ಬೆಂಗಳೂರು: ಸೋಷಿಯಲ್ ಮೀಡಿಯಾದಲ್ಲಿ ಫಾಲೋವರ್ಸ್ ಜಾಸ್ತಿ ಇದ್ರೇನೇ ಆ ಪ್ರೊಫೈಲ್ಗೊಂದು ತೂಕ. ಆದರೆ ಎಷ್ಟೋ ಮಂದಿ ಫಾಲೋವರ್ಸ್ ಸಂಖ್ಯೆ ಹೆಚ್ಚಿಸಿಕೊಳ್ಳಲು ಸ್ಪಾನ್ಸರ್ ಮಾಡುವುದರಿಂದ ಹಿಡಿದು ಏನೇನೋ ಸರ್ಕಸ್ ಮಾಡುತ್ತಾರೆ. ಅದಾಗ್ಯೂ ಫಾಲೋವರ್ಸ್ ಸಂಖ್ಯೆ ಭಾರಿ ಎನಿಸಿಕೊಳ್ಳಲು ಸಾಕಷ್ಟು ಸಮಯವೇ ತೆಗೆದುಕೊಳ್ಳುತ್ತದೆ.
ಆದರೆ ಇಲ್ಲೊಬ್ಬರು ಇನ್ಸ್ಟಾಗ್ರಾಮ್ನಲ್ಲಿ ಖಾತೆ ತೆರೆದ ಕೆಲವೇ ಗಂಟೆಗಳಲ್ಲಿ ಈತನನ್ನು ಲಕ್ಷಾಂತರ ಮಂದಿ ಫಾಲೋ ಮಾಡಿದ್ದಾರೆ. ಮಾತ್ರವಲ್ಲ, ಈ ಮೂಲಕ ದಾಖಲೆಯನ್ನೇ ಬರೆದಿದ್ದಾರೆ. ಅಂದಹಾಗೆ ಇವರು ಬೇರಾರೂ ಅಲ್ಲ, ರುಪರ್ಟ್ ಗ್ರಿಂಟ್. ಹೌದು.. ‘ಹ್ಯಾರಿ ಪಾಟರ್’ ಸಿನಿಮಾ ಸರಣಿಯಲ್ಲಿ ಮೂರು ಪ್ರಮುಖ ಪಾತ್ರಗಳ ಪೈಕಿ ರಾನ್ ವೀಸ್ಲೆ ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಅದೇ ರುಪರ್ಟ್ ಗ್ರಿಂಟ್.
ತನ್ನ ಪುತ್ರಿಯನ್ನು ಎತ್ತಿಕೊಂಡಿರುವ ಫೋಟೋವೊಂದನ್ನು ಪೋಸ್ಟ್ ಮಾಡುವ ಮೂಲಕ ಇನ್ಸ್ಟಾಗ್ರಾಮ್ಗೆ ಪ್ರವೇಶಿಸಿದ ರುಪರ್ಟ್, ಖಾತೆ ತೆರೆದ 241 ನಿಮಿಷಗಳಲ್ಲಿ 10 ಲಕ್ಷ ಫಾಲೋವರ್ಸ್ ಹೊಂದಿದ್ದಾರೆ. 2001ರಿಂದ 2011ರ ವರೆಗಿನ ‘ಹ್ಯಾರಿ ಪಾಟರ್’ ಸರಣಿಯ ಎಲ್ಲ ಎಂಟು ಸಿನಿಮಾಗಳಲ್ಲಿ ರಾನ್ ವೀಸ್ಲೆ ಆಗಿ ಅಭಿನಯಿಸಿದ್ದರು. 32 ವರ್ಷದ ಇವರು ಈ ವರ್ಷಾರಂಭದಲ್ಲಿ ತಂದೆಯಾಗಿದ್ದರು.
ಹತ್ತು ವರ್ಷ ತಡವಾಗಿ ಇನ್ಸ್ಟಾಗ್ರಾಮ್ಗೆ ಪ್ರವೇಶಿಸುತ್ತಿದ್ದೇನೆ. ಅದೂ ನನ್ನ ಮಗಳನ್ನು ಜಗತ್ತಿಗೇ ಪರಿಚಯಿಸುವ ಸಲುವಾಗಿ ಎಂಬ ಕ್ಯಾಪ್ಷನ್ನೊಂದಿಗೆ ಗ್ರಿಂಟ್ ಮೂರು ದಿನಗಳ ಹಿಂದೆ ಇನ್ಸ್ಟಾಗ್ರಾಮ್ಗೆ ಪ್ರವೇಶಿಸಿದ್ದರು. ಆದರೆ 4 ಗಂಟೆ 1 ನಿಮಿಷದಲ್ಲಿ 10 ಲಕ್ಷ ಫಾಲೋವರ್ಸ್ ಹೊಂದುವ ಮೂಲಕ ಸರ್ ಡೇವಿಡ್ ಅಟೆನ್ಬರೋ ಅವರ ಹೆಸರಿನಲ್ಲಿದ್ದ ದಾಖಲೆ ಮುರಿದಿದ್ದಾರೆ. ಡೇವಿಡ್ 2019ರ ಅಕ್ಟೋಬರ್ 15ರಂದು ಇನ್ಸ್ಟಾಗ್ರಾಮ್ಗೆ ಪ್ರವೇಶಿಸಿದ್ದು, 5 ಗಂಟೆ 16 ನಿಮಿಷಗಳಲ್ಲಿ 10 ಲಕ್ಷ ಫಾಲೋವರ್ಸ್ಅನ್ನು ಹೊಂದಿದ್ದರು.