ್ನೂ ಓದಿ: ಪ್ರಾಣವಾಯು ನೀಡಿದ ಸೌದಿ ಅರೇಬಿಯಾ !
“ಕರೊನಾ ಸಾಂಕ್ರಾಮಿಕವು ಜಗತ್ತನ್ನು ಹೇಗೆ ಆವರಿಸಿಬಿಟ್ಟಿದೆ ಎನ್ನುವುದನ್ನು ನಾವು ನೋಡುತ್ತಿದ್ದೇವೆ. ಜನರು ಸಾಯುತ್ತಿದ್ದಾರೆ, ಬಡತನ ಹೆಚ್ಚುತ್ತಿದೆ ಮತ್ತು ಮಕ್ಕಳು ಇನ್ನೂ ಶಾಲೆಗೆ ವಾಪಸ್ಸಾಗಿಲ್ಲ” ಎಂದ ಫ್ರಿದ್ ಅವರು, “ಈ ಸಾಂಕ್ರಾಮಿಕವನ್ನು ಎದುರಿಸಲು ಏನೇನು ಸಾಧ್ಯವೋ ಅದೆಲ್ಲ ಮಾಡಿ ಅದನ್ನು ಜಗತ್ತಿನಾದ್ಯಂತ ಸೆಣೆಸಬೇಕಿದೆ” ಎಂದು ಹೇಳಿದ್ದಾರೆ.
ಸ್ವೀಡನ್ನಲ್ಲಿ 65 ವರ್ಷ ಮೇಲ್ಪಟ್ಟವರಿಗೆ ಮಾತ್ರ ಕರೊನಾ ಲಸಿಕೆ ನೀಡುತ್ತಿರುವುದರಿಂದ, ಈ ದೇಣಿಗೆಯಿಂದ ಅಲ್ಲಿನ ಲಸಿಕಾ ಅಭಿಯಾನದ ಮೇಲೆ ಯಾವುದೇ ಅಡ್ಡಪರಿಣಾಮ ಆಗುವುದಿಲ್ಲ ಎನ್ನಲಾಗಿದೆ. ಸ್ವೀಡನ್ನ ಲಸಿಕಾ ಅಭಿಯಾನದ ಸಂಚಾಲಕ ರಿಚರ್ಡ್ ಬರ್ಗ್ಸ್ಟ್ರಾಮ್ ಅವರು, ಭಾರತಕ್ಕೆ ನೀಡಲು ಹೆಚ್ಚುವರಿ ಲಸಿಕೆ ಲಭ್ಯವಿದೆ ಎಂದಿದ್ದಾರೆ. “ಇದು ಒಂದು ಮಿಲಿಯನ್ ಅಷ್ಟೇ. ನಮ್ಮ ಬಳಿ ನಂತರದಲ್ಲಿ ಶೇರ್ ಮಾಡುವ ಸಲುವಾಗಿ ಇನ್ನೂ 4 ಅಥವಾ 5 ಮಿಲಿಯನ್ ಆಸ್ಟ್ರಾಜೆನೆಕಾ ಲಸಿಕೆಗಳಿವೆ” ಎಂದು ತಿಳಿಸಿದ್ದಾರೆ ಎನ್ನಲಾಗಿದೆ. (ಏಜೆನ್ಸೀಸ್)
ದುರಂತದ ನಡುವೆ ಒಂದು ವಿಚಿತ್ರ ಘಟನೆ : ತಾಯಿಯ ಶವ ತರಲು ಒಳಹೋದವಗೆ ಕಾದಿತ್ತು ಆಶ್ಚರ್ಯ !
ತಂದೆಯನ್ನು ಕರೊನಾ ಬಲಿ ತೆಗೆದುಕೊಂಡಿತು… ಮೂರೇ ದಿನಗಳಲ್ಲಿ ಕೆಲಸಕ್ಕೆ ಮರಳಿದರು ಈ ವೈದ್ಯ