ಫಿರೋಜಾಬಾದ್‌: ಮದುವೆಯ ಹೆಸರಿನಲ್ಲಿ ನಡೆಯುವ ಮೋಸಗಳಿಗಂತೂ ಲೆಕ್ಕವೇ ಇಲ್ಲವಾಗಿದೆ. ಈ ನಿಟ್ಟಿನಲ್ಲಿ ಹೆಣ್ಣುಮಕ್ಕಳೂ ಹಿಂದೆ ಬಿದ್ದಿಲ್ಲ. ಭಾವಿ ಪತಿ ಹಾಗೂ ಆತನ ಮನೆಯವರನ್ನು ವಂಚಿಸಿ ಮದುಮಗಳು ಎಸ್ಕೇಪ್‌ ಆಗಿರುವ ಘಟನೆ ಉತ್ತರ ಪ್ರದೇಶದ ಫಿರೋಜಾಬಾದ್‌ನಲ್ಲಿ ನಡೆದಿದೆ.
ಮದುವೆಯ ಸಂಭ್ರಮದಲ್ಲಿದ್ದ ಮನೆಯಲ್ಲಿ ಭಾರಿ ಆಘಾತ ಉಂಟಾಗಿರುವುದು ಒಂದೆಡೆಯಾದರೆ, ಮುಂದೆ ಈ ಘಟನೆ ಟ್ವಿಸ್ಟ್‌ ಕೂಡ ಪಡೆದುಕೊಂಡು ಮದುಮಗಳ ತಂಗಿಯ ಜತೆ ಮದುವೆಯಾಗಿರುವ ಘಟನೆಯೂ ನಡೆದೇ ಹೋಗಿದೆ.
ಆಗಿದ್ದೇನೆಂದರೆ, ಮದುಮಗಳು ಅಂದರೆ ಅಕ್ಕ ಪ್ರೀತಿಯಲ್ಲಿ ಬಿದ್ದಿದ್ದಳು. ಆದರೆ ಆಕೆ ತನ್ನ ಪ್ರೀತಿಯ ವಿಷಯವನ್ನು ಮನೆಯವರಿಂದ ಗುಟ್ಟಾಗಿ ಇಟ್ಟಿದ್ದಳು. ಇದಕ್ಕೆ ಕಾರಣ, ಪ್ರಿಯಕರನ್ನು ಮದುವೆಯಾಗಲು ಅವಳಿಗೆ ಒಂದಿಷ್ಟು ದುಡ್ಡು ಬೇಕಿತ್ತು. ಆತನಿಗೆ ಸರಿಯಾದ ಉದ್ಯೋಗ ಇಲ್ಲದ ಕಾರಣ, ಮನೆಯಲ್ಲಿ ಈ ಮದುವೆಗೆ ಒಪ್ಪಿಗೆ ನೀಡುವುದಿಲ್ಲ ಎಂದು ಅವಳಿಗೆ ತಿಳಿದಿತ್ತು. ಇದನ್ನು ಅರಿಯದ ಆಕೆಯ ಪಾಲಕರು ಬೇರೆ ವರನ ಜತೆ ಮದುವೆಯನ್ನು ಗೊತ್ತು ಮಾಡಿದ್ದರು.
