ಲಂಡನ್: ಇನ್ಫೋಸಿಸ್ ಸಂಸ್ಥಾಪಕ ನಾರಾಯಣ ಮೂರ್ತಿ ಅವರ ಅಳಿಯ ಹಾಗೂ ಭಾರತ ಮೂಲದ ರಾಜಕಾರಣಿ ರಿಷಿ ಸುನಕ್ ಅವರು ಯುನೈಟೆಡ್ ಕಿಂಗ್ಡಮ್ನ ನೂತನ ಆರ್ಥಿಕ ಸಚಿವರಾಗಿ ನೇಮಕವಾಗಿದ್ದಾರೆ.
ಪ್ರಧಾನಿ ಬೋರಿಸ್ ಜಾನ್ಸನ್ ನೇತೃತ್ವದಲ್ಲಿ ಗುರುವಾರ ನಡೆದ ಸಂಪುಟ ಪುನಾರಚನೆಯಲ್ಲಿ ಸುನಕ್ ಆರ್ಥಿಕ ಸಚಿವರಾಗಿ ಬಡ್ತಿ ಪಡೆದಿದ್ದು, ಕನ್ಸರ್ವೇಟಿವ್ ಪಕ್ಷದ ನಾಯಕ ಬೋರಿಸ್, ಸರ್ಕಾರದ ಉನ್ನತ ಸಚಿವರುಗಳಲ್ಲಿ ಒಬ್ಬರಾಗಿದ್ದಾರೆ. ಮತ್ತೊಬ್ಬ ಭಾರತೀಯ ಮೂಲದ ಪ್ರೀತಿ ಪಟೇಲ್ ಸಹ ಗೃಹ ಕಾರ್ಯದರ್ಶಿಯಾಗಿದ್ದು, ಅವರೊಟ್ಟಿಗೆ ಸುನಕ್ ಕೂಡ ಒಳ್ಳೆಯ ಸ್ಥಾನವನ್ನು ಅಲಂಕರಿಸಿದ್ದಾರೆ.
ಇದಕ್ಕೂ ಮುನ್ನ ಪಾಕಿಸ್ತಾನದ ಮೂಲದ ಸಾಜಿದ್ ಜಾವಿದ್ ಅವರು ಚಾನ್ಸಲರ್(ಆರ್ಥಿಕ ಸಚಿವ) ಸ್ಥಾನಕ್ಕ ರಾಜೀನಾಮೆ ನೀಡಿದ್ದರು. 2019 ಡಿಸೆಂಬರ್ ಚುನಾವಣೆಯಲ್ಲಿ ಬೋರಿಸ್ ಜಾನ್ಸನ್ ಅವರು ಬಹುಮತದೊಂದಿಗೆ ಆಯ್ಕೆಯಾದ ಬಳಿಕ ನಡೆದ ಬಹುದೊಡ್ಡ ರಾಜಕೀಯ ಬೆಳವಣಿಗೆ ಇದಾಗಿದೆ.
ಇದೀಗ ಜಾವೀದ್ ಸ್ಥಾನಕ್ಕೆ ಭಾರತೀಯನ ಪ್ರವೇಶವಾಗಿದೆ. ಇದಕ್ಕೂ ಮುನ್ನ ಜಾವೀದ್ ಅವರ ಜ್ಯೂನಿಯರ್ ಆಗಿದ್ದ, ಸುನಕ್ ಹಣಕಾಸು ಇಲಾಖೆಯ ಮುಖ್ಯ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸಿದ್ದರು.
39 ವರ್ಷದ ಸುನಕ್ ಅವರು ಸರ್ಕಾರದಲ್ಲಿ ಎರಡನೇ ಪ್ರಮುಖ ಆಡಳಿತವಾಗಿರುವ ಹಣಕಾಸು ಇಲಾಖೆಯ ಚುಕ್ಕಾಣಿ ಹಿಡಿದ್ದಿದ್ದಾರೆ. ಅಂದಹಾಗೆ ಸುನಕ್, ಯಾರ್ಕ್ಶೈರ್ನ ರಿಚ್ಮಂಡ್ ಕ್ಷೇತ್ರದ ಸಂಸದರಾಗಿದ್ದಾರೆ. ಇವರು 2015ರಲ್ಲಿ ಮೊದಲ ಬಾರಿಗೆ ಯುಕೆ ಸಂಸತ್ತಿಗೆ ಪ್ರವೇಶ ಪಡೆದರು. (ಏಜೆನ್ಸೀಸ್)