ಉತ್ತರಪ್ರದೇಶ: ನೀಟಾಗಿ ಶೇವ್ ಮಾಡಿಕೊಳ್ಳಬೇಕು ಅಥವಾ ದಾಡಿ ಬಿಡಲು ಅನುಮತಿ ಪಡೆಯಬೇಕು.. ಎಂಬ ಷರತ್ತು ವಿಧಿಸಿದ್ದರೂ ಇಲ್ಲೊಬ್ಬರು ಸಬ್ ಇನ್ಸ್ಪೆಕ್ಟರ್ ಅದ್ಯಾವುದನ್ನೂ ಮಾಡದೆ ಈಗ ತೊಂದರೆಗೀಡಾಗಿದ್ದಾರೆ.
ಉತ್ತರಪ್ರದೇಶದ ಬಾಘ್ಪಟ್ನಲ್ಲಿ 3 ವರ್ಷಗಳಿಂದ ಸಬ್ ಇನ್ಸ್ಪೆಕ್ಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಇಂತೆಸರ್ ಅಲಿ ಎಂಬವರು ಉದ್ದನೆಯ ದಾಡಿ ಬಿಟ್ಟಿದ್ದ ಕಾರಣ, ಗಡ್ಡ ಬೋಳಿಸಿಕೊಂಡು ಬರುವಂತೆ ಅಥವಾ ಗಡ್ಡ ಉಳಿಸಿಕೊಳ್ಳಲು ಮೇಲಧಿಕಾರಿಗಳ ಅನುಮತಿ ಪಡೆಯುವಂತೆ ಸೂಚನೆ ನೀಡಲಾಗಿತ್ತು. ಮೂರು ಮೂರು ಬಾರಿ ಈ ಬಗ್ಗೆ ನಿರ್ದೇಶನ ನೀಡಿದ್ದರೂ ಅವರು ಗಡ್ಡ ಬೋಳಿಸಲೂ ಇಲ್ಲ ಹಾಗೂ ಗಡ್ಡ ಉಳಿಸಿಕೊಂಡೇ ಕಾರ್ಯನಿರ್ವಹಿಸಲು ಮೇಲಧಿಕಾರಿಗಳಿಂದ ಅನುಮತಿಯನ್ನೂ ಪಡೆದಿರಲಿಲ್ಲ. ಹೀಗಾಗಿ ಅವರನ್ನು ಇಲಾಖೆ ಅಮಾನತು ಮಾಡಿದೆ.
ನಿಯಮಗಳ ಪ್ರಕಾರ, ಪೊಲೀಸ್ ವೃತ್ತಿಯಲ್ಲಿ ಇರುವ ಸಿಕ್ಖರು ಮಾತ್ರ ಗಡ್ಡ ಬಿಟ್ಟಿರಲು ಅನುಮತಿ ಇದೆ. ಉಳಿದವರೆಲ್ಲ ಕ್ಲೀನ್ ಶೇವ್ ಮಾಡಿಕೊಂಡಿರಬೇಕು. ಒಂದು ವೇಳೆ ಗಡ್ಡಧಾರಿ ಆಗಿರಬೇಕು ಎಂದರೆ ಮೇಲಧಿಕಾರಿಗಳಿಂದ ಅನುಮತಿ ಪಡೆದಿರಬೇಕು. ಆದರೆ ಇಂತೆಸರ್ ಅಲಿ ಎರಡರಲ್ಲಿ ಯಾವುದನ್ನೂ ಮಾಡದ್ದರಿಂದ ಅಮಾನತು ಮಾಡಲಾಗಿದೆ ಎಂದು ಬಾಘ್ಪಟ್ನ ಎಸ್ಪಿ ಅಭಿಷೇಕ್ ಸಿಂಗ್ ತಿಳಿಸಿದ್ದಾರೆ. (ಏಜೆನ್ಸೀಸ್)