ವಾಷಿಂಗ್ಟನ್: ಆ ಇಬ್ಬರು ಸ್ಕೈಡೈವರ್ಗಳು ಅಂದುಕೊಂಡಂತೆ ಎಲ್ಲವೂ ಆಗಿದ್ದರೆ ತಾವು ಬಯಸಿದಷ್ಟು ಹೊತ್ತು ಆಕಾಶದಲ್ಲಿ ಹಕ್ಕಿಯಂತೆ ಹಾರಾಡಿ ಪ್ರಕೃತಿ ಸೌಂದರ್ಯ ಸವಿಯಬಹುದಿತ್ತು. ಆದರೆ ಅವರಂದುಕೊಂಡದ್ದೇ ಬೇರೆ, ಆಗಿದ್ದೇ ಬೇರೆ.
ಭೂಮಿಯಿಂದ ಅದೆಷ್ಟೋ ಅಡಿ ಎತ್ತರದಲ್ಲಿ ಖುಷಿಯಿಂದ ಸ್ಕೈಡೈವಿಂಗ್ ಮಾಡುತ್ತಿದ್ದ ಅವರಲ್ಲಿ ಆ ಖುಷಿ ಹೆಚ್ಚು ಕಾಲ ಉಳಿಯಲಿಲ್ಲ. ಪ್ಯಾರಾಚೂಟ್ನಲ್ಲಿ ಉಂಟಾದ ದೋಷದಿಂದಾಗಿ ನೋಡನೋಡುತ್ತಿದ್ದಂತೆ ಆ ನತದೃಷ್ಟರು ನೆಲಕ್ಕುರುಳಿದರು.
ಇದನ್ನೂ ಓದಿ: ಸದ್ಯಕ್ಕಿಲ್ಲ ಪ್ರಯಾಣಿಕ ರೈಲ್ವೆ ಸೇವೆ
ಇದು ನಡೆದದ್ದು ಫ್ಲೋರಿಡಾದಲ್ಲಿ. ಪ್ಯಾರಾಚ್ಯೂಟ್ನಲ್ಲಿ ಉಂಟಾದ ತೊಂದರೆಯಿಂದ ಈ ಇಬ್ಬರು ಸ್ಕೈಡೈವರ್ಗಳು ಕೆಳಗೆ ಬೀಳುತ್ತಿದ್ದ ದೃಶ್ಯ ಎಂಥ ಗಟ್ಟಿಗರ ಎದೆಯಲ್ಲೂ ನಡುಕ ಹುಟ್ಟಿಸುತ್ತದೆ.
ಘಟನೆಯ ಪ್ರತ್ಯಕ್ಷದರ್ಶಿ ಕ್ರಿಸ್ಟಿನಾ ರೆನ್ಪ್ರೊ ಈ ವೀಡಿಯೋ ತುಣುಕನ್ನು ತಮ್ಮ ಫೇಸ್ ಬುಕ್ ಖಾತೆಯಲ್ಲಿ ಶೇರ್ ಮಾಡಿದ್ದಾರೆ.
ಘಟನೆಯ ಬಗ್ಗೆ ಮಾಹಿತಿಯನ್ನು ಟೈಟಸ್ವಿಲ್ಲೆ ಅಗ್ನಿಶಾಮಕ ಇಲಾಖೆ ತನ್ನ ಫೇಸ್ಬುಕ್ ಖಾತೆಯಲ್ಲಿ ಹಂಚಿಕೊಂಡಿದೆ.
ಸ್ಥಳೀಯ ಮಾಧ್ಯಮಗಳ ವರದಿ ಪ್ರಕಾರ ಘಟನೆ ನಡೆದ ತಕ್ಷಣ ಈ ಇಬ್ಬರು ಸ್ಕೈಡೈವರ್ಗಳನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ ಎನ್ನಲಾಗಿದೆ. ದುರ್ಘಟನೆಗೆ ಕಾರಣವಾದ ಪ್ಯಾರಾಚೂಟ್ನ ದೋಷಗಳ ಬಗ್ಗೆ ತನಿಖೆಗೆ ಆದೇಶಿಸಲಾಗಿದೆ.
ಇದನ್ನೂ ಓದಿ: ಹೆರಿಗೆ ಆಸ್ಪತ್ರೆಗೆ ಪೊಲೀಸರ ವೇಷದಲ್ಲಿ ನುಗ್ಗಿ ಗುಂಡಿನ ದಾಳಿ, 16 ಜನರ ಸಾವು
32 ಸೆಕೆಂಡ್ಗಳ ಈ ಭಯಾನಕ ವೀಡಿಯೋ ಈಗ ಫೇಸ್ಬುಕ್ ಸೇರಿ ವಿವಿಧ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದ್ದು, ಈ ವೀಡಿಯೋ ವೀಕ್ಷಿಸಿದ ನೆಟ್ಟಿಗರು ಈ ಘಟನೆಗೆ ಮರುಕ ವ್ಯಕ್ತಪಡಿಸುತ್ತಿದ್ದು, ಸ್ಕೈಡೈವರ್ಗಳು ಶೀಘ್ರ ಗುಣಮುಖವಾಗಲೆಂದು ಹಾರೈಸಿದ್ದಾರೆ.