ನವದೆಹಲಿ: ಎರಡು ತಿಂಗಳ ಅವಧಿಯೊಳಗೆ ಎರಡು ದ್ವಿಶತಕ ಬಾರಿಸುವ ಮೂಲಕ ಗೋಡೆ ಖ್ಯಾತಿಯ ಟೀಮ್ ಇಂಡಿಯಾದ ಮಾಜಿ ಆಟಗಾರ ಹಾಗೂ ಎನ್ಸಿಎ ಮುಖ್ಯಸ್ಥ ರಾಹುಲ್ ಡ್ರಾವಿಡ್ ಅವರ ಪುತ್ರ ಸಮೀತ್ ದ್ರಾವಿಡ್ ಅಪ್ಪನ ಹಾದಿಯಲ್ಲೇ ಮುನ್ನಡೆಯುವ ಸೂಚನೆ ನೀಡಿದ್ದಾರೆ.
ಮಲ್ಯ ಆದಿತಿ ಇಂಟರ್ ನ್ಯಾಷನಲ್ ಸ್ಕೂಲ್ ಮತ್ತು ಶ್ರೀ ಕುಮಾರನ್ ಸ್ಕೂಲ್ ನಡುವೆ ನಡೆದ 14 ವಯೋಮಿತಿಯ ಬಿಟಿಆರ್ ಶೀಲ್ಡ್ ಪಂದ್ಯದಲ್ಲಿ ಈ ಸಾಧನೆ ಮಾಡಿದ್ದು, ಎರಡು ತಿಂಗಳ ಅವಧಿಯೊಳಗೆ ಬಾರಿಸಿದ ಎರಡನೇ ದ್ವಿಶತಕ ಸಾಧನೆಯಾಗಿದೆ.
33 ಬೌಂಡರಿ ನೆರವಿನಿಂದ 204 ರನ್ ಗಳಿಸಿದ ಸಮೀತ್, ಮಲ್ಯ ಆದಿತಿ ಇಂಟರ್ನ್ಯಾಷನಲ್ ಸ್ಕೂಲ್ 3 ವಿಕೆಟ್ ನಷ್ಟಕ್ಕೆ 377 ರನ್ ಗಳಿಸಲು ನೆರವಾದರು. ಗುರಿ ಬೆನ್ನತ್ತಿದ ಶ್ರೀ ಕುಮಾರನ್ ಸ್ಕೂಲ್ 110 ರನ್ಗೆ ಆಲೌಟ್ ಆಯಿತು. ವಿಶೇಷವೆಂದರೆ, ಸಮೀತ್ ಕೂಡ ಎರಡು ಪ್ರಮುಖ ವಿಕೆಟ್ ಕಬಳಿಸಿದರು. ಸಮೀತ್ ತಂಡ 267 ರನ್ ಭಾರಿ ಅಂತರದಿಂದ ಪಂದ್ಯವನ್ನು ಗೆದ್ದುಕೊಂಡಿತು.
ಸಮೀತ್ ಕಳೆದ ವರ್ಷ ಡಿಸೆಂಬರ್ನಲ್ಲಿ ಕೋಲ್ಕತದಲ್ಲಿ ನಡೆದ 14 ವಯೋಮಿತಿಯ ಅಂತರ ವಲಯ ರಾಜ್ಯ ಮಟ್ಟದ ಟೂರ್ನಮೆಂಟ್ನಲ್ಲಿಯೂ ದ್ವಿಶತಕ ಬಾರಿಸಿದ್ದರು. ವೈಸ್-ಪ್ರೆಸೆಡೆಂಟ್ ಇಲೆವೆನ್ ತಂಡದ ಪರ ಆಡಿದ ಸಮೀತ್ 22 ಬೌಂಡರಿ ನೆರವಿನೊಂದಿಗೆ 256 ರನ್ ಗಳಿಸಿದ್ದರು. ಆದರೆ, ಪಂದ್ಯ ಡ್ರಾನಿಂದ ಅಂತ್ಯಗೊಂಡಿತ್ತು. ಅಲ್ಲದೆ, ಪಂದ್ಯದಲ್ಲಿ ಅಮೀತ್ ಮೂರು ವಿಕೆಟ್ ಕೂಡ ಪಡೆದುಕೊಂಡಿದ್ದರು.
ಸದ್ಯ 14 ವಯೋಮಿತಿಯ ಪಂದ್ಯಾವಳಿಯಲ್ಲಿ ಸಮೀತ್ ನಿರಂತರವಾಗಿ ಗಮನಾರ್ಹ ಪ್ರದರ್ಶನ ನೀಡುತ್ತಿರುವುದನ್ನು ನೋಡಿದರೆ, ಅಪ್ಪನ ಹಾದಿಯಲ್ಲೇ ರಾಷ್ಟ್ರೀಯ ಮಟ್ಟದ ತಂಡದಲ್ಲಿ ಭರವಸೆಯ ಆಟಗಾರನಾಗಿ ಹೊರಹೊಮ್ಮುವ ಸಾಧ್ಯತೆ ಇದೆ ಎಂದು ಊಹಿಸಬಹುದಾಗಿದೆ. ಇತ್ತ ದ್ರಾವಿಡ್ ಕೂಡ ಪುತ್ರನ ಹಾದಿಯಲ್ಲಿ ಕೈಹಿಡಿದು ನಡೆಸುತ್ತಿದ್ದಾರೆ. (ಏಜೆನ್ಸೀಸ್)