ನ್ಯೂಯಾರ್ಕ್: ಪಾದಾಚಾರಿ ಮಾರ್ಗದಲ್ಲಿ ಸಾಗುತ್ತಿದ್ದ ಮಹಿಳೆಯ ಮೇಲೆ ಹಿಂದಿನಿಂದ ದಾಳಿ ಮಾಡಿದ ಕಾಮುಕನೊಬ್ಬ ಆಕೆಯನ್ನು ನೆಲಕ್ಕುರುಳಿಸಿ ಲೈಂಗಿಕ ದೌರ್ಜನ್ಯ ಎಸಗಿ ಪರಾರಿ ಆಗಿರುವ ಘಟನೆ ಅಮೆರಿಕದ ಬ್ರೂಕ್ಲಿನ್ನಲ್ಲಿ ನಡೆದಿದ್ದು, ಇದಕ್ಕೆ ಸಂಬಂಧಿಸಿದ ದೃಶ್ಯ ಸಿಸಿಟಿವಿಯಲ್ಲಿ ದಾಖಲಾಗಿದೆ.
ಈ ದಾಳಿಯು ಸೋಮವಾರ ರಾತ್ರಿ 8.10ರ ಸುಮಾರಿಗೆ ಬ್ರೂಕ್ಲಿನ್ನ ಟ್ರೆಂಡಿ ವಿಲಿಯಮ್ಸ್ಬರ್ಗ್ನಲ್ಲಿ ನಡೆದಿದೆ. 35 ವರ್ಷದ ಸಂತ್ರಸ್ತೆ ರಾತ್ರಿ ವಾಕಿಂಗ್ಗೆ ತೆರಳಿದ್ದಳು. ಈ ವೇಳೆ ಆಕೆಯನ್ನು ಕಾಮುಕನೊಬ್ಬ ಹಿಂಬಾಲಿಸುತ್ತಿದ್ದ. ಆದರೆ, ಅದರ ಬಗ್ಗೆ ಆಕೆ ಗಮನ ಹರಿಸಿರಲಿಲ್ಲ.
ಅಪರಿಚಿತನಾಗಿದ್ದರಿಂದ ಆತನ ಕಡೆ ಹೆಚ್ಚು ಗಮನಹರಿಸದೇ ಸಂತ್ರಸ್ತೆ ತನ್ನ ವಾಕಿಂಗ್ ಮುಂದುವರಿಸಿದ್ದಳು. ಮಾರ್ಗನ್ ಅವೆನ್ಯೂ ರಸ್ತೆಯಿಂದ ಸ್ಟ್ಯಾಗ್ ಸ್ಟ್ರೀಟ್ ಹೋಗುತ್ತಿದ್ದಳು. ನಿರಂತವಾಗಿ ಆಕೆಯನ್ನು ಫಾಲೋ ಮಾಡಿಕೊಂಡು ಬಂದ ಆಗಂತುಕ ಹಿಂದಿನಿಂದ ಓಡಿ ಬಂದು ಮಹಿಳೆಯ ಮೇಲೆ ಜಿಗಿದು ಆಕೆಯನ್ನು ಕೆಳಗೆ ಬೀಳಿಸಿದ.
ಇದಾದ ಬಳಿಕ ಕಾಮುಕ ಮಹಿಳೆಯ ಶಾರ್ಟ್ಸ್ ಅನ್ನು ಕೆಳಗೆ ಜಾರಿಸಿ, ಲೈಂಗಿಕ ಕಿರುಕುಳ ನೀಡಿ, ಅಲ್ಲಿಂದ ಪರಾರಿ ಆಗುತ್ತಾನೆ. ಇದಿಷ್ಟು ದೃಶ್ಯ ಅಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಮಹಿಳೆಯು ದೈಹಿಕವಾಗಿ ಗಾಯಗೊಂಡಿಲ್ಲ ಮತ್ತು ಆಕೆ ವೈದ್ಯಕೀಯ ಚಿಕಿತ್ಸೆಯನ್ನು ನಿರಾಕರಿಸಿದ್ದಾಳೆ.
ಆರೋಪಿಯನ್ನು 5 ಅಡಿ 5 ಇಂಚು ಎತ್ತರ ಮತ್ತು 165 ಪೌಂಡ್ ತೂಕದ, ಕಪ್ಪು ಕೂದಲಿ ವ್ಯಕ್ತಿ ಎಂದು ಗುರುತಿಸಲಾಗಿದೆ. ಆರೋಪಿ ಕೊನೆಯದಾಗಿ ಕಪ್ಪು ಟಿ-ಶರ್ಟ್, ಹಸಿರು ಕ್ಯಾಮೊ ಪ್ಯಾಂಟ್ ಮತ್ತು ಕಪ್ಪು ಸ್ನೀಕರ್ಸ್ ಧರಿಸಿ, ಗಲ್ಲದ ಸುತ್ತಲೂ ಕಪ್ಪು ಮುಖದ ಮುಖವಾಡವನ್ನು ಧರಿಸಿದ್ದನು.
ಕಳೆದ ಹಲವಾರು ತಿಂಗಳುಗಳಿಂದ ನ್ಯೂಯಾರ್ಕ್ ನಗರಕ್ಕೆ ತಲೆನೋವಾಗಿರುವ ಅಪರಾಧ ಸಾಂಕ್ರಾಮಿಕದ ನಡುವೆಯೇ ಬ್ರೂಕ್ಲಿನ್ನಲ್ಲಿ ನಡೆದ ಈ ದಾಳಿಯಿಂದ ಮತ್ತಷ್ಟು ಆತಂಕ ಹೆಚ್ಚಾಗಿದೆ. 2021ರ ಆರಂಭದಿಂದ ಐದು ಪ್ರಾಂತ್ಯಗಳಲ್ಲಿ 2,200 ಕ್ಕೂ ಹೆಚ್ಚು ವೈಯಕ್ತಿಕ ಲೈಂಗಿಕ ಅಪರಾಧಗಳು ವರದಿಯಾಗಿವೆ.
ಸದ್ಯ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಕೈಗೊಂಡಿದ್ದು ಆರೋಪಿ ಪತ್ತೆಗೆ ಬಲೆ ಬೀಸಿದ್ದಾರೆ. (ಏಜೆನ್ಸೀಸ್)
(ವಿಡಿಯೋ ಕೃಪೆ: ಡೈಲಿ ಮೇಲ್)