ಮುಂಬೈ: ಭಾರತೀಯ ಷೇರುಪೇಟೆಯಲ್ಲಿ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್(ಬಿಎಸ್ಇ) ಸೂಚ್ಯಂಕ ಸೆನ್ಸೆಕ್ಸ್ 150ಕ್ಕೂ ಹೆಚ್ಚ ಅಂಶ ಕುಸಿತದೊಂದಿಗೆ ಸೋಮವಾರದ ವಹಿವಾಟು ಆರಂಭಿಸಿದೆ. ಕೊರೊನಾ ವೈರಸ್ ಆತಂಕ ಜಾಗತಿಕ ಮಟ್ಟದಲ್ಲಿ ಪೇಟೆಯನ್ನು ಆವರಿಸಿದ್ದು, ಎಲ್ಲ ಪೇಟೆಗಳಲ್ಲೂ ವಹಿವಾಟು ಕಳವಳದೊಂದಿಗೇ ನಡೆಯುತ್ತಿದೆ.
ಸೆನ್ಸೆಕ್ಸ್ ಸೋಮವಾರ ಬೆಳಗ್ಗೆ ವಹಿವಾಟು ಆರಂಭವಾಗುತ್ತಿದ್ದಂತೆ 171.90 ಅಂಶ (0.42%) ಕುಸಿತದೊಂದಿಗೆ 40,969.95ರಲ್ಲಿ ಮತ್ತು ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್(ಎನ್ಎಸ್ಇ)ನ ಸೂಚ್ಯಂಕ ನಿಫ್ಟಿ 12,046.90 ಅಂಶದಲ್ಲಿ ವಹಿವಾಟು ಶುರುಮಾಡಿಕೊಂಡಿವೆ.
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಟಾಟಾ ಸ್ಟೀಲ್ ಷೇರುಗಳು ಆರಂಭಿಕ ವಹಿವಾಟಿನಲ್ಲಿ ಶೇಕಡ 5 ನಷ್ಟ ಅನುಭವಿಸಿದೆ. ಡಿಸೆಂಬರ್ 2019ಕ್ಕೆ ಮುಕ್ತಾಯವಾದ ತ್ರೈಮಾಸಿಕದಲ್ಲಿ ಕಂಪನಿಗೆ 1,228.53 ಕೋಟಿ ರೂಪಾಯಿ ನಿವ್ವಳ ನಷ್ಟ ತೋರಿಸಿದ್ದರ ಪರಿಣಾಮ ಇದು. ಕಳೆದ ವರ್ಷದ ಇದೇ ಅವಧಿಯಲ್ಲಿ ಕಂಪನಿ ನಿವ್ವಳ ಲಾಭಾಂಶ 1,753.07 ಕೋಟಿ ರೂಪಾಯಿ ತೋರಿಸಿತ್ತು ಎಂದು ವಿಶ್ಲೇಷಿಸಲಾಗುತ್ತಿದೆ.
ಈ ಹಿಂದಿನ ವಹಿವಾಟು ಕೊನೆಗೊಂಡಾಗ ಸೆನ್ಸೆಕ್ಸ್ 164.18 ಅಂಶ ಕುಸಿತ ಕಂಡು 41,141.85ರಲ್ಲೂ, ನಿಫ್ಟಿ 39.60 ಅಂಶ ಕುಸಿತದೊಂದಿಗೆ 12,098.35ರಲ್ಲೂ ವಹಿವಾಟು ಕೊನೆಗೊಳಿಸಿದ್ದವು.(ಏಜೆನ್ಸೀಸ್)