ಬೆಂಗಳೂರು: ವಾಹನ ಚಾಲನೆ ಮಾಡುವಾಗ ಮೊಬೈಲ್ ಫೋನ್ ಬಳಕೆ ಮಾಡುವುದು ಕಾನೂನು ಬಾಹಿರ ಎಂಬುದು ಎಲ್ಲರಿಗೂ ತಿಳಿದಿದೆ. ಆದರೆ, ಆ ಕಾನೂನನ್ನು ಎಷ್ಟರ ಮಟ್ಟಿಗೆ ಪಾಲಿಸುತ್ತಿದ್ದಾರೆ ಎಂಬುದೇ ಚರ್ಚಿತ ವಿಷಯವಾಗಿದೆ. ಅದರಲ್ಲೂ ಇಂದಿನ ಆಧುನಿಕ ಯುಗದಲ್ಲಿ ಹ್ಯಾಂಡ್ಫ್ರೀ ಬ್ಲ್ಯೂಟೂತ್ ಹಾಗೂ ಹೆಡ್ಫೋನ್ನಂತಹ ಸಾಧನಗಳನ್ನು ಡ್ರೈವಿಂಗ್ ವೇಳೆ ಬಳಸುವುದು ಸಾಮಾನ್ಯವಾಗಿದೆ. ಮೊಬೈಲ್ ಫೋನ್ ಬಳಕೆಯಿಂದ ಉಂಟಾಗಿರುವ ಅಪಘಾತಗಳಿಗಂತೂ ಲೆಕ್ಕವಿಲ್ಲ. ಇದನ್ನು ಗಂಭೀರವಾಗಿ ತೆಗೆದುಕೊಂಡಿರುವ ಬೆಂಗಳೂರು ಪೊಲೀಸರು ಕಠಿಣ ನಿರ್ಧಾರವೊಂದನ್ನು ಮಾಡಿದ್ದಾರೆ. ಅದೇನೆಂದು ತಿಳಿಯಲು ಮುಂದೆ ಓದಿ.
ವಾಹನ ಸವಾರರೇ ಎಚ್ಚರ ಇನ್ಮುಂದೆ ಮೊಬೈಲ್ ಬಳಕೆಗೂ ಬೀಳಲಿದೆ ದಂಡ. ನೀವು ಮೊಬೈಲ್ ಅನ್ನು ಕೈನಲ್ಲೇ ಹಿಡಿಕೊಳ್ಳಬೇಕು ಅಂಥೇನಿಲ್ಲ, ಇನ್ನು ಮುಂದೆ ಬ್ಲ್ಯೂಟೂತ್ ಅಥವಾ ಹೆಡ್ಫೋನ್ ಬಳಸಿ ವಾಹನ ಚಾಲನೆ ಮಾಡಿದರೂ ಕೂಡ ದಂಡ ಕಟ್ಟಬೇಕಾಗುತ್ತದೆ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಬೆಂಗಳೂರು ಪೊಲೀಸರು ಯಾವುದೇ ವಿಧದಲ್ಲೂ ಮೊಬೈಲ್ ಫೋನ್ ಬಳಸುವಾಗ ಇನ್ಮುಂದೆ ಪೊಲೀಸರ ಕೈಗೆ ಸಿಕ್ಕರೆ, ಅವರಿಗೆ 1000 ರೂಪಾಯಿಯ ದಂಡ ವಿಧಿಸಿ ರಶೀದಿ ನೀಡಲಾಗುವುದು ಎಂಬ ಎಚ್ಚರಿಕೆ ಸಂದೇಶ ರವಾನಿಸಿದೆ.
