ನವದೆಹಲಿ: ದೇಶಾದ್ಯಂತ ಸಂಚಲನ ಮೂಡಿಸಿದ್ದ ಪ್ರಕರಣವೊಂದರಲ್ಲಿ ದೆಹಲಿ ಕೋರ್ಟ್ 12ರ ಬಾಲೆಯನ್ನು ವೇಶ್ಯಾವಾಟಿಕೆಗೆ ತಳ್ಳಿದ್ದ ಮಹಿಳೆಗೆ 24 ವರ್ಷಗಳ ಜೈಲು ಶಿಕ್ಷೆ ಘೋಷಿಸಿದೆ. ಇದಷ್ಟೇ ಅಲ್ಲದೇ, ಈಕೆಯ ಮೇಲೆ ಅತ್ಯಾಚಾರ ಎಸಗಿದ್ದ ವ್ಯಕ್ತಿಗೆ 20 ವರ್ಷಗಳ ಶಿಕ್ಷೆ ವಿಧಿಸಿದೆ. ಸೋನು ಪಂಜಾಬನ್ ಅಲಿಯಾಸ್ ಗೀತಾ ಆರೋರಾ ಶಿಕ್ಷೆಗೊಳಗಾದ ಮಹಿಳೆ. ಜತೆಗೆ, ಸಂದೀಪ್ ಬೇಡ್ವಾಲ್ ಕೂಡ ಶಿಕ್ಷೆಗೆ ಗುರಿಯಾಗಿದ್ದಾನೆ.
ದೆಹಲಿಯಲ್ಲಿನ ವೇಶ್ಯಾವಾಟಿಕೆಯ ಕರಾಳ ರೂಪವನ್ನು ಅನಾವರಣಗೊಳಿಸಿದ ಪ್ರಕರಣವಿದು. 2009ರಲ್ಲಿ 12 ವರ್ಷದ ಬಾಲಕಿಯನ್ನು ಅಪಹರಿಸಿದ ವ್ಯಕ್ತಿ ಆಕೆ ಮೇಲೆ ಅತ್ಯಾಚಾರ ಎಸಗಿದ್ದ. ಬಳಿಕ ಸೀಮಾ ಎಂಬಾಕೆಗೆ ಆಕೆಯನ್ನು ಮಾರುತ್ತಾನೆ. ಸೀಮಾ ಆಕೆಯನ್ನು ಸೋನು ಪಂಜಾಬನ್ಗೆ ಮಾರಿದ್ದಳು.
ಇದನ್ನೂ ಓದಿ; ಮ್ಯಾಟ್ರಿಮೊನಿ ಸೈಟ್ಗಳೇ ಈತನಿಗೆ ಆದಾಯ ಮೂಲ; ಹುಡುಗಿಯರಿಗೆ ವಂಚಿಸೋದೇ ಖಯಾಲಿ
ಬಾಲಕಿಯನ್ನು ಗ್ರಾಹಕರ ಬಳಿ ಕಳುಹಿಸುವ ಮುನ್ನ ಆಕೆಗೆ ಡ್ರಗ್ಸ್ ನೀಡಲಾಗುತ್ತಿತ್ತು. ವಯಸ್ಕಳಂತೆ ಕಾಣುವಂತಾಗಲು ಆಕೆ ಮೇಲೆ ಉದ್ದೀಪನ ಮದ್ದು ಪ್ರಯೋಗಿಸಲಾಗಿತ್ತು. ಸತತ ಐದು ವರ್ಷಗಳ ಕಾಲ ಈ ನರಕಯಾತನೆ ಅನುಭವಿಸಿದ್ದ ಬಾಲಕಿ, 2014ರಲ್ಲಿ ಆಕೆಯ ಜಾಲದಿಂದ ತಪ್ಪಿಸಿಕೊಂಡು ನಜಾಫ್ಗಢ್ ಪೊಲೀಸರಿಗೆ ದೂರು ನೀಡಿದ್ದಳು.
ತನಿಖೆ ನಡೆಸಿದ್ದ ಪೊಲೀಸರು ಸೋನು ಪಂಜಾಬನ್ ನಡೆಸುತ್ತಿದ್ದ ವೇಶ್ಯಾವಟಿಕೆಯ ಜಾಲವನ್ನು ಬಯಲಿಗೆಳೆದಿದ್ದರು. ಜುಲೈ 17ರಂದೇ ಆರೋಪ ಸಾಬೀತಾಗಿದೆ ಎಂದು ಕೋರ್ಟ್ ಘೋಷಿಸಿತ್ತು. ಇದಾಗುತ್ತಿದ್ದಂತೆ ಸೋನು ಜೈಲಿನಲ್ಲಿಯೇ ಆತ್ಮಹತ್ಯೆಗೆ ಯತ್ನಿಸಿದ್ದಳು. ಸದ್ಯ ಆಕೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಅಪಾಯದಿಂದ ಪಾರಾಗಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಕರೊನಾ ಲಸಿಕೆ ತಯಾರಿಗೆ ಪೈಪೋಟಿ; ಕ್ಲಿನಿಕಲ್ ಟ್ರಯಲ್ಗೆ ಒಪ್ಪಿಕೊಂಡರೆ ಸಿಗುವ ಹಣವೆಷ್ಟು…?