ಕೊಲಂಬೊ : ಭಾರತದ ಪ್ರಯಾಣಿಕರನ್ನು ನಿಷೇಧಿಸಿರುವ ದೇಶಗಳ ಸಾಲಿಗೆ ಇದೀಗ ಶ್ರೀಲಂಕಾ ಕೂಡ ಸೇರಿಕೊಂಡಿದೆ. ಪ್ರಸ್ತುತ ಕರೊನಾ ಎರಡನೇ ಅಲೆಯ ಕಾರಣದಿಂದಾಗಿ ಭಾರತದಿಂದ ಯಾವುದೇ ಪ್ರಯಾಣಿಕರು ಶ್ರೀಲಂಕಾದಲ್ಲಿ ವಿಮಾನ ಇಳಿಯುವ ಹಾಗಿಲ್ಲ ಎಂದು ಅಲ್ಲಿನ ನಾಗರೀಕ ವಿಮಾನಯಾನ ಪ್ರಾಧಿಕಾರ ಆದೇಶ ಹೊರಡಿಸಿದೆ. ಇಂಗ್ಲೆಂಡ್, ಯುಎಇ, ಆಸ್ಟ್ರೇಲಿಯಾ ಮತ್ತು ಸಿಂಗಪೂರ್ ಈಗಾಗಲೇ ಭಾರತ ಮತ್ತು ಇತರ ದಕ್ಷಿಣ ಏಷ್ಯಾದ ದೇಶಗಳ ಪ್ರಯಾಣಿಕರ ಮೇಲೆ ನಿಷೇಧ ವಿಧಿಸಿವೆ.
ಕರೊನಾ ಹರಡುತ್ತಿದ್ದರೂ ಕೂಡ ಪಶ್ಚಿಮ ಏಷ್ಯಾ ಮತ್ತು ಸಿಂಗಪುರ್ಗಳಿಗೆ ಪ್ರಯಾಣಿಸುವ ಭಾರತೀಯರಿಗೆ ಟ್ರಾನ್ಸಿಟ್ ಹಬ್ನಂತೆ ಶ್ರೀಲಂಕಾ ಸೇವೆ ಒದಗಿಸುತ್ತಿತ್ತು. ಭಾರತೀಯ ಪ್ರವಾಸಿಗಳಿಗೆ ಟ್ರಾವೆಲ್ ಬಬಲ್ಅನ್ನು ರೂಪಿಸಿ 14 ದಿನ ಕ್ವಾರಂಟೈನ್ ಅವಕಾಶವನ್ನು ಮಾಡಿತ್ತು. ಆದರೆ ಇನ್ನು ಮುಂದೆ ಭಾರತದಿಂದ ಪ್ರಯಾಣ ಮಾಡುವವರಿಗೆ, ಶ್ರೀಲಂಕಾದಲ್ಲಿ ವಿಮಾನ ಇಳಿಯುವ ಅವಕಾಶ ನೀಡಬಾರದೆಂದು ಸಿವಿಲ್ ಏವಿಯೇಷನ್ ಡೈರೆಕ್ಟರ್ ಜನರಲ್ ಅವರು, ಶ್ರೀಲಂಕನ್ ಏರ್ಲೈನ್ಸ್ಗೆ ಬರೆದಿರುವ ಪತ್ರದಲ್ಲಿ ಹೇಳಿದ್ದಾರೆ.
ಶ್ರೀಲಂಕಾದಲ್ಲೂ ಕರೊನಾ ಸೋಂಕು ಹರಡುತ್ತಿದ್ದು, ಏಪ್ರಿಲ್ ನಡುವೆ ದಿನಕ್ಕೆ ಸರಿಸುಮಾರು 200 ಕರೊನಾ ಪ್ರಕರಣಗಳು ಬರುತ್ತಿದ್ದುದು, ಕಳೆದ 5 ದಿನಗಳಿಂದ ದಿನಂಪ್ರತಿ 2,000 ಪ್ರಕರಣಗಳಾಗಿ ಏರಿಕೆ ಕಂಡಿದೆ. ಈ ದ್ವೀಪ ದೇಶದಲ್ಲಿ ಏಪ್ರಿಲ್ನಲ್ಲಿ ನಡೆದ ಪಾರಂಪರಿಕ ಹೊಸ ವರ್ಷ ಆಚರಣೆಯ ಬೆನ್ನಲ್ಲೇ ಇಂಗ್ಲೆಂಡ್ನ ರೂಪಾಂತರಿ ಕರೊನಾ ವೈರಸ್ ಸೋಂಕಿನ ಪ್ರಕರಣಗಳು ಹೆಚ್ಚಿವೆ ಎನ್ನಲಾಗಿದೆ.
ಕ್ರಿಕೆಟಿಗನನ್ನು ಅಪಹರಿಸಿದ ದುಷ್ಕರ್ಮಿಗಳು! ಥಳಿಸಿದರು, ಗನ್ ಹಿಡಿದು ಬೆದರಿಸಿದರು