ಮುಂಬೈ: ಹೂಡಿಕೆದಾರರ ಭಾವನೆಗಳನ್ನು ಅಮೆರಿಕ-ಚೀನಾ ಟ್ರೇಡ್ ಡೀಲ್ ಬಲಪಡಿಸಿದ್ದು, ಕರೆನ್ಸಿ ವಹಿವಾಟಿನ ಮೇಲೆ ಪರಿಣಾಮ ಬೀರಿದೆ. ಕರೆನ್ಸಿ ಮಾರುಕಟ್ಟೆಯಲ್ಲಿ ಮಂಗಳವಾರದ ವಹಿವಾಟು ಆರಂಭವಾಗುತ್ತಲೇ ಅಮೆರಿಕದ ಡಾಲರ್ ಎದುರು ರೂಪಾಯಿ 8 ಪೈಸೆ ಏರಿಕೆ ದಾಖಲಿಸಿ ವಹಿವಾಟು ಶುರುಮಾಡಿದೆ.
ಮಾಧ್ಯಮ ವರದಿಗಳ ಪ್ರಕಾರ, ಚೀನಾದ ಉಪ ಪ್ರಧಾನಿ ಲ್ಯೂ ಹೇ ಈ ವಾರಾಂತ್ಯದಲ್ಲಿ ವಾಷಿಂಗ್ಟನ್ಗೆ ತೆರಳಲಿದ್ದು, ಅಲ್ಲಿ ಅಮೆರಿಕದ ಜತೆಗೆ ಟ್ರೇಡ್ ಡೀಲ್ಗೆ ಸಂಬಂಧಿಸಿ ಮಾತುಕತೆ ನಡೆಸಲಿದ್ದಾರೆ. ಲ್ಯೂ ಹೇ ಈ ವಿಚಾರದಲ್ಲಿ ಪ್ರಮುಖ ನೆಗೋಷಿಯೇಟರ್ ಆಗಿದ್ದು, ಒಂದು ಡೀಲ್ಗೆ ಈ ವಾರಾಂತ್ಯದಲ್ಲಿ ಉಭಯ ದೇಶಗಳ ಪ್ರತಿನಿಧಿಗಳು ಸಹಿ ಹಾಕುವ ನಿರೀಕ್ಷೆ ಹೂಡಿಕೆದಾರರಲ್ಲಿ ಮೂಡಿದೆ.
ಸಾಗರೋತ್ತರ ಮಾರುಕಟ್ಟೆಯಲ್ಲಿ ಅಮೆರಿಕದ ಡಾಲರ್ ಮೌಲ್ಯ ಕುಸಿತ ಕಂಡರೂ, ರೂಪಾಯಿಯ ಬಲವೃದ್ಧಿಯಾಗಿದೆ. ಇದೇ ವೇಳೆ ಕಚ್ಚಾ ತೈಲ ಮಾರುಕಟ್ಟೆಯಲ್ಲಿ ಏರಿಕೆ ದಾಖಲಾಗಿದೆ. ಇಂಟರ್ ಬ್ಯಾಂಕ್ ಫಾರಿನ್ ಎಕ್ಸ್ಚೇಂಜ್ನಲ್ಲಿ ಸೋಮವಾರ ರೂಪಾಯಿ ಮೌಲ್ಯ 71.31ರಲ್ಲಿ ಕೊನೆಗೊಂಡಿತ್ತು. ಮಂಗಳವಾರ ರೂಪಾಯಿ ವಹಿವಾಟು 71.28ರಲ್ಲಿ ಆರಂಭವಾಗಿದ್ದು, ನಂತರ 71.23ರಲ್ಲಿ ವಹಿವಾಟು ಮುಂದುವರಿದಿದೆ. (ಏಜೆನ್ಸೀಸ್)