ಸುಶಾಂತ್ ಸಿಂಗ್ ರಜಪೂತ್. ಬಾಲಿವುಡ್ನ 34 ವರ್ಷದ ಯುವ ನಟ. ಆದರೆ, ಇದೀಗ ಈ ನಟ ನೆನಪು ಮಾತ್ರ. ಆ ನೆನಪನ್ನೇ ಚಿರಸ್ಥಾಯಿಯಾಗಿ ಉಳಿಸಿಕೊಳ್ಳಲು ಅವರ ಕುಟುಂಬ ನಿರ್ಧರಿಸಿದೆ. ಸುಶಾಂತ್ ಸಿಂಗ್ ರಜಪೂತ್ ಫೌಂಡೇಷನ್ ಹೆಸರಿನಲ್ಲಿ ಸಂಸ್ಥೆ ತೆರೆದು, ಆ ಮೂಲಕ ಒಂದಷ್ಟು ಉತ್ಸಾಹಿ ಯುವಕರ ಬೆನ್ನಿಗೆ ನಿಲ್ಲಲು ನಿರ್ಧರಿಸಿದೆ.
ಹೌದು, ಇಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದ ಸುಶಾಂತ್ಗೆ ಕೇವಲ ಸಿನಿಮಾವೊಂದೇ ಇಷ್ಟದ ಕ್ಷೇತ್ರವಾಗಿರಲಿಲ್ಲ. ಸೈನ್ಸ್, ಕ್ರೀಡೆಯೂ ಇಷ್ಟದ ಕ್ಷೇತ್ರವಾಗಿತ್ತು. ಅದೆಲ್ಲವನ್ನು ಗಮನದಲ್ಲಿಟ್ಟುಕೊಂಡೇ ಪ್ರೀತಿಯ ಪುತ್ರನ ಹೆಸರಿನಲ್ಲಿ ಫೌಂಡೇಷನ್ ತೆರೆಯಲು ತೀರ್ಮಾನಿಸಿದ್ದಾರೆ.
ಇದನ್ನೂ ಓದಿ: ‘ಇಂಡಸ್ಟ್ರಿ ಪೆದ್ದ’ ಆಗುವುದಕ್ಕೆ ಹೊರಟಿದ್ದಾರಾ ಮೆಗಾಸ್ಟಾರ್?
ಬಾಲ್ಯದ ದಿನಗಳನ್ನು ಕಳೆದ ಪಾಟ್ನಾದ ರಾಜೀವ್ ನಗರದಲ್ಲಿನ ಮನೆಯನ್ನು ಸ್ಮಾರಕ ರೂಪದಲ್ಲಿ ಹೊರತರಲು ತಂದೆ ಕೆಕೆ ಸಿಂಗ್ ಕನಸಿಟ್ಟುಕೊಂಡಿದ್ದಾರೆ. ಸುಶಾಂತ್ಗೆ ಕಲೆಹಾಕಿದ ಸಾಕಷ್ಟು ಪುಸ್ತಕಗಳು, ಪ್ರಶಸ್ತಿಗಳು ಎಲ್ಲದಕ್ಕಿಂತ ಹೆಚ್ಚಾಗಿ ಅತೀ ದುಬಾರಿ ಮೊತ್ತದ ಟೆಲಿಸ್ಕೋಪ್ ಸಹ ಆ ಮೆಮೊರಿಯಲ್ನಲ್ಲಿ ಸ್ಥಾನ ಪಡೆಯಲಿದೆ. ಅಷ್ಟೇ ಅಲ್ಲ ಸುಶಾಂತ್ ಸಿಂಗ್ ಹೆಸರಿನಲ್ಲಿನ ಇನ್ಸ್ಟಾ, ಟ್ವಿಟರ್, ಫೇಸ್ಬುಕ್ ಸಹ ಎಂದಿನಂತೆ ಕಾರ್ಯನಿರ್ವಹಿಸಲಿವೆ.
ಇದನ್ನೂ ಓದಿ: ಸುಶಾಂತ್, ಟಿಕ್ಟಾಕ್ ಸ್ಟಾರ್ ಸಿಯಾ ಆತ್ಮಹತ್ಯೆಗೂ ಸಂಬಂಧವಿದೆಯಾ? ಪೊಲೀಸರಿಗೇಕೆ ಸಂಶಯ?
ಅಂದಹಾಗೆ, ಜೂ. 14ರಂದು ಮುಂಬೈನ ಬಾಂದ್ರಾದಲ್ಲಿರುವ ಅಪಾರ್ಟ್ಮೆಂಟ್ನಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಆತ್ಮಹತ್ಯೆ ಎಂದು ಸಾಬೀತಾದರೂ, ತನಿಖೆ ಮಾತ್ರ ನಿಂತಿಲ್ಲ. (ಏಜೆನ್ಸೀಸ್)