ಮುಂಬೈ: ಎಲ್ಲರಿಗೂ ಗೊತ್ತಿರುವ ಹಾಗೆ ಬಾಲಿವುಡ್ ನಟಿ ಮಧುಬಾಲಾ ಅವರು ತಮ್ಮ ಜೀವನದುದ್ದಕ್ಕೂ ನಿಜವಾದ ಪ್ರೀತಿಗಾಗಿ ಹಾತೊರೆಯುತ್ತಿದ್ದರು ಎಂದು ಹೇಳಲಾಗುತ್ತದೆ. ದಕ್ಷಿಣದಲ್ಲಿಯೂ ಇಂತಹ ಒಬ್ಬ ನಟಿಯಿದ್ದಾರೆ. ಇವರು ತಮ್ಮ ವೃತ್ತಿಜೀವನದಲ್ಲಿ ಎಂದಿಗೂ ಹಿಂದೆ ಬಿದ್ದವರಲ್ಲ. ರಜನಿಕಾಂತ್ ಅವರ ಮೊದಲ ನಟಿ ಎಂದು ಕರೆಯಲ್ಪಡುವ ಇವರ ಹೆಸರು ಶ್ರೀ ವಿದ್ಯಾ.. ಬರೋಬ್ಬರಿ 800 ಚಿತ್ರಗಳಲ್ಲಿ ನಟಿಸಿರುವ ಇವರು ತಮಿಳಿನ ಖ್ಯಾತ ಹಾಸ್ಯನಟ ಕೃಷ್ಣಮೂರ್ತಿಯವರ ಪುತ್ರಿ. ತನ್ನ ತಂದೆಗೆ ತೀವ್ರ ಅನಾರೋಗ್ಯದ ಕಾರಣ ಶ್ರೀ ವಿದ್ಯಾ ಕೇವಲ 13 ನೇ ವಯಸ್ಸಿನಲ್ಲಿ ಮನೆಯ ನಿರ್ವಹಣೆಗಾಗಿ ಕೆಲಸ ಮಾಡಲು ಪ್ರಾರಂಭಿಸಿದರು.
1967ರಲ್ಲಿ ಶಿವಾಜಿ ಗಣೇಶನ್ ಅವರೊಂದಿಗೆ ತಮಿಳು ಚಲನಚಿತ್ರ ‘ತಿರುವರುಚೆಲ್ವರ್’ ಮೂಲಕ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. ನಾಯಕಿಯಾಗಿ ಅವರ ಮೊದಲ ಚಿತ್ರ ‘ದೆಹಲಿ ಟು ಮದ್ರಾಸ್’. ‘ಅಪೂರ್ವ ರಾಗಂಗಲ್’ ಚಿತ್ರದಲ್ಲಿ ರಜನಿಕಾಂತ್ ಅವರ ಮೊದಲ ನಾಯಕಿ. ದಕ್ಷಿಣ ಭಾರತದ ಯಶಸ್ವಿ ನಟಿಯಾಗಿದ್ದರೂ ಜೀವನದಲ್ಲಿ ಸಾಕಷ್ಟು ಕಷ್ಟಪಡಬೇಕಾಯಿತು ಶ್ರೀ ವಿದ್ಯಾ. ಹೌದು ತನ್ನ ವೈಯಕ್ತಿಕ ಜೀವನದಲ್ಲಿ ಎಂದಿಗೂ ಸಂತೋಷವಾಗಿರಲಿಲ್ಲ.
ಕಮಲ್ ಹಾಸನ್ ಜೊತೆ ಪ್ರೀತಿ
ಶ್ರೀ ವಿದ್ಯಾ ಮತ್ತು ಕಮಲ್ ಹಾಸನ್ ‘ಅಪೂರ್ವ ರಾಗಂಗಲ್’ ಚಿತ್ರದಲ್ಲಿ ಕೆಲಸ ಮಾಡುವಾಗ ಪರಸ್ಪರ ಹತ್ತಿರವಾದರು. ಕಮಲ್ ಕೂಡ ನಟಿಗೆ ಪ್ರಪೋಸ್ ಮಾಡಿದ್ದರು. ಆದರೆ ಶ್ರೀ ವಿದ್ಯಾ ಅವರ ತಾಯಿಗೆ ಅವರಿಬ್ಬರೂ ಮದುವೆಯಾಗುವುದು ಇಷ್ಟವಿರಲಿಲ್ಲ. ಹಾಗಾಗಿ ಇಬ್ಬರೂ ಬೇರೆಯಾದರು. ಕಮಲ್‌ನಿಂದ ಬೇರ್ಪಟ್ಟ ನಂತರ, ಶ್ರೀ ವಿದ್ಯಾ ಮತ್ತು ಭರತನ್ ನಡುವಿನ ಸಂಬಂಧದ ವದಂತಿಗಳು ದಕ್ಷಿಣ ಚಲನಚಿತ್ರೋದ್ಯಮದಲ್ಲಿ ಬಹಳಷ್ಟು ಸುದ್ದಿಗಳನ್ನು ಮಾಡಿದವು, ಆದರೆ ಈ ಸಂಬಂಧವು ಬಹಳಷ್ಟು ದಿನಗಳ ಕಾಲ ಉಳಿಯಲಿಲ್ಲ.