ಹೆಡ್ಫೋನ್ ಧರಿಸಿ ಡ್ರೈವಿಂಗ್ ಮಾಡಿದರೆ ಅಂಥವರನ್ನು ಹೆಲ್ಮೆಟ್ ನಿಯಮ ಅಥವಾ ಸಂಚಾರಿ ನಿಯಮ ಉಲ್ಲಂಘನೆ ಅಡಿಯಲ್ಲಿ ಸೇರಿಸಿ, ದಂಡ ವಿಧಿಸಲಾಗುವುದು ಎಂದು ಬೆಂಗಳೂರು ಪೊಲೀಸರು ತಿಳಿಸಿದ್ದಾರೆ. ಹೆಲ್ಮೆಟ್ ಧರಿಸಿ ಅದರಡಿಯಲ್ಲಿ ಇಯರ್ ಫೋನ್ ಹಾಕಿಕೊಂಡರು ಕೂಡ ಅದು ಕಾನೂನು ಬಾಹಿರ ಎಂದು ಹೇಳಿದ್ದಾರೆ.
ಇನ್ನು ಬಹುತೇಕ ಕಡೆಗಳಲ್ಲಿ ಈಗಾಗಲೇ ನೋಡಿರುವಂತೆ ಹೆಲ್ಮೆಟ್ ಅಡಿಯಲ್ಲಿ ಮೊಬೈಲ್ ಫೋನ್ ಇಟ್ಟುಕೊಂಡು ಮಾತನಾಡಿದರೂ ಕೂಡ ದಂಡ ತಪ್ಪಿದ್ದಲ್ಲ. ಅಲ್ಲದೆ, ಫೋನ್ ಜೇಬಿನಲ್ಲಿಟ್ಟು ಬ್ಲ್ಯೂಟೂತ್ ಡಿವೈಸ್ ಮೂಲಕ ಮಾತನಾಡುವುದು ಕೂಡ ನಿಯಮ ಉಲ್ಲಂಘನೆಯಾಗಿದೆ. ಕಾನೂನಿನ ಪ್ರಕಾರ ವಾಹನಗಳನ್ನು ಚಲಾಯಿಸುವಾಗ ಯಾವುದೇ ರೀತಿಯ ಎಲೆಕ್ಟ್ರಾನಿಕ್ ಸಾಧನಗಳನ್ನು ಉಪಯೋಗಿಸುವುದು ಕಾನೂನು ಬಾಹಿರ ಎಂದು ಪರಿಗಣಿಸಲಾಗಿದೆ. ಹೀಗಾಗಿ ವಾಹನ ಸವಾರರು ಎಚ್ಚೆತ್ತುಕೊಳ್ಳುವುದು ಒಳಿತು. ಇಲ್ಲವಾದಲ್ಲಿ ಜೇಬಿಗೆ ಮತ್ತಷ್ಟು ಕತ್ತರಿ ಬೀಳುವುದರಲ್ಲಿ ಅನುಮಾನವೇ ಇಲ್ಲ.
ಸಿಗ್ನಲ್ನಲ್ಲಿ ನಿಂತು ಮಾತನಾಡುವಂತಿಲ್ಲ
ಟ್ರಾಫಿಕ್ನಲ್ಲಿ ರೆಡ್ ಸಿಗ್ನಲ್ ಬಿದ್ದಿದೆ ಒಂದೆರೆಡು ನಿಮಿಷ ಟೈಂ ಇದೆ ಆ ಗ್ಯಾಪ್ ಅಲ್ಲಿ ಮಾತನಾಡೋಣ ಅಂತ ಮೊಬೈಲ್ ತೆಗೆದು ಮಾತನಾಡಿದರೂ ಕೂಡ ನೀವು ದಂಡದಿಂದ ತಪ್ಪಿಸಿಕೊಳ್ಳಲು ಆಗುವುದಿಲ್ಲ. ಆ ರೀತಿ ಮಾತನಾಡುವುದರಿಂದ ಪಕ್ಕದ ಸವಾರರಿಗೆ ತೊಂದರೆ ಆಗಲಿದೆ ಎಂಬುದು ಕಾನೂನಿನ ವಾದ. ಅದೇ ರೀತಿ ಕಾರು ಚಾಲಕ ಆಧುನಿಕ ಸಾಧನದ ಮುಖಾಂತರ ಸಿಗ್ನಲ್ನಲ್ಲಿ ಲೌಡ್ ಸ್ಪೀಕರ್ನೊಂದಿಗೆ ಮಾತನಾಡುವುದು ಕೂಡ ಕಾನೂನು ಬಾಹಿರ ಎಂದು ಬೆಂಗಳೂರು ಪೊಲೀಸರು ಎಚ್ಚರಿಸಿದ್ದಾರೆ.