ಮದುವೆಗೆ ಎಲ್ಲಾ ಸಿದ್ಧತೆ ನಡೆಸಲಾಗಿತ್ತು. ಮದುವೆ ಖರ್ಚಿಗೆಂದು ಹಣ, ಮದುಮಕ್ಕಳಿಗೆ ಹಾಕುವ ಚಿನ್ನಾಭರಣ ಎಲ್ಲವೂ ಮನೆಯನ್ನು ಸೇರಿತ್ತು. ಮದುವೆಯ ಹಿಂದಿನ ದಿನದ ಶಾಸ್ತ್ರ ನಡೆಯುತ್ತಿದ್ದಾಗ ಈ ಮದುಮಗಳು ವರನಿಗೆ ಹಾಗೂ ಅಲ್ಲಿದ್ದವರಿಗೆ ಚಹಾ ಮಾಡಿಕೊಟ್ಟಿದ್ದಾಳೆ. ವೈಯಾರದಿಂದ ಆಕೆ ಕೊಟ್ಟ ಚಹವನ್ನು ಎಲ್ಲರೂ ಖುಷಿಯಿಂದ ಕುಡಿದಿದ್ದಾರೆ. ಆದರೆ ಈ ವಧು ಅದರಲ್ಲಿ ನಿದ್ದೆ ಮಾತ್ರೆ ಹಾಕಿಕೊಟ್ಟಿದ್ದು ಯಾರಿಗೂ ತಿಳಿಯಲೇ ಇಲ್ಲ! ಇದನ್ನು ಅರಿಯದ ಎಲ್ಲರೂ ಚಹಾ ಕುಡಿದು ನಿದ್ದೆಗೆ ಜಾರಿದ್ದಾರೆ.
ಮೊದಲೇ ಮಾಡಿದ ಪ್ಲ್ಯಾನ್‌ನಂತೆ ವಧು ಅಲ್ಲಿರುವ ಎಲ್ಲಾ ಚಿನ್ನಾಭರಣ, ಹಣ ದೋಚಿಕೊಂಡು ಪ್ರಿಕಕರನ ಜತೆ ಪರಾರಿಯಾಗಿದ್ದಾಳೆ. ಎಲ್ಲರಿಗೂ ಎಚ್ಚರವಾದಾಗ ಮೋಸದ ಅರಿವಾಗಿದೆ. ಇದರಿಂದ ವಧುವಿನ ಪಾಲಕರಿಗೆ ಭಾರಿ ಅವಮಾನವೂ ಆಗಿದೆ. ಆದರೆ ಮದುವೆ ನಿಲ್ಲಬಾರದು ಎನ್ನುವ ಕಾರಣಕ್ಕೆ ಗಂಡಿನ ಮನೆಯವರ ಬಳಿ ಕ್ಷಮೆಯಾಚಿಸಿದ್ದೂ ಅಲ್ಲದೇ ತಮ್ಮ ಕಿರಿಯ ಮಗಳನ್ನು ಮದುವೆಯಾಗುವಂತೆ ವರ ಹಾಗೂ ಆತನ ಮನೆಯವರಿಗೆ ಮನವಿ ಮಾಡಿಕೊಂಡಿದ್ದಾರೆ. ಇದಕ್ಕೆ ಅವರೂ ಒಪ್ಪಿದ ಹಿನ್ನೆಲೆಯಲ್ಲಿ ಅಕ್ಕನ ಬದಲು ವರ ತಂಗಿಗೆ ತಾಳಿ ಕಟ್ಟಿದ್ದು, ಮದುವೆ ಸುಸೂತ್ರವಾಗಿ ನೆರವೇರಿದೆ.
VIDEO: ಆಗಸದಲ್ಲಿ ಖುಷಿಯಿಂದ ಹಾರುತ್ತಿದ್ದ ಮಹಿಳೆಯರು ಧೊಪ್‌ ಎಂದು ಬಿದ್ದರು- ಭಯಾನಕ ವಿಡಿಯೋ ವೈರಲ್‌
ಮಸೀದಿಗಳಲ್ಲಿ ಧ್ವನಿವರ್ಧಕ- ವಕ್ಫ್‌ ಮಂಡಳಿಗಿಲ್ಲ ಅಧಿಕಾರ: ತೆರವುಗೊಳಿಸದಿದ್ರೆ ಕಠಿಣ ಕ್ರಮ- ಎಚ್ಚರಿಕೆ ನೋಟಿಸ್‌
ಅಪ್ಪನಿಂದ ರೆಡ್‌ಹ್ಯಾಂಡ್‌ ಆಗಿ ಸಿಕ್ಕಿಬಿದ್ದ ಬಾಲಕಿ: ತಪ್ಪಿಸಿಕೊಳ್ಳುವ ಭರದಲ್ಲಿ ಹಾರಿ ಸಾವು-ಬದುಕಿನ ನಡುವೆ ಹೋರಾಟ!