ಮಟನ್​ ಅಥವಾ ನಾನು... ಮಾಂಸಾಹಾರಿ ಪತ್ನಿಗೆ ಆಯ್ಕೆ ನೀಡಿ ಪೇಚಿಗೆ ಸಿಲುಕಿದ ಸಸ್ಯಹಾರಿ ಗಂಡ!

ನವದೆಹಲಿ: ಟಿವಿ ಮಾಧ್ಯಮ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಊಟಕ್ಕಾಗಿ ಕಿತ್ತಾಡುವ ದೃಶ್ಯಗಳು ಸಾಮಾನ್ಯವಾದರೂ, ಒಂದು ಪ್ಲೇಟ್​ ಊಟ, ಒಂದು ಸಂಬಂಧವನ್ನೇ ನಾಶಮಾಡುವುದು ವಿರಳಾತಿವಿರಳ ಎಂದು ಹೇಳಬಹುದು. ಆದರೆ, ಅಂತಹ ವಿರಳ ಘಟನೆ ಇಲ್ಲಿ ನಡೆದು ಹೋಗಿದೆ. ಸಸ್ಯಹಾರಿ ವ್ಯಕ್ತಿಯೊಬ್ಬ ತನ್ನ ಮಾಂಸಹಾರಿ ಪತ್ನಿಯ ಬಗ್ಗೆ ಬರೆದಿರುವ ಸಾಲುಗಳು ಸಾಮಾಜಿಕ ಜಾಲತಾಣಗಳಲ್ಲಿ ಇದೀಗ ವೈರಲ್​ ಆಗಿದೆ.

ನ್ಯೂಸ್​ ಪೇಪರ್​ ತುಣುಕೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿದೆ. ಅದರಲ್ಲಿ ವ್ಯಕ್ತಿಯೊಬ್ಬ ತನ್ನ ಪತ್ನಿಯ ಬಗ್ಗೆ ಬರೆದುಕೊಂಡಿದ್ದಾನೆ. ಆತನ ಪತ್ನಿ ಮನೆಯಿಂದ ಹೊರಗಡೆ ಮಾಂಸಾಹಾರವನ್ನು ಎಂಜಾಯ್​ ಮಾಡುತ್ತಾಳಂತೆ. ಆಕೆಗೆ ಮಟನ್​ ಅಂದ್ರೆ ತುಂಬಾ ಇಷ್ಟ ಅಂತಾ ಮದುವೆಗೂ ಮುಂಚೆಯೇ ಗೊತ್ತಾಗಿತ್ತಂತೆ. ಮದುವೆ ಬಳಿಕ ಎಲ್ಲವನ್ನು ತ್ಯಜಿಸುತ್ತೇನೆಂದು ಮಾತುಕೊಟ್ಟ ಬಳಿಕ ಮದುವೆಯಾದೆ ಎಂದು ಆ ವ್ಯಕ್ತಿ ಹೇಳಿಕೊಂಡಿದ್ದಾನೆ. ಆದರೆ, ಆಕೆ ಮದುವೆ ನಂತರವೂ ರಹಸ್ಯವಾಗಿ ಮಾಂಸಾಹಾರ ಸೇವಿಸುತ್ತಿರುವುದನ್ನು ಇತ್ತೀಚೆಗಷ್ಟೇ ಗಂಡ ನೋಡಿದ್ದಾನೆ.

ಆಕೆ ತುಂಬಾ ಸೌಂದರ್ಯವತಿ. ಮತ್ತೆಂದಿಗೂ, ಎಲ್ಲಿಯೂ ಮಟನ್​ ಸೇವಿಸಬಾರದು ಎಂಬ ಷರತ್ತಿನೊಂದಿಗೆ ಮದುವೆ ಮಾಡಿಕೊಳ್ಳಲು ಒಪ್ಪಿಕೊಂಡೆ. ಆದರೆ, ಈಗ ಆಕೆ ಹೆಚ್ಚು ಮಟನ್​ ಅನ್ನು ಇಷ್ಟಪಡುತ್ತಿದ್ದಾಳೆ. ಅಲ್ಲದೆ, ಮಟನ್​ ಬಿಟ್ಟು ಇರಲಾರದಷ್ಟು ಅಚ್ಚಿಕೊಂಡಿದ್ದಾಳೆ ಎಂದು ದೂರಿದ್ದಾನೆ. ಆದರೂ ತನ್ನ ಪತ್ನಿಯನ್ನು ಕ್ಷಮಿಸಲು ನಿರ್ಧರಿಸಿರುವ ವ್ಯಕ್ತಿ ತನ್ನ ಪತ್ನಿಗೆ ಕೊನೆಯ ಅವಕಾಶವೊಂದನ್ನು ನೀಡಿದ್ದಾರೆ. ಅದೇನೆಂದರೆ, ಮಟನ್​ ಅಥವಾ ನಾನು ಎಂಬ ಆಯ್ಕೆಯನ್ನು ಪತ್ನಿಯ ಮುಂದೆ ಇಟ್ಟಿದ್ದಾನೆ.

ಆಯ್ಕೆಗಳನ್ನು ನೀಡಿದ ಗಂಡನಿಗೆ ಇದೀಗ ಮತ್ತೊಂದು ಆತಂಕ ಎದುರಾಗಿದೆ. ಎಲ್ಲಿ ನನ್ನ ಪತ್ನಿ ನನಗಿಂತ ಮಟನ್​ ಅನ್ನು ಆರಿಸಿಕೊಳ್ಳುತ್ತಾಳೋ ಎಂಬ ಭಯ ಗಂಡನಲ್ಲಿ ಕಾಡುತ್ತಿದೆ. ಅಂಕಣಕಾರರ ಉತ್ತರವು ಕ್ಲಿಪ್ಪಿಂಗ್‌ನಲ್ಲಿ ಗೋಚರಿಸದಿದ್ದರೂ, ಪುರುಷ, ಮಹಿಳೆ ಮತ್ತು ಮಟನ್​ ಒಳಗೊಂಡ ತ್ರಿಕೋನ ಪ್ರೇಮವನ್ನು ಅವರು ಮೊದಲ ಬಾರಿಗೆ ನೋಡಿದ್ದರಿಂದ ಆ ವ್ಯಕ್ತಿ ಹೊಸ ದಾಖಲೆಯನ್ನು ನಿರ್ಮಿಸಿದ್ದಾರೆ ಎಂದು ಬರಹಗಾರ ಹೇಳಿಕೊಂಡಿದ್ದಾರೆ.

ಈ ಬಗ್ಗೆ ಕಾಮೆಂಟ್​ ಮಾಡಿರುವ ಹೆಚ್ಚಿನವರು ಈ ಪರಿಸ್ಥಿತಿಯನ್ನು 'ಅವಾಸ್ತವ' ಎಂದು ಕಂಡುಕೊಂಡರೆ, ಇತರರು ಇದನ್ನು ಗಂಭೀರವಾಗಿ ಪರಿಗಣಿಸಿದ್ದು, ಆಯ್ಕೆ ಮಾಡುವುದು ತುಂಬಾ ಕಠಿಣ ಎಂಬ ಅಭಿಪ್ರಾಯ ಹೊಂದಿದ್ದಾರೆ. (ಏಜೆನ್ಸೀಸ್​)

https://www.vijayavani.net/rider-movie-release-on-25t-december/

https://www.vijayavani.net/booster-vaccine-suggestion-to-40-plus-people/

https://www.vijayavani.net/actor-shahid-kapoor-shares-his-shooting-experirance/

https://www.vijayavani.net/clubhouse-conversation-about-agriculturalist-women/