ಮ್ಯೂಸಿಕ್ ಮತ್ತು ಗೂಗಲ್ ಮ್ಯಾಪ್ಗೂ ಕೆಲ ನಿಯಮ
ಚಾಲನೆ ವೇಳೆ ಹೆಡ್ಫೋನ್ ಅಥವಾ ಬ್ಲ್ಯೂಟೂತ್ ಡಿವೈಸ್ ಬಳಸಿ ಮ್ಯೂಸಿಕ್ ಕೇಳುವುದು ಮತ್ತು ಗೂಗಲ್ ಮ್ಯಾಪ್ ಬಳಸುವುದು ಕೂಡ ಕಾನೂನು ಬಾಹಿರ. ಆದಾಗ್ಯೂ, ಬೇರೆ ಸವಾರರಿಗೆ ತೊಂದರೆ ಆಗದಂತೆ ಕಾರಿನಲ್ಲಿ ಮ್ಯೂಸಿಕ್ ಪ್ಲೇ ಮಾಡಲು ಅವಕಾಶ ಇದೆ. ಆದರೆ, ಬ್ಲ್ಯೂಟೂತ್ ಬಳಸುವಂತಿಲ್ಲ.
ದ್ವಿಚಕ್ರ ವಾಹನ ಚಾಲನೆ ಮಾಡುವಾಗ ಅಥವಾ ಸವಾರಿ ಮಾಡುವಾಗ ಗೂಗಲ್ ಪ್ಯಾಪ್ಗಳನ್ನು ಬಳಸಬಹುದು ಎಂದು ಪೊಲೀಸರು ಹೇಳುತ್ತಾರೆ. ಆದಾಗ್ಯೂ, ನಕ್ಷೆಗಳನ್ನು ಬಳಸುವಾಗ ಸವಾರ ಫೋನ್ ಹಿಡಿದಿರಬಾರದು. ಬೈಕ್ ಅಥವಾ ಕಾರಿಗಳಲ್ಲಿ ಫೋನ್ ಹೋಲ್ಡರ್ ಅಳವಡಿಸಿಕೊಂಡು ಮ್ಯಾಪ್‌ಗಳನ್ನು ವೀಕ್ಷಿಸಲು ಅವಕಾಶ ನೀಡಲಾಗುತ್ತದೆ. ಚಾಲನೆ ಮಾಡುವಾಗ ಅಥವಾ ಸವಾರಿ ಮಾಡುವಾಗ ಫೋನ್ ಹಿಡಿದಿಡುವುದನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. (ಏಜೆನ್ಸೀಸ್)
ಐಸ್‌ಕ್ರೀಂ ಕಡ್ಡಿಯಲ್ಲಿ ಇಡ್ಲಿ ತಿನ್ಬೋದಾ? ಬೆಂಗಳೂರಿನ ಹೋಟೆಲ್‌ನಲ್ಲಿ ಇನ್ಮುಂದೆ ಅದೂ ಸಾಧ್ಯ!
ನಟಿ ಸೌಜನ್ಯ ಸಾವು ಪ್ರಕರಣ: ಆರೋಪಿ ಮೊಬೈಲ್ನಲ್ಲಿದ್ದ ಫೋಟೋ-ವಿಡಿಯೋಗಳ ಬೆನ್ನತ್ತಿದ ಪೊಲೀಸರು
ಪತಿ ಜೈಲಿನಿಂದ ಬರುತ್ತಿದ್ದಂತೆಯೇ ಪ್ರೀತಿಯ ಬಗ್ಗೆ ಶಿಲ್ಪಾ ನಿಗೂಢ ಸಂದೇಶ- ತಲೆ ಕೆಡಿಸಿಕೊಂಡ ಅಭಿಮಾನಿಗಳು