ಮದುವೆ ನಂತರ ಅರಿವಾದ ತಪ್ಪು
ಪ್ರೇಮದಲ್ಲಿ ಎರಡು ಬಾರಿ ಮನನೊಂದಿದ್ದ ಶ್ರೀ ವಿದ್ಯಾ ತನ್ನ ಕುಟುಂಬದ ವಿರುದ್ಧ ಹರಿಹಾಯ್ದು, ಮಲಯಾಳಂ ಚಿತ್ರ ‘ತಿಕ್ಕನಾಳ್’ ನ ಸಹಾಯಕ ನಿರ್ದೇಶಕ ಜಾರ್ಜ್ ಥಾಮಸ್ ಅವರನ್ನು ಮದುವೆಯಾದರು. ಚಿಕ್ಕಂದಿನಿಂದಲೂ ದುಡಿದಿದ್ದರಿಂದ ಮದುವೆಯ ನಂತರ ಗೃಹಿಣಿಯಂತೆ ಬಾಳುತ್ತೇನೆ ಎಂದು ಶ್ರೀ ವಿದ್ಯಾ ಮದುವೆಗೂ ಮುನ್ನವೇ ನಿರ್ಧರಿಸಿದ್ದರು. ಆದರೆ ಹಾಗಾಗಲಿಲ್ಲ. ನಟನೆ ಬಿಡಲು ಶ್ರೀ ವಿದ್ಯಾ ಪತಿ ಬಿಡಲಿಲ್ಲ. ಕ್ರಮೇಣ ಶ್ರೀ ವಿದ್ಯಾಗೆ ಥಾಮಸ್ ನನ್ನು ಮದುವೆಯಾಗಿ ತಾನು ಮಾಡಿದ ದೊಡ್ಡ ತಪ್ಪು ಅರಿವಾಗುತ್ತದೆ.
ಸ್ವಂತ ಆಸ್ತಿಗಾಗಿ ಸುದೀರ್ಘ ಹೋರಾಟ
ಮದುವೆಯ ನಂತರ ಶ್ರೀ ವಿದ್ಯಾಳ ಜೀವನ ಕ್ರಮೇಣ ಹದಗೆಟ್ಟಿತು. ಅಂತಿಮವಾಗಿ ನಟಿ ದಾಂಪತ್ಯ ಜೀವನಕ್ಕೆ ವಿದಾಯ ಹೇಳಲು ನಿರ್ಧರಿಸಿದರು. ಇಷ್ಟೇ ಅಲ್ಲ, ವಿಚ್ಛೇದನ ಪಡೆದ ನಂತರ ಶ್ರೀ ವಿದ್ಯಾ ತನ್ನ ಸ್ವಂತ ಆಸ್ತಿ ಮತ್ತು ಪ್ರಶಸ್ತಿಗಳನ್ನು ಹಿಂಪಡೆಯಲು ಪತಿ ವಿರುದ್ಧ ಕೇಸ್ ಹಾಕಬೇಕಾಯಿತು. ಸುದೀರ್ಘ ಹೋರಾಟದ ನಂತರ ಸುಪ್ರೀಂ ಕೋರ್ಟ್ ನಟಿಯ ಪರವಾಗಿ ತೀರ್ಪು ನೀಡಿತು.
ಸಾವು ಕೂಡ ಕರುಣೆ ತೋರಲಿಲ್ಲ
ನಟಿಯ ಜೀವನವು ಪ್ರತಿ ತಿರುವಿನಲ್ಲಿಯೂ ಆಕೆಯನ್ನು ಪರೀಕ್ಷಿಸಿತು. ಸಾವು ಕೂಡ ಕರುಣೆ ತೋರಲಿಲ್ಲ. 2003 ರಲ್ಲಿ ನಟಿಗೆ ಸ್ತನ ಕ್ಯಾನ್ಸರ್ ಇರುವುದು ಪತ್ತೆಯಾಯಿತು. ಜೀವನದ ಪ್ರತಿ ಗಳಿಗೆಯಲ್ಲೂ ಹೋರಾಡಿದ ಶ್ರೀ ವಿದ್ಯಾ ಅವರು ಕ್ಯಾನ್ಸರ್‌ನಿಂದ ಸಾವನ್ನಪ್ಪಿದರು.