ಮುಂಬೈ: ಕೊರೊನಾ ವೈರಸ್ ಆತಂಕ ಜಾಗತಿಕ ಅರ್ಥವ್ಯವಸ್ಥೆಯನ್ನು ಕಾಡಿದ್ದು, ಹೆಚ್ಚಿನ ಪ್ರಮಾಣದ ಸೆಲ್ಆಫ್ ನಡೆಯುತ್ತಿದ್ದು, ಭಾರತೀಯ ಷೇರುಪೇಟೆ ವಹಿವಾಟು ಕೂಡ ವೊಲಟೈಲ್ ಆಗಿಯೇ ಮಂಗಳವಾರ ಶುರುವಾಗಿದೆ.
ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ ವಹಿವಾಟು ಶುರುವಾದಾಗ 150 ಅಂಶ ಏರಿಕೆ ದಾಖಲಿಸಿದ್ದು, ನಂತರದಲ್ಲಿ ಒಟ್ಟಾರೆ ಇಳಿಕೆಯಾಗಿದ್ದು, 34.62 ಅಂಶ (0.09%) ಕುಸಿತದೊಂದಿಗೆ 40,328.61ರಲ್ಲಿ ವಹಿವಾಟು ಶುರುಮಾಡಿಕೊಂಡಿದೆ. ಇದೇ ರೀತಿ ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ (ಎನ್ಎಸ್ಇ) ಸೂಚ್ಯಂಕ ನಿಫ್ಟಿ50 ಕೂಡ 17.15 ಅಂಶ (0.14%) ಇಳಿದು 11,812.25ರಲ್ಲಿ ವಹಿವಾಟು ಆರಂಭಿಸಿದೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಎಚ್ಸಿಎಲ್ ಟೆಕ್, ಸನ್ ಫಾರ್ಮಾ, ಟೈಟಾನ್, ಟೆಕ್ ಮಹೀಂದ್ರಾ ಮತ್ತು ಬಜಾಜ್ ಆಟೋ ಷೇರುಗಳು ನಷ್ಟವನ್ನು ಹೊಂದಿವೆ. ಇದೇ ವೇಳೆ, ಎನ್ಟಿಪಿಸಿ, ಒಎನ್ಜಿಸಿ, ಎಚ್ಯುಎಲ್, ಏಷ್ಯನ್ ಪೇಂಟ್ಸ್, ಟಾಟಾ ಸ್ಟೀಲ್ ಷೇರುಗಳು ಲಾಭ ಗಳಿಕೆಯ ಹಾದಿಯಲ್ಲಿವೆ. ಸೋಮವಾರದ ವಹಿವಾಟಿನಲ್ಲಿ ಸೆನ್ಸೆಕ್ಸ್ 806.89 ಅಂಶ ಕುಸಿದು 40,363.23ರಲ್ಲಿ ವಹಿವಾಟು ಮುಗಿಸಿದೆ. ನಿಫ್ಟಿ 251.45 ಅಂಶ ಕುಸಿದು 11,829.40ಯಲ್ಲಿ ವಹಿವಾಟು ಕೊನೆಗೊಳಿಸಿದೆ. (ಏಜೆನ್ಸೀಸ್)