ನವದೆಹಲಿ: ಸ್ಟೀಲ್ ಅಥಾರಿಟಿ ಆಫ್ ಇಂಡಿಯಾ (SAIL)ನಲ್ಲಿರುವ ಶೇಕಡ 5 ಷೇರು ಮಾರಾಟ ಮಾಡಲು ಚಿಂತನೆ ನಡೆಸಿದೆ ಎಂದು ಡಿಪಾರ್ಟ್ಮೆಂಟ್ ಆಫ್ ಇನ್ವೆಸ್ಟ್ಮೆಂಟ್ ಆ್ಯಂಡ್ ಪಬ್ಲಿಕ್ ಅಸ್ಸೆಟ್ ಮ್ಯಾನೇಜ್ಮೆಂಟ್ನ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಡಿಪಾರ್ಟ್ಮೆಂಟ್ ಆಫ್ ಇನ್ವೆಸ್ಟ್ಮೆಂಟ್ ಆ್ಯಂಡ್ ಪಬ್ಲಿಕ್ ಅಸ್ಸೆಟ್ ಮ್ಯಾನೇಜ್ಮೆಂಟ್ ಹಾಗೂ ಉಕ್ಕು ಸಚಿವಾಲಯದ ಅಧಿಕಾರಿಗಳು ಈ ನಿಟ್ಟಿನಲ್ಲಿ ಕೆಲಸ ಮಾಡುತ್ತಿದ್ದು, ಸೈಲ್ನ ಶೇಕಡ 5 ಷೇರು ಮಾರಾಟ ಮಾಡುವ ಮೂಲಕ 1,000 ಕೋಟಿ ರೂಪಾಯಿಯನ್ನು ಬೊಕ್ಕಸಕ್ಕೆ ಸೇರಿಸಲು ಕೇಂದ್ರ ಸರ್ಕಾರ ಮುಂದಾಗಿದೆ. ಇದಕ್ಕಾಗಿ ಸಿಂಗಾಪುರ, ಹಾಂಕಾಂಗ್ಗಳಲ್ಲಿ ರೋಡ್ ಷೋ ನಡೆಸಲು ತೀರ್ಮಾನಿಸಲಾಗಿದೆ. ಆದಾಗ್ಯೂ,ಕೊರೊನಾ ವೈರಸ್ ಕಾರಣಕ್ಕಾಗಿ ಹಾಂಕಾಂಗ್ನಲ್ಲಿನ ರೋಡ್ ಷೋವನ್ನು ತಾತ್ಕಾಲಿಕವಾಗಿ ತಡೆ ಹಿಡಿಯಲಾಗಿದೆ ಎಂದು ಮೂಲಗಳು ತಿಳಿಸಿವೆ.
ಸೈಲ್ನಲ್ಲಿ ಸದ್ಯ ಶೇಕಡ 75 ಪಾಲು ಸರ್ಕಾರದ್ದು ಇದೆ. ಇದಕ್ಕೂ ಮುನ್ನ 2014ರಲ್ಲಿ ಸರ್ಕಾರ ಸ್ಟೀಲ್ ಸಿಪಿಎಸ್ಇನಲ್ಲಿನ ಶೇಕಡ 5 ಪಾಲನ್ನು ಮಾರಾಟ ಮಾಡಿತ್ತು. ಸೈಲ್ನ ಶೇಕಡ 5 ಷೇರುಗಳನ್ನು ಈಗ ಓಫರ್ ಫಾರ್ ಸೇಲ್(OFS) ಮೂಲಕ ಮಾರಾಟ ಮಾಡಲು ಚಿಂತನೆ ನಡೆದಿದೆ. ಆದರೆ, ಇದಕ್ಕಾಗಿ ರೋಡ್ ಷೋ ಮೂಲಕವೇ ಹೂಡಿಕೆದಾರ ಗಮನಸೆಳೆಯಬೇಕಷ್ಟೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಸದ್ಯದ ಮಾರುಕಟ್ಟೆ ದರ ಪ್ರಕಾರ, ಸೈಲ್ನ ಶೇಕಡ 5 ಷೇರುಗಳ ಮಾರಾಟದಿಂದ 1,000 ಕೋಟಿ ರೂಪಾಯಿ ಗಳಿಸಬಹುದಾಗಿದೆ. ಷೇರುಪೇಟೆಯಲ್ಲಿ ಶುಕ್ರವಾರ ಸೈಲ್ನ ಷೇರು ಬೆಲೆ 48.65 ರೂಪಾಯಿನಲ್ಲಿ ವಹಿವಾಟು ಮುಗಿಸಿತ್ತು. ಪ್ರಸಕ್ತ ವರ್ಷ ಸರ್ಕಾರ ಹೂಡಿಕೆ ಹಿಂತೆಗೆತದ ಮೂಲಕ 65,000 ಕೋಟಿ ರೂಪಾಯಿ ಸಂಗ್ರಹಿಸುವ ಗುರಿ ಹಾಕಿಕೊಂಡಿದೆ. (ಏಜೆನ್ಸೀಸ್)