ಮುಂಬೈ: ಕೊರೊನಾ ವೈರಸ್ ಸೋಂಕಿನ ಗಂಭೀರತೆ ಮತ್ತು ಅದರ ಪರಿಣಾಮ ಆರ್ಥಿಕತೆ ಮೇಲೆ ಹೇಗಾಗುತ್ತಿದೆ ಎಂಬುದನ್ನು ಗಮನಿಸುತ್ತಿರುವ ಹೂಡಿಕೆದಾರರು ಮತ್ತು ಆಟೋ, ಮೆಟಲ್ ಸಂಬಂಧಿತ ಷೇರುಗಳು ಕುಸಿತ ಕಂಡ ಕಾರಣ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ)ನ ಸೂಚ್ಯಂಕ ಸೆನ್ಸೆಕ್ಸ್ 162 ಅಂಶ ಕುಸಿತದೊಂದಿಗೆ ದಿನದ ವಹಿವಾಟು ಮುಗಿಸಿದೆ.
ಸೋಮವಾರ ಬೆಳಗ್ಗೆ ದಿನದ ವಹಿವಾಟನ್ನು ಕುಸಿತದೊಂದಿಗೇ ಆರಂಭಿಸಿದ್ದ ಸೆನ್ಸೆಕ್ಸ್ ದಿನದ ಅಂತ್ಯಕ್ಕೆ 162.23 ಅಂಶ (0.39%) ಕುಸಿತ ದಾಖಲಿಸಿದ್ದು, 40,979.62ರಲ್ಲಿ ವಹಿವಾಟು ಮುಗಿಸಿದೆ. ಇಂಟ್ರಾ ಡೇ ವಹಿವಾಟಿನಲ್ಲಿ ಕನಿಷ್ಠ ಮಟ್ಟ 40,798.98ರಲ್ಲೂ ವಹಿವಾಟು ನಡೆಸಿತ್ತು. ಇದೇ ರೀತಿ, ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ ದಿನದ ವಹಿವಾಟಿನ ಅಂತ್ಯಕ್ಕೆ 66.85 ಅಂಶ ಕುಸಿತದೊಂದಿಗೆ 12,031.50ರಲ್ಲಿ ವಹಿವಾಟು ಮುಗಿಸಿದೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಮಹೀಂದ್ರಾ ಆ್ಯಂಡ್ ಮಹಿಂದ್ರಾ ಷೇರು ಮೌಲ್ಯ ಶೇಕಡ 7 ಕುಸಿತ ಕಂಡು ಭಾರಿ ನಷ್ಟ ಅನುಭವಿಸಿತು. ಇದರ ಬೆನ್ನಿಗೆ ಟಾಟಾ ಸ್ಟೀಲ್, ಒಎನ್ಜಿಸಿ, ಸನ್ಫಾರ್ಮಾ, ಹೀರೋ ಮೋಟೋಕಾರ್ಪ್, ಪವರ್ಗ್ರಿಡ್, ಎನ್ಟಿಪಿಸಿ ಷೇರುಗಳು ಕೂಡ ನಷ್ಟ ಅನುಭವಿಸಿವೆ. ಇನ್ನೊಂದಡೆ, ಬಜಾಜ್ ಫೈನಾನಸ್, ಕೊಟಾಕ್ ಬ್ಯಾಂಕ್, ಟಿಸಿಎಸ್, ಏಷ್ಯನ್ ಪೇಂಟ್ಸ್, ಎಚ್ಡಿಎಫ್ಸಿ, ಎಚ್ಯುಎಲ್, ಆರ್ಐಎಲ್ ಲಾಭದೊಂದಿಗೆ ವಹಿವಾಟು ಮುಗಿಸಿವೆ.
ಕರೆನ್ಸಿ ಮಾರುಕಟ್ಟೆಯಲ್ಲಿ ಇಂಟ್ರಾ ಡೇ ವಹಿವಾಟಿನಲ್ಲಿ ಭಾರತೀಯ ರೂಪಾಯಿ ಅಮೆರಿಕದ ಡಾಲರ್ ಎದುರು 8 ಪೈಸೆ ಏರಿಕೆಯೊಂದಿಗೆ 71.35ರಲ್ಲಿ ವಹಿವಾಟು ನಡೆಸಿತ್ತು. (ಏಜೆನ್ಸೀಸ್)