ಮುಂಬೈ: ದೇಶೀಯ ಷೇರು ಮಾರುಕಟ್ಟೆ ವ್ಯಾಪಾರ ಸೋಮವಾರ ಬೆಳಗ್ಗೆ 45 ನಿಮಿಷಗಳ ಕಾಲ ಸ್ಥಗಿತಗೊಂಡು ಬಳಿಕ ಮತ್ತೆ ಪ್ರಾರಂಭವಾಯಿತು. ಈ ವೇಳೆ ಇಕ್ವಿಟಿ ಸೂಚ್ಯಂಕದಲ್ಲಿ ಸೆನ್ಸೆಕ್ಸ್ 3186 ಅಂಶಗಳಿಗೆ ಕುಸಿದರೆ, ನಿಫ್ಟಿ 7,900ರ ಮಟ್ಟಕ್ಕಿಂತಲೂ ಕೆಳಕ್ಕೆ ಹೋಯಿತು.
ವಹಿವಾಟು ಆರಂಭವಾದ ಮೊದಲ ಒಂದು ಗಂಟೆಯೊಳಗೇ ಸೆನ್ಸೆಕ್ಸ್ ಶೇ.10 ಅಂಶಗಳಷ್ಟು ಕುಸಿದು ಕನಿಷ್ಠ ಪರಿಧಿಯ ಮಿತಿಯನ್ನು ದಾಟಿತು. ಈ ವೇಳೆ ವಹಿವಾಟನ್ನು 45 ನಿಮಿಷಗಳ ಕಾಲ ಸ್ಥಗಿತಗೊಳಿಸಲಾಗಿತ್ತು.
ಷೇರುಮಾರುಕಟ್ಟೆಯಲ್ಲಿ ಸೆನ್ಸೆಕ್ಸ್ ಮಧ್ಯಾಹ್ನ 1ಗಂಟೆಯೊಳಗೇ ಶೇ.10ರಷ್ಟು ಕುಸಿತವಾದಾಗ, ಅದನ್ನು ನಿಯಂತ್ರಣ ಮಾಡುವ ದೃಷ್ಟಿಯಿಂದ ಹೀಗೆ 45 ನಿಮಿಷಗಳ ಕಾಲ ಸ್ಥಗಿತಗೊಳಿಸಲಾಗುತ್ತದೆ.
ವಹಿವಾಟು ಮರು ಆರಂಭವಾದಾಗಲೂ ಸಹ ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ನಲ್ಲಿ 3,185.84 ಅಂಶಗಳ ವಹಿವಾಟು ನಡೆಸುತ್ತಿದ್ದ ಸೆನ್ಸೆಕ್ಸ್ ಶೇ.10.65ಕ್ಕೆ ಇಳಿಕೆಯಾಗಿ 26,730.12 ಕ್ಕೆ ತಲುಪಿತು. ಹಾಗೇ ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ನಲ್ಲಿ ನಿಫ್ಟಿ 923.95 ಅಂಶಗಳು(ಶೇ10.65) ಕುಸಿತವಾಗಿ 7,821.50 ಕ್ಕೆ ತಲುಪಿದೆ.
ಸೆನ್ಸೆಕ್ಸ್ನಲ್ಲಿ ಆಕ್ಸಿಸ್ ಬ್ಯಾಂಕ್ ಶೇ.21 ರಷ್ಟು ಕುಸಿತ ಕಂಡಿದ್ದು ತೀವ್ರ ನಷ್ಟದಲ್ಲಿದೆ. ಅದಾದ ಬಳಿಕ ಐಸಿಐಸಿಐ ಬ್ಯಾಂಕ್, ಬಜಾಜ್ ಫೈನಾನ್ಸ್, ಅಲ್ಟ್ರಾ ಟೆಕ್ ಸಿಮೆಂಟ್ ಸಂಸ್ಥೆಗಳು ನಷ್ಟದಲ್ಲಿವೆ. (ಏಜೆನ್ಸೀಸ್)