ಬೆಂಗಳೂರು: ಇನ್ನೇನು ಕೆಲ ದಿನಗಳಲ್ಲೇ ಐಪಿಎಲ್ ಪಂದ್ಯ ಆರಂಭವಾಗಲಿದ್ದು, ಈ ಬಾರಿಯ ಕಪ್ ನಮ್ಮದೇ ಎನ್ನುತ್ತಿದ್ದಾರೆ ಆರ್ಸಿಬಿ ಅಭಿಮಾನಿಗಳು. ಅತಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಆರ್ಸಿಬಿ ತಂಡ ಇಂದು ಪ್ರೇಮಿಗಳ ದಿನದ ಪ್ರಯುಕ್ತ ತನ್ನ ಅಭಿಮಾನಿಗಳಿಗೆ ತಂಡದ ನೂತನ ಲಾಂಛನವನ್ನು ಉಡುಗೊರೆಯಾಗಿ ನೀಡುವುದರೊಂದಿಗೆ ಕನ್ನಡದಲ್ಲಿಯೇ ಪ್ರೇಮ ನಿವೇದನೆ ಮಾಡಿಕೊಂಡಿದೆ.
ಎರಡು ದಿನಗಳ ಹಿಂದೆ ಆರ್ಸಿಬಿ ತನ್ನ ಎಲ್ಲ ಅಧಿಕೃತ ಸಾಮಾಜಿಕ ಜಾಲತಾಣಗಳ ಖಾತೆಗಳಲ್ಲಿ ತನ್ನ ಲಾಂಛನವನ್ನು ತೆಗೆದಿತ್ತು. ಏನಾಗಬಹುದು ಎಂದು ಕಾತುರದಿಂದ ಕಾಯುತ್ತಿದ್ದ ಅಭಿಮಾನಿಗಳಿಗೆ ಇಂದು ತಂಡವು ತನ್ನ ಹೊಸ ಲಾಂಛನವನ್ನು ಬಿಡುಗಡೆ ಮಾಡುವ ಮೂಲಕ ಈ ಬಾರಿ ಕಪ್ ಗೆದ್ದೇ ಗೆಲ್ಲುತ್ತೇವೆ ಎಂದು ಭರವಸೆ ನೀಡಿದೆ. ಹೊಸ ಲಾಂಛನ ಬಿಡುಗಡೆ ಮಾಡಿದ್ದಷ್ಟೇ ಅಲ್ಲದೆ ಕನ್ನಡದಲ್ಲಿ ಟ್ವೀಟ್ ಮಾಡುವ ಮೂಲಕ ಮತ್ತೊಮ್ಮೆ ಕನ್ನಡಿಗರ ಮನಸ್ಸನ್ನು ಸೆರೆಹಿಡಿದಿದೆ.
ಆರ್ಸಿಬಿಯ ನೂತನ ಲಾಂಛನದಲ್ಲಿ ಕೆಂಪು ಬಣ್ಣದ ಬ್ಯಾಕ್ಗ್ರೌಂಡ್ ಇದ್ದು, ಬಂಗಾರದ ಬಣ್ಣದ ಸಿಂಹವಿದೆ. ಬೆಂಗಳೂರನ್ನು ಪ್ರತಿನಿಧಿಸುವ ಈ ತಂಡವು, “ಹೆಸರಲ್ಲು ನೀವೆ, ಉಸಿರಲ್ಲು ನೀವೆ, ಎಲ್ಲೆಲ್ಲೂ ನೀವೇ ಸ್ಫೂರ್ತಿ. ಸೋಲಿನಲ್ಲೂ ನೀವೆ, ಗೆಲುವಿನಲ್ಲೂ ನೀವೆ, ಎಂದೆಂದು ನೀವೆ ಸಾಥಿ. ನಮ್ಮ ನಿನ್ನೆಗಳು ನೀವೆ, ನಾಳೆಗಳೂ ನೀವೆ, ಎಲ್ಲವೂ ನಿಮ್ಮ ಪ್ರೀತಿ.” ಎಂದು ಟ್ವೀಟ್ ಮಾಡಿದೆ. ಪ್ರೇಮಿಗಳ ದಿನಕ್ಕೆ ಹೊಸ ಲಾಂಛನದ ಉಡುಗೊರೆಯೊಂದಿಗೆ ಈ ರೀತಿಯಲ್ಲಿ ಪ್ರೀತಿ ಹಂಚಿಕೊಂಡಿರುವುದು ಅಭಿಮಾನಿಗಳ ಸಂತಸಕ್ಕೆ ಕಾರಣವಾಗಿದೆ. (ಏಜೆನ್ಸೀಸ